ଅଙ୍କାରା: ଇସ୍ରାଏଲ୍ ସହ ସବୁ ସମ୍ପର୍କ ଛିନ୍ନ କଲା ତୁର୍କୀ। ଗାଜାରେ ଚାଲିଥିବା ଯୁଦ୍ଧ ପାଇଁ ଇସ୍ରାଏଲ ସହିତ ସମସ୍ତ ବାଣିଜ୍ୟିକ ଏବଂ ଅର୍ଥନୈତିକ ସମ୍ପର୍କ ସମ୍ପୂର୍ଣ୍ଣ ଭାବରେ ଛିନ୍ନ କରିବାକୁ ନିଷ୍ପତ୍ତି ନେଇଛନ୍ତି ଏର୍ଦ୍ଦୋଗାନଙ୍କ ସରକାର। ଏନେଇ ଶୁକ୍ରବାର ତୁର୍କୀ ପକ୍ଷରୁ ଘୋଷଣା କରାଯାଇଛି। ଇସ୍ରାଏଲୀ ବିମାନ ପାଇଁ ତୁର୍କି ଏହାର ଆକାଶ ସୀମା ବନ୍ଦ କରିଦେଇଛି। ଏଥିସହିତ ତୁର୍କୀ ଜାହାଜଗୁଡ଼ିକୁ ଇସ୍ରାଏଲୀ ବନ୍ଦରଗୁଡ଼ିକରେ ପ୍ରବେଶ କରିବାକୁ ମାନ କରାଯାଇଛି।
ନିଷ୍ପତ୍ତି ସମ୍ପର୍କରେ ଘୋଷଣା କରି ତୁର୍କୀ ବୈଦେଶିକ ମନ୍ତ୍ରୀ ହାକାନ ଫିଦାନ ଚେତାବନୀ ଦେଇ କହିଛନ୍ତି ମଧ୍ୟପ୍ରାଚ୍ୟରେ ଇସ୍ରାଏଲର ସାମରିକ କାର୍ଯ୍ୟକଳାପ ବନ୍ଦ ନ ହେଲେ ସମଗ୍ର ଅଞ୍ଚଳକୁ ସଂଘର୍ଷରେ ଗ୍ରାସ କରିପାରେ। ଏଥିସହି ସେ ଇସ୍ରାଏଲ ବିରୁଦ୍ଧରେ ଅନ୍ତର୍ଜାତୀୟ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ଆହ୍ୱାନ ଦେଇଛନ୍ତି ଓ ବିଶ୍ୱ ଶକ୍ତିଗୁଡ଼ିକୁ ସମର୍ଥନ ବନ୍ଦ କରିବାକୁ ସେ ଅନୁରୋଧ କରିଛନ୍ତି।
ଆସୋସିଏଟ୍ ପ୍ରେସର ରିପୋର୍ଟ ଅନୁସାରେ ଫିଦାନ କହିଛନ୍ତି “ଆମେ ଇସ୍ରାଏଲ ସହିତ ଆମର ବାଣିଜ୍ୟ ସମ୍ପୂର୍ଣ୍ଣ ଭାବରେ ବନ୍ଦ କରିଦେଇଛୁ। ଆମେ ତୁର୍କୀ ଜାହାଜଗୁଡ଼ିକୁ ଇସ୍ରାଏଲୀ ବନ୍ଦରକୁ ଯିବାକୁ ଅନୁମତି ଦେଉନାହୁଁ। ଆମେ ସେମାନଙ୍କର ବିମାନଗୁଡ଼ିକୁ ବି ଆମର ଆକାଶ ସୀମାରେ ପ୍ରବେଶ କରିବାକୁ ଅନୁମତି ଦେବୁ ନାହୁଁ।”
ଗାଜା ଉପରେ ଇସ୍ରାଏଲର ଆକ୍ରମଣକୁ ତୁର୍କୀ ଆରମ୍ଭରୁ ସମାଲୋଚନା କରି ଆସିଛି। ରାଷ୍ଟ୍ରପତି ରେସେପ୍ ତାୟିପ୍ ଏର୍ଡୋଗାନ୍ ଇସ୍ରାଏଲ୍ର ଆକ୍ରମଣକୁ ନରସଂହାର ବୋଲି ବାରମ୍ବାର କହି ଆସିଛନ୍ତି। କେବଳ ସେତିକି ନୁହେଁ, ସେ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଆଡଲଫ୍ ହିଟଲରଙ୍କ ସହ ମଧ୍ୟ ତୁଳନା କରିଛନ୍ତି।
ଇସ୍ରାଏଲର ଗତ ଦୁଇ ବର୍ଷ ଧରି ଗାଜାରେ ନରସଂହାର କରିବା ସହିତ ବିଶ୍ୱ ଆଖିରେ ସାମ୍ନାରେ ମୌଳିକ ମାନବିକ ମୂଲ୍ୟବୋଧକୁ ଅଣଦେଖା କରୁଛି। ଇସ୍ରାଏଲ ବିରୁଦ୍ଧରେ କଟକଣା ଲାଗୁ କରିବା ନେଇ କୌଣସି ଦେଶ ଏପର୍ଯ୍ୟନ୍ତ ଏତେ ଅର୍ଥପୂର୍ଣ୍ଣ ପଦକ୍ଷେପ ନେଇନାହାନ୍ତି ବୋଲି ଫିଦାନ କହିଥିଲେ ତୁର୍କି ମିଡିଆରେ ଖବର ପ୍ରକାଶ ପାଇଛି।
ସ୍ଥାୟୀ ଯୁଦ୍ଧବିରତି ଏବଂ ଗାଜାକୁ ତୁରନ୍ତ ମାନବିକ ସହାୟତା ପ୍ରବେଶ ଦାବି କରି ଗତ ବର୍ଷ ମେ ମାସରେ ତୁର୍କୀ ଇସ୍ରାଏଲ ସହିତ ସିଧାସଳଖ ବାଣିଜ୍ୟ ସମ୍ପର୍କ ଛିନ୍ନ କରିଥିଲା। ୨୦୨୩ ମସିହାରେ, ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ୭ ବିଲିୟନ ଆମେରିକୀୟ ଡଲାର ଥିଲା।
