ସନା ୩୦।୮: ୟେମେନ ଗଣମାଧ୍ୟମ ସୂତ୍ରରୁ ଇସ୍ରାଏଲ ୟେମେନ ରାଜଧାନୀ ସନାରେ ହୁତୀ ବିଦ୍ରୋହୀଙ୍କ ଉପରେ ଏକ ସଠିକ ଏୟାର ଷ୍ଟ୍ରାଇକ୍ କରିଛି। ଫଳରେ ହୁତୀ ପ୍ରଧାନମନ୍ତ୍ରୀ ଗାଲିବ ଅଲ-ରହାବୀ, ପ୍ରତିରକ୍ଷାମନ୍ତ୍ରୀ ମହମ୍ମଦ ନାଶିର ଅଲ-ଅଥିଫିଙ୍କ ସମେତ ସଙ୍ଗଠନର ଅନେକ ବଡ଼ ନେତା ଓ ଅଧିକାରୀ ପ୍ରାଣ ହରାଇଛନ୍ତି। ଅର୍ଥାତ ହୁତୀ ବିଦ୍ରୋହୀଙ୍କ ସମ୍ପୂର୍ଣ୍ଣ ନେତୃତ୍ୱକୁ ଇସ୍ରାଏଲ ସମାପ୍ତ କରିଦେଇଛି। ଏହାକୁ ୟେମେନରେ ହୁତୀଙ୍କ ଉପରେ ଇସ୍ରାଏଲର ଏ ପର୍ଯ୍ୟନ୍ତ ସବୁଠୁ ଘାତକ ଆକ୍ରମଣ କୁହାଯାଉଛି।
ଏସ୍ରାଏଲୀ ଏଜେନ୍ସୀ ମୋସାଦ ନିଜର ସଠିକ ଆକ୍ରମଣ ନିମନ୍ତେ ବେଶ୍ ପରିଚିତ। ଏଥିରେ ଏହି ଆକ୍ରମଣ ସେତେବେଳେ ହୋଇଛି ଯେତେବେଳେ ହୁତୀ ପ୍ରଧାନମନ୍ତ୍ରୀ ତାଙ୍କର ବାକି ମିତ୍ର ଓ ଅଧିକାରୀଙ୍କ ସହିତ ଏକ ଆପାର୍ଟମେଣ୍ଟରେ ଥିଲେ ଠିକ୍ ସେତିକି ବେଳେ ଆକାଶରୁ ମୃତ୍ୟୁର ବୋମା ପଡିଥିଲା ଓ ସମସ୍ତଙ୍କ ମୃତ୍ୟୁ ହୋଇଛି। ହୁତୀ ପ୍ରଧାନମନ୍ତ୍ରୀ ଓ ବାକି ନେତା ଅବଦୁଲ ମଲିକ ଅଲ-ହୁତୀଙ୍କ ଭାଷଣ ଶୁଣିବା ପାଇଁ ଏକତ୍ର ହୋଇଥିଲେ।
ଏଥି ପାଇଁ ଲୋକେସନ ସ୍ଥିର ହେବା ପରେ ମୋସାଦ ଆକ୍ରମଣ ଲାଗି ପୁରା ପ୍ଲାନ ପ୍ରସ୍ତୁତ କରିଥିଲା। ହୁତୀ ନେତା ଠିକଣା ସ୍ଥଳରେ ଏକତ୍ର ହେବାମାତ୍ରେ ଇସ୍ରାଏଲ ଏୟାରଫୋର୍ସ ଆତର୍କିତ ଆକ୍ରମଣ କରିଥିଲା। ସେହି ଘର ଉପରେ ଏୟାର ଷ୍ଟ୍ରାଇକ୍ କରାଯାଇଥିଲା ଯେଉଁ ଘରେ ବୈଠକ ଚାଲିଥିଲା। ଆକ୍ରମଣ ପରେ ସେହି ଘରେ ଥିବା ଜଣେ ବି ବ୍ୟକ୍ତି ଜୀବିତ ଉଦ୍ଧାର ହୋଇ ନାହାନ୍ତି।
ମୋସାଦ କୌଣସି ଆକ୍ରମଣକୁ ହାଲୁକା ଭାବେ ଗ୍ରହଣ କରେ ନାହିଁ। ସେ ସର୍ବଦା ଏପରି ସୁଯୋଗର ଅପେକ୍ଷାରେ ଥାଏ, ଯେପରି ଶତ୍ରୁର ଛାତିରେ ସିଧା ଆକ୍ରମଣ କରିହେବ। ଏଥି ପାଇଁ ଇସ୍ରାଏଲୀ ଏଜେନ୍ସୀ ଗୁଇନ୍ଦା ସୂଚନା ଏକତ୍ର କରିଥିଲା। ଏଥିରେ ଇସ୍ରାଏଲ ଏଜେନ୍ସୀ ଜାଣିବାକୁ ପାଇଥିଲା ଯେ ହୁତୀ ପ୍ରଧାନମନ୍ତ୍ରୀ ଓ ବାକି ନେତା ଅବଦୁଲ ମଲିକ ଅଲ-ହୁତୀଙ୍କ ଭାଷଣ ଶୁଣିବା ପାଇଁ ଗୋଟିଏ ସ୍ଥାନରେ ଏକଜୁଟ ହେବାକୁ ଯାଉଛନ୍ତି।
