ଆର୍ଥିକ ସଂକଟ ସହ ପାକିସ୍ତାନରେ ବଢୁଛି ଦାରିଦ୍ର୍ୟତା, ଆୟ ଅସମାନତା ୨୭ ବର୍ଷର ଉଚ୍ଚତମ ସ୍ତରରେ

ଇସ୍ଲାମାବାଦ ୨୧।୨: ପାକିସ୍ତାନର ଦାରିଦ୍ର୍ୟତା ହାର ୧୧ ବର୍ଷର ଉଚ୍ଚତମ ସ୍ତର ୨୯%କୁ ପହଞ୍ଚି ଯାଇଛି। ସେହିପରି ଆୟ ଅସମାନତା ୨୭ ବର୍ଷର ଉଚ୍ଚତମ ସ୍ତରକୁ ପହଞ୍ଚିଛି। ଏହି ସୂଚନା ଯୋଜନା ମନ୍ତ୍ରୀ ଅହସାନ ଇକବାଲଙ୍କ ଦ୍ୱାରା ଜାରି ଏକ ଅଧିକାରୀକ ସର୍ଭେକ୍ଷଣରୁ ସାମ୍ନାକୁ ଆସିଛି। ‘ଏକ୍ସପ୍ରେସ୍ ଟ୍ରିବ୍ୟୁନ’ ରିପୋର୍ଟ ଅନୁସାରେ ଦେଶର ୭କୋଟିରୁ ଅଧିକ ଲୋକେ ଏବେ ଦାରିଦ୍ର୍ୟତା ସୀମାରେଖା ତଳକୁ ଚାଲି ଯାଇଛନ୍ତି। ଏଥିରେ ମୌଳିକ ଆବଶ୍ୟକତା ପୂରଣ କରିବା ପାଇଁ ମାସିକ ଆୟ ସୀମା ୮,୪୮୪ ଟଙ୍କା ପରିଭାଷିତ କରିଛନ୍ତି।

୨୦୨୪-୨୫ଆର୍ଥିକ ବର୍ଷର ପ୍ରାରମ୍ଭିକ ନିଷ୍କର୍ସରୁ ଜଣାପଡେ ଯେ ପ୍ରଧାନମନ୍ତ୍ରୀ ଶହବାଜ ସରିଫଙ୍କ ବର୍ତ୍ତମାନ ସରକାରର ପ୍ରଥମ ବର୍ଷରେ ଦାରିଦ୍ର୍ୟତା ହାର ୨୦୧୯ର ୨୧.୯%ରୁ ବଢି ୨୮.୯% ହୋଇଯାଇଛି। ୨୦୧୪ ମସିହା ପରେ ପାକିସ୍ତାନରେ ଗରିବୀର ଏହା ସବୁଠୁ ଉଚ୍ଚତମ ସ୍ତର। ୨୦୧୪ ମସିହାରେ ଏହା ୨୯.୫% ଥିଲା। ଅସମାନତା ମଧ୍ୟ ୩୨.୭%କୁ ବଢି ଯାଇଛି, ଯାହା ୧୯୯୮ ମସିହା ପରେ ସବୁଠୁ ଅଧିକ ବୋଲି କୁହାଯାଇଛି। ଏବେ ଦେଶରେ ବେକାରୀ ହାର ୨୧ ବର୍ଷର ସବୁଠୁ ଉଚ୍ଚତମ ସ୍ତରକୁ ପହଞ୍ଚିଛି।

ମନ୍ତ୍ରୀ ସ୍ୱୀକାର କରିଛନ୍ତି ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମଏଫ)ଙ୍କ ସ୍ଥିରିକରଣ ନୀତି ଦେଶର ଅତ୍ୟନ୍ତ କଠିନ ପରିସ୍ଥିତିରେ ଯୋଗଦାନ କରିଛି। ଏଥି ପାଇଁ ସେ ସବସିଡି ପ୍ରତ୍ୟାହାର ଓ ମୁଦ୍ରାର ଅବମୂଲ୍ୟାୟନର ଉଦାହରଣ ଦେଇଛନ୍ତି। ସେହିପରି ପ୍ରାକୃତିକ ବିତ୍ପାତ ଓ ଦୁର୍ବଳ ବିକାଶ ମଧ୍ୟ ଏହାର କାରକ ବୋଲି ମନ୍ତ୍ରୀ କହିଛନ୍ତି। ପାକିସ୍ତାନର ଗ୍ରାମାଞ୍ଚଳ ଦାରିଦ୍ର୍ୟତା ଏବେ ୨୮.୨%ରୁ ବଢି ୩୬.୨% ହୋଇଯାଇଛି। ସେହିପରି ସହରାଞ୍ଚଳରେ ଦାରିଦ୍ର୍ୟତା ୧୧%ରୁ ବଢି ୧୭.୪% ହୋଇଯାଇଛି। ପ୍ରାନ୍ତିୟ ତଥ୍ୟରୁ ମଧ୍ୟ ଏହିପରି ଫଳାଫଳ ଆସିଛି। ଏଥିରେ ପଞ୍ଜାବର ଦାରିଦ୍ର୍ୟତା ହାର ୧୬.୫%ରୁ ବଢି ୨୩.୩% ହୋଇଯାଇଥିବା ବେଳେ ସିନ୍ଧରେ ୨୪.୫%ରୁ ବଢି ୩୨.୬%, ଖୈବର ପୁକ୍ତନଖ୍ୱାର ୨୮.୭%ରୁ ବଢି ୩୫.୩%, ବଲୁଚିସ୍ତାନର ୪୨%ରୁ ବଢି ୪୭% ହୋଇଯାଇଥିବା କୁହାଯାଇଛି।

