ଆଠମଲ୍ଲିକ: ମୃତ୍ୟୁଦଣ୍ଡରୁ ମୁକ୍ତି ପାଇଲେ ଦୁଇ ଅଭିଯୁକ୍ତ। ପ୍ରମାଣ ଅଭାବରୁ ହାଇକୋର୍ଟ ସେମାନଙ୍କୁ ଖଲାସ କରିବାକୁ ଆଜି ନିର୍ଦ୍ଦେଶ ଦେଇଛନ୍ତି। ଏହି ୨ ଆସାମୀ ହେଲେ ଆଠମଲ୍ଲିକ ଅଞ୍ଚଳର ପ୍ରକାଶ ବେହେରା ଓ ନନ୍ଦ କିଶୋର ସେଠୀ। ନିଜ ପରିବାରର ୩ ଜଣଙ୍କୁ ହତ୍ୟା କରିଥିବା ଘଟଣାରେ ଦୋଷୀ ସାବ୍ୟସ୍ତ ହୋଇଥିଲେ। ଉଭୟଙ୍କୁ ମୃତ୍ୟୁଦଣ୍ଡ ଶୁଣାଇଥିଲେ ଆଠମଲ୍ଲିକ ଏଡିଜେ କୋର୍ଟ।
ଆଠମଲ୍ଲିକ କିଶନ ନଗର ଥାନା ଅଞ୍ଚଳରେ ୨୦୧୭ ମସିହା ଅକ୍ଟୋବର ୧୦ ତାରିଖରେ ଘଟିଥିଲା ଏହି ଘଟଣା। ପରିବାରର ୩ ଜଣଙ୍କ ନିର୍ମମ ଭାବେ ହତ୍ୟା କରିଥିଲେ ଦୁର୍ବୃତ୍ତ। ପତ୍ନୀଙ୍କୁ ଘରେ, ସ୍ଵାମୀ ଓ ଆଠ ବର୍ଷର ପୁଅକୁ ଅପହରଣ କରି ୨୫ କିଲୋମିଟର ଦୂରରେ ହତ୍ୟା କରିଥିଲେ ଦୁର୍ବୃତ୍ତ। ତେବେ ଆବଶ୍ୟକୀୟ ପ୍ରମାଣ ଅଭାବରୁ ନିମ୍ନ ଅଦାଲତରେ ମୃତ୍ୟୁ ଦଣ୍ଡ ପାଇଥିବା ଅଭିଯୁକ୍ତମାନଙ୍କୁ ଆଜି ହାଇକୋର୍ଟ ନିର୍ଦ୍ଦୋଷରେ ଖଲାସ କରିବାକୁ ନିର୍ଦ୍ଦେଶ ଦେଇଛନ୍ତି।
