ପୁଣି ଫସିଲେ ପଲାଶ ମୁଚ୍ଛଲ; ଠକେଇ ଅଭିଯୋଗରେ ମାମଲା ରୁଜୁ, ୪୦ ଲକ୍ଷ ଟଙ୍କା ନେଇ ଦେଉ ନାହାଁନ୍ତି ଧରା

ନୂଆଦିଲ୍ଲୀ ୨୪।୦୧; ଭାରତୀୟ ମହିଳା ଷ୍ଟାର କ୍ରିକେଟର ସ୍ମୃତି ମନ୍ଧାନାଙ୍କ ସହ ବିବାହ ଭାଙ୍ଗିବା ପରେ ବେଶ ଚର୍ଚ୍ଚାରେ ରହିଥିଲେ ପଲାସ ମୁଚ୍ଛଲ । ୨୦୨୫ ମସିହାରେ ଏହି ଖବର ବେଶ ଚର୍ଚ୍ଚାରେ ରହିଥିଲା । ତେବେ କିଛିଦିନ ବ୍ୟବଧାନରେ ପୁଣି ଖବରର ଶିରୋନାମା ପାଲଟିଛନ୍ତି ପଲାସ । ସେ ୪୦ ଲକ୍ଷ ଟଙ୍କାର ଠକେଇ କରିଥିବା ନେଇ ଚର୍ଚ୍ଚା ଆରମ୍ଭ ହୋଇଛି ।ମହାରାଷ୍ଟ୍ରର ସାଙ୍ଗଲି ଜିଲ୍ଲାର ଜଣେ ବ୍ୟକ୍ତିଙ୍କୁ ୪୦ ଲକ୍ଷ ଟଙ୍କା ଠକେଇ କରିଥିବା ନେଇ ବୁଧବାର ସନ୍ଧ୍ୟାରେ ସାଙ୍ଗଲି ପୋଲିସ ନିକଟରେ ଏକ ଅଭିଯୋଗ ଦାୟର ହୋଇଛି। ଅଭିଯୋଗକାରୀ ବୈଭବ ମାନେ ଜଣେ ଚଳଚ୍ଚିତ୍ର ଅର୍ଥ ନିବେଶକ ଏବଂ ଭାରତୀୟ ମହିଳା କ୍ରିକେଟର ସ୍ମୃତି ମନ୍ଧାନାଙ୍କ ପିଲାଦିନର ସାଙ୍ଗ। ବୈଭବଙ୍କ ଅଭିଯୋଗ ଅନୁଯାୟୀ, ସ୍ମୃତିଙ୍କ ବାପା ଶ୍ରୀନିବାସ ମନ୍ଧାନା ହିଁ ପଲାଶଙ୍କୁ ସାଙ୍ଗଲି ଗସ୍ତ ସମୟରେ ତାଙ୍କ ସହ ପରିଚୟ କରାଇଥିଲେ।

ବୈଭବ ମାନେଙ୍କ ଦାବି ଅନୁଯାୟୀ, ପଲାଶ ତାଙ୍କୁ ‘ନଜରିଆ’ ନାମକ ଏକ ଚଳଚ୍ଚିତ୍ରରେ ଅର୍ଥ ନିବେଶ କରିବାକୁ ପ୍ରସ୍ତାବ ଦେଇଥିଲେ। ଏହି ଫିଲ୍ମଟି ଖୁବଶୀଘ୍ର OTT ପ୍ଲାଟଫର୍ମରେ ମୁକ୍ତିଲାଭ କରିବ ଏବଂ ଏଥିରୁ ଭଲ ଲାଭ ମିଳିବ ବୋଲି ପ୍ରତିଶ୍ରୁତି ମିଳିଥିଲା। ଏହି ବିଶ୍ୱାସରେ ବୈଭବ ବିଭିନ୍ନ କିସ୍ତିରେ ନଗଦ ଏବଂ ଗୁଗଲ ପେ ମାଧ୍ୟମରେ ମୋଟ ୪୦ ଲକ୍ଷ ଟଙ୍କା ପଲାଶଙ୍କୁ ଦେଇଥିଲେ। ହେଲେ ଚଳଚ୍ଚିତ୍ର କାମ ସମ୍ପୂର୍ଣ୍ଣ ହୋଇପାରିନଥିଲା। ଯେତେବେଳେ ବୈଭବ ନିଜ ଟଙ୍କା ଫେରସ୍ତ ମାଗିଥିଲେ, ପଲାଶ ପ୍ରଥମେ ଟଙ୍କା ଦେବାର ପ୍ରତିଶ୍ରୁତି ଦେଇଥିଲେ, ପରେ ସେ ବୈଭବଙ୍କ ଫୋନ୍ କଲ୍ ଉଠାଇବା ବନ୍ଦ କରିଦେବା ସହ ତାଙ୍କ ନମ୍ବରଟିକୁ ବ୍ଲକ୍ କରିଦେଇଥିଲେ।

ସାଙ୍ଗଲି ପୋଲିସ ଅଧୀକ୍ଷକଙ୍କ ନିକଟରେ ବୈଭବ ସମସ୍ତ ବ୍ୟାଙ୍କ୍ କାରବାରର ଦଲିଲ ଏବଂ ପ୍ରମାଣ ଦାଖଲ କରିଛନ୍ତି। ପୋଲିସ ସୂତ୍ରରୁ ମିଳିଥିବା ଖବର ଅନୁଯାୟୀ, ଅଭିଯୋଗ ଗ୍ରହଣ କରାଯାଇଛି ଏବଂ କାଗଜପତ୍ରର ଯାଞ୍ଚ ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସୂଚନାଯୋଗ୍ୟ ଯେ, କିଛି ସପ୍ତାହ ପୂର୍ବରୁ କ୍ରିକେଟର ସ୍ମୃତି ମନ୍ଧାନାଙ୍କ ସହ ପଲାଶଙ୍କ ବିବାହ ଭାଙ୍ଗିବା ଖବର ସବୁଠି ଚର୍ଚ୍ଚାର ବିଷୟ ପାଲଟିଥିଲା। ବର୍ତ୍ତମାନ ପଲାଶ ଅଭିନେତା ଶ୍ରେୟସ ତଲପଡ଼େଙ୍କ ସହ ଏକ ନୂଆ ପ୍ରୋଜେକ୍ଟ ପାଇଁ ପ୍ରସ୍ତୁତି ଚଳାଇଛନ୍ତି।