୭ ବର୍ଷରେ ବାସ୍ତବିକ ମାସିକ ଘରୋଇ ଆୟ ୧୨% ହ୍ରାସ ହୋଇ ୩୧,୧୨୭ ଟଙ୍କା ହୋଇଯାଇଛି। ତେବେ ବାସ୍ତବିକ ବ୍ୟୟରେ ୫.୪% ହ୍ରାସ ହୋଇଛି। ଏଥିରୁ ଦେଶର ମୁଦ୍ରାସ୍ଫୀତି ପରିସ୍ଥିତି ସ୍ପଷ୍ଟ ପରିଭାଷିତ ହେଉଛି। ସର୍ଭେକ୍ଷଣ ଅନୁସାରେ ଆୟରେ ନାମମାତ୍ର ବୃଦ୍ଧି ମୁଦ୍ରାସ୍ପୀତି ହାରଠାରୁ ମଧ୍ୟ କମ ରହିଛି। ଏଣୁ ଲୋକଙ୍କ ବାସ୍ତବିକ ଆୟ ହ୍ରାସ ହୋଇଛି। ଏକ୍ସପ୍ରେସ୍ ଟ୍ରିବ୍ୟୁନ ଅନୁସାରେ ଇକବାଲ କହିଛନ୍ତି ଯେ ଆର୍ଥିକ ପ୍ରଗତିର ଧାରା ପ୍ରଥମେ ୨୦୧୮ରେ ବାଧିତ ହୋଇଥିଲା। ଏହା ପରେ ୨୦୨୨ରେ ଉପଭୋଗ ଆଧାରିତ ଆର୍ଥିକ ବିକାଶ ପରବର୍ଷ ଅର୍ଥ ବ୍ୟବସ୍ଥାକୁ ମାଟିରେ ମିସାଇ ଦେଇଥିଲା।

ସେ କହିଛନ୍ତି ଯେ ବେନଜିରଙ୍କ ଆୟ ସହାୟତା କାର୍ଯ୍ୟକ୍ରମରେ ନଗଦ ଟ୍ରାନ୍ସଫର ସହାୟକ ହୋଇପାରିନି। ଏଣୁ ମନ୍ତ୍ରୀ ବିକାଶ ଓ ଧନ ସୃଜନର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି। ତେବେ ମନ୍ତ୍ରୀ ପିଏମଏଲ-ଏନ ନୀତିକୁ ହେଉଥିବା ସମାଲୋଚନାର ଜବାବ ଦେଇ କହିଛନ୍ତି ଯେ ପାକିସ୍ତାନ ତେହେରିକ-ଏ-ଇନସାଫ ପାର୍ଟିର ନିଷ୍ପତ୍ତି ପ୍ରଭାବ ସମାପ୍ତ ହେବାକୁ ୩ ବର୍ଷ ଲାଗିବ। ଏଣୁ ଆଇଏମଏଫ କାର୍ଯ୍ୟକ୍ରମରୁ ଶୀଘ୍ର ବାହାରକୁ ବାହାରିବାର ସମ୍ଭାବନାକୁ ଅସ୍ୱୀକାର କରିଛନ୍ତି। ତେବେ ନିରନ୍ତର ରୋଜଗାର ବୃଦ୍ଧି ଓ ଆୟର ସୁଧାର ଦ୍ୱାରା ଦେଶର ଗରିବୀ ଦୂର କରାଯାଇ ପାରିବ ବୋଲି କହିଛନ୍ତି।

ଏହା ବି ପଢନ୍ତୁ :-ବ୍ରିଟିଶ ପରିବାର ଯାଇଥିଲେ ମରକ୍କୋ, ଏମିତି କିଛି ଘଟିଲା ବୁଲିବା ନିଶା ଛାଡିଗଲା