କଣାସ ୨୫।୭: ପୁରୀ ଜିଲ୍ଲା କଣାସ ବ୍ଲକ ଗଡ଼ବଡ଼ପୁଟ ଗ୍ରାମରୁ ୨ ହଜାର ବର୍ଷ ତଳର ଏକ ମୁଦ୍ରା ମିଳିଛି । ଏହା କୁଶାଣ ସାମ୍ରାଜ୍ୟ ସମୟର ବୋଲି କୁହାଯାଉଛି । ଉତ୍କଳ ବିଶ୍ୱବିଦ୍ୟାଳୟର ପ୍ରତ୍ନତତ୍ତ୍ୱ ବିଭାଗ ସହକାରୀ ପ୍ରାଧ୍ୟାପକ ଡ. ଅନାମଚରଣ ବେହେରା ଓ ତାଙ୍କ ସହକର୍ମୀମାନେ ଏହାକୁ ଉଦ୍ଧାର କରିଛନ୍ତି । ଏଥିସହିତ ସ୍ଥାନୀୟ ଅଞ୍ଚଳରୁ ପୁରାତନ ପ୍ରସ୍ତର ଯୁଗର ପ୍ରସ୍ତର କୁରାଢ଼ି ଓ ଅନ୍ୟ ଧାରୁଆ ପ୍ରସ୍ତରଖଣ୍ଡ ସଂଗ୍ରହ କରିଛନ୍ତି ।
ପ୍ରାୟ ୫୦ ବର୍ଷ ତଳେ ଗ୍ରାମର ପ୍ରସିଦ୍ଧ ଶୈବ ପୀଠ ମଲ୍ଲିକେଶ୍ୱର ମନ୍ଦିର ନିକଟରେ ଥିବା ଏକ ଛୋଟ ପାହାଡ଼କୁ ଅନ୍ତର୍ଯ୍ୟାମୀ ପରିଡ଼ା ନାମକ ବ୍ୟକ୍ତି ଖନନ କରିବା ବେଳେ ଏସବୁ ମିଳିଥିଲା । ଏହାକୁ ସେ ତାଙ୍କ ବନ୍ଧୁ ତଥା ଡେଲାଙ୍ଗ ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷ ଭାସ୍କର ଚନ୍ଦ୍ର ସାମନ୍ତରାୟଙ୍କୁ ଦେଇଥିଲେ । ପାଖାପାଖି ୩-୪ଟି ମୁଦ୍ରା ସହିତ ଅନ୍ୟ କିଛି ସାମଗ୍ରୀ ପ୍ରଦାନ କରିଥିଲେ । ଭାସ୍କର ଏହାକୁ ଦୀର୍ଘ ଦିନ ବାକ୍ସରେ ସାଇତି ରଖିଥିଲେ । କାଳକ୍ରମେ କିଛି ହଜି ଯାଇଥିଲା । ରହିଥିବା ମୁଦ୍ରା ବାବଦରେ ସେ ଉତ୍କଳ ବିଶ୍ୱବିଦ୍ୟାଳୟର ଡ. ବେହେରାଙ୍କୁ କହିଥିଲେ । ସେ ଏସବୁ ଦେଖିବା ପରେ ଏହା କୁଶାଣ ସାମ୍ରାଜ୍ୟର ବୋଲି ମତ ଦେଇଛନ୍ତି । ଡ. ବେହେରା କହିଛନ୍ତି, ଏହି ମୁଦ୍ରା ଗଞ୍ଜାମ ଓ ଭୁବନେଶ୍ୱରରୁ ମଧ୍ୟ ମିଳିଛି ।
ଡେଲାଙ୍ଗର ଘୋରଡ଼ିଆ ପାହାଡ଼ ଦେଇ ସେତେବେଳେ ବ୍ୟବସାୟୀମାନେ ଗଞ୍ଜାମ ଯାଇ କାରବାର କରୁଥିବା ଅନୁମାନ କରାଯାଉଛି । ଏହା ଉପରେ ଅଧିକ ଗବେଷଣା କରି ଅଧିକ ତଥ୍ୟ ବାହାର କରିବେ ବୋଲି ମତ ଦେଇଛନ୍ତି । ଗଡ଼ବଡ଼ପୁଟରେ ପୁରାତନ ସମୟର ବହୁ ସାମଗ୍ରୀ ମିଳିଥିବାରୁ ଏଠାରେ ପ୍ରତ୍ନତତ୍ତ୍ୱ ବିଭାଗ ଦ୍ୱାରା ଗବେଷଣା କରାଯାଇ ଖନନ କରାଗଲେ ଆହୁରି ଅନେକ ପ୍ରାଚୀନ ସାମଗ୍ରୀ ମିଳିପାରେ ବୋଲି କୁହାଯାଉଛି । ମୁଦ୍ରା ଓ କୁରାଢ଼ି ହସ୍ତାନ୍ତର ବେଳେ ଅନ୍ୟମାନଙ୍କ ମଧ୍ୟରେ କଲ୍ୟାଣପୁର ଉଚ୍ଚ ବିଦ୍ୟାଳୟର ପ୍ରାକ୍ତନ ପ୍ରଧାନଶିକ୍ଷକ ବୃନ୍ଦାବନ ପାହାଡ଼ସିଂହ, ଗ୍ରାମବାସୀ ବୀରବର ପରିଡ଼ା ପ୍ରମୁଖ ଉପସ୍ଥିତ ଥିଲେ ।
You Can Read:
ମହାନଦୀର ବିଭିନ୍ନ କଷ୍ଟ ଆମେ ପାଇଛୁ, ଏହା ଖୁବଶୀଘ୍ର ଲାଘବ ହେବ
