ନିର୍ବାଚନୀ ସତ୍ୟପାଠରେ ଭୁଲ ତଥ୍ୟ ଦେଇ ନିର୍ବାଚନ ଜିତିଥିଲେ କଂଗ୍ରେସ ପ୍ରାର୍ଥୀ, ଚାଲିଗଲା ବିଧାୟକ ପଦ

ନୂଆଦିଲ୍ଲୀ: ନିର୍ବାଚନୀ ସତ୍ୟପାଠରେ ଲୁଚାଇଥିଲେ ତଥ୍ୟ। ଏବେ ହାଇକୋର୍ଟ ଶୁଣାଇଲେ ରାୟ। ରଦ୍ଦ କଲେ ବିଧାୟକ ପଦ। ସୋମବାର ମଧ୍ୟ ପ୍ରଦେଶ ହାଇକୋର୍ଟ ଶ୍ୟୋପୁରର ବିଜୟପୁର ବିଧାନସଭା ସିଟରୁ ବିଜୟୀ ହୋଇଥିବା କଂଗ୍ରେସ ବିଧାୟକ ମୁକେଶ ମଲହୋତ୍ରାଙ୍କ ନିର୍ବାଚନକୁ ଅସିଦ୍ଧ କରିଛନ୍ତି। କୋର୍ଟ ଏହି ଗୁରୁତ୍ବ ନିଷ୍ପତ୍ତି ବିଜେପି ନେତା ଏବଂ ପୂର୍ବତନ ମନ୍ତ୍ରୀ ରାମନିବାସ ରାଓ୍ବତଙ୍କ ପକ୍ଷରୁ ହୋଇଥିବା ଆବେଦନ ଉପରେ ଶୁଣାଣି ପରେ କହିଛନ୍ତି। ପୂର୍ବତନ ମନ୍ତ୍ରୀ ରାମନିବାସ ରାଓ୍ବତ ନିଜର ଆବେଦନରେ ମୁକେଶ ମଲହୋତ୍ରାଙ୍କ ଉପରେ ନିର୍ବାଚନୀ ସତ୍ୟପାଠରେ ଆପରାଧିକ ରେକର୍ଡ ଲୁଚାଇବା ଅଭିଯୋଗ ଆଣିଥିଲେ।

ପୂର୍ବରୁ ବିଜେପିରେ ଥିଲା ମୁକେଶ ମଲହୋତ୍ରା

ସୂଚନାଥାଉକି, ପୂର୍ବତନ ରାଷ୍ଟ୍ରମନ୍ତ୍ରୀ ଏବଂ ଆଦିବାସୀ ନେତା ମୁକେଶ ମଲହୋତ୍ରା ବିଜୟପୁର ବିଧାନସଭା କ୍ଷେତ୍ରର ରାଜନୀତିରେ ଲମ୍ବା ସମୟରୁ ସକ୍ରିୟ ଅଛନ୍ତି। ସେ ପୂର୍ବରୁ ବିଜେପିରେ ଥିଲେ। ତେବେ ବିଧାନସଭା ନିର୍ବାଚନରେ ଟିକେଟ ନମିଳିବାରୁ ସେ ୨୦୨୩ରେ ନିର୍ବାଚନ ପୂର୍ବରୁ ବିଜେପି ଛାଡ଼ିଥିଲେ। ସେ ମୁରେନା ଜିଲ୍ଲାରେ ଆୟୋଜିତ ପ୍ରିୟଙ୍କା ଗାନ୍ଧୀଙ୍କ ନିର୍ବାଚନୀ ସଭାରେ ସଦସ୍ୟତା ନେଇଥିଲେ। ବିଧାନସଭା ନିର୍ବାଚନ ୨୦୨୩ରେ ମୁକେଶ ମଲହୋତ୍ରା ବିଜୟପୁର ସିଟରୁ ସ୍ବାଧୀନ ପ୍ରାର୍ଥୀ ଭାବରେ ମଇଦାନକୁ ଓହ୍ଲାଇଥିଲେ। ତାଙ୍କୁ ୪୫ ହଜାର ଭୋଟ ମିଳିଥିଲା। କିନ୍ତୁ ନିର୍ବାଚନ ଫଳାଫଳ ପରେ ରାମନିବାସ ରାଓ୍ବତ ହାଇକୋର୍ଟ ଗ୍ବାଲିୟର ପୀଠରେ ଆବେଦନ କରିଥିଲେ। ସେ କହିଥିଲେ କଂଗ୍ରେସ ବିଧାୟକ ମୁକେଶ ମଲହୋତ୍ରା ନିର୍ବାଚନୀ ସତ୍ୟପାଠରେ ଅପରାଧିକ ମାମଲା ତଥ୍ୟ ଲୁଚାଇଛନ୍ତି।

ଅଭିଯୋଗ ହୋଇଥିଲା ଯେ, ମୁକେଶ ମଲହୋତ୍ରା ଉପନିର୍ବାଚନ ପାଇଁ ଦାