ନୂଆଦିଲ୍ଲୀ: ବାରମ୍ବାର ଦଳୀୟ ଶୃଙ୍ଖଳାର ଉଲ୍ଲଂଘନ ପରେ କର୍ଣ୍ଣାଟକର ଦୁଇ ବିଜେପି ବିଧାୟକୁ ଦଳରୁ ବହିସ୍କାର କଲା ବିଜେପି। ଦୁଇ ବିଧାୟକ ଏସଟି ସୋମଶେଖର ଏବଂ ଏ ଶିବରାମ ହେବରଙ୍କୁ ୬ ବର୍ଷ ପାଇଁ ଦଳରୁ ବହିଷ୍କାର କରିଛି ବିଜେପି କେନ୍ଦ୍ରୀୟ ଶୃଙ୍ଖଳା କମିଟି। ଏନେଇ କେନ୍ଦ୍ରୀୟ ଶୃଙ୍ଖଳା କମିଟି ସଦସ୍ୟ ସଚିବ ଓମ୍ ପାଠକ ଏକ ଚିଠି ଜାରି କରିଛନ୍ତି।
ଚିଠିରେ କୁହାଯାଇଛି ୨୫ ମାର୍ଚ୍ଚ, ୨୦୨୫ ତାରିଖରେ ହେବ୍ବର ଏବଂ ସୋମାଶେଖରଙ୍କ ଦେଇଥିବା କାରଣ ଦର୍ଶାଅ ନୋଟିସର ଉତ୍ତରକୁ ଦଳ ବିଚାର କରିଛି। ଦୁଇ ବିଧାୟକଙ୍କର ଉତ୍ତର ସନ୍ତୋଷଜନକ ନୁହେଁ ବୋଲି ମନେ କରି ତୁରନ୍ତ ପ୍ରଭାବରୁ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିଷ୍ପତ୍ତି ନେଇଛି। ବର୍ତ୍ତମାନ ଆପଣ ଦଳର କୌଣସି ପଦରେ ନାହାନ୍ତି, ଅର୍ଥାତ ଆପଣଙ୍କୁ ଦଳରୁ ବହିସ୍କାର କରାଯାଇଛି ବୋଲି ଚିଠିରେ କୁହାଯାଇଛି। ସୋମାଶେଖର ଏବଂ ହେବ୍ବର ଯଥାକ୍ରମେ ଯଶୱନ୍ତପୁର ଏବଂ ୟେଲାପୁର ବିଧାନସଭା ନିର୍ବାଚନମଣ୍ଡଳୀକୁ ବିଧାୟକ ଅଛନ୍ତି।
ସେପଟେ ଏହି ବହିଷ୍କାର ଉପରେ ତୀବ୍ର ପ୍ରତିକ୍ରିୟା ପ୍ରକାଶ କରି, କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡିକେ ଶିବକୁମାର ବିଜେପିର ଚୟନମୂଳକ ଶୃଙ୍ଖଳାଗତ କାର୍ଯ୍ୟାନୁଷ୍ଠାନକୁ ସମାଲୋଚନା କରିଛନ୍ତି। ଶିବକୁମାର କହିଛନ୍ତି ନା, ଏସଟି ସୋମଶେଖର ଏବଂ ଶିବରାମ ହେବ୍ବର ବିଧାନ ସୌଧରେ କାହାକୁ ଦୁଷ୍କର୍ମ କରିନାହାଁନ୍ତି। ଏତେ ଏଫଆଇଆର ଅଛି, ଏତେ ତଦନ୍ତ ହୋଇଛି। କିଛି ବିଧାୟକ ବିରୋଧୀ ଦଳ ନେତାଙ୍କୁ ଏଡସ୍ ଇଞ୍ଜେକ୍ସନ ଦେବାକୁ ଚେଷ୍ଟା କରିଥିଲେ, ଅନ୍ୟମାନେ ୟେଦିୟୁରପ୍ପା ଜିଙ୍କୁ ଫସାଇବାକୁ ଚେଷ୍ଟା କରିଥିଲେ। କିନ୍ତୁ ସେମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ। ମୁଁ ଖୁସି ଯେ ସେମାନେ ସେହି ସମସ୍ତ 'ନବରତ୍ନ'ଙ୍କୁ ସେମାନଙ୍କ ଦଳରେ ରଖିଛନ୍ତି।
ଘଟଣାରେ ଶିବରାମ ହେବରଙ୍କ ପ୍ରତିକ୍ରିୟା ବି ଆସିଛି। ସେ କହିଛନ୍ତି ଯେ ସେ ସବୁବେଳେ ରାଜନୀତି ଅପେକ୍ଷା ତାଙ୍କ ନିର୍ବାଚନମଣ୍ଡଳୀ ଏବଂ ତାଙ୍କ ଲୋକଙ୍କୁ ପ୍ରାଥମିକତା ଦେଇ ଆସିଛନ୍ତି। ତେବେ ସ୍ଥାୟୀ ସମାଧାନ ପାଇଁ ରାଜନୀତିରେ ଧୈର୍ଯ୍ୟର ଓ ସାମୁହିକ ସମର୍ଥନର ଆବଶ୍ୟକତା ଥାଏ ବୋଲି ସେ କହିଛନ୍ତି। ସମୟ ଆସିଲେ ଉଚିତ ନିଷ୍ପତ୍ତି ନେବି ବୋଲି ହେବର କହିଛନ୍ତି।
ସୂଚନା ଥାଉକି ମାର୍ଚ୍ଚ ୨୦୨୪ ରାଜ୍ୟସଭା ନିର୍ବାଚନରେ, ସୋମାଶେଖର, ଦଳୀୟ ହ୍ୱିପ୍ ହୋଇଥିଲେ ମଧ୍ୟ, କଂଗ୍ରେସ ପ୍ରାର୍ଥୀ ଅଜୟ ମାକେନଙ୍କୁ କ୍ରସ୍-ଭୋଟ୍ ଦେଇଥିଲେ। ଅନ୍ୟପଟେ ହେବର ସମ୍ପୂର୍ଣ୍ଣ ଭାବରେ ଭୋଟ ଦେବାରୁ ବିରତ ରହିଥିଲେ। ଉଭୟ କାର୍ଯ୍ୟକୁ ବିଜେପି ବିଦ୍ରୋହର ଭାବରେ ଦେଖିଥିଲା।
ସୂଚନା ଥାଉକି, ଏହି ଦୁଇ ବିଧାୟକ ସେହି ୧୮ ଜଣ କଂଗ୍ରେସ ଏବଂ ଜେଡିଏସ୍ ବିଧାୟକଙ୍କ ମଧ୍ୟରେ ଥିଲେ ଯେଉଁମାନେ ଏଚ୍ ଡି କୁମାରସ୍ୱାମୀଙ୍କ ନେତୃତ୍ୱାଧୀନ କଂଗ୍ରେସ-ଜେଡିଏସ୍ ମେଣ୍ଟ ସରକାରକୁ ଭାଙ୍ଗି ଦେଇଥିଲେ ଏବଂ ରାଜ୍ୟରେ ଚତୁର୍ଥ ଥର ପାଇଁ ବିଜେପିକୁ କ୍ଷମତାକୁ ଆଣିବାରେ ସାହାଯ୍ୟ କରି ୨୦୧୯ରେ ବିଏସ୍ ୟେଦିୟୁରପ୍ପାଙ୍କୁ ମୁଖ୍ୟମନ୍ତ୍ରୀ କରିଥିଲେ। ଏହାପରେ ସେମାନଙ୍କୁ ଅଯୋଗ୍ୟ ଘୋଷଣା କରାଯିବା ପରେ ବିଜେପି ଆପଣାଇଥିଲା।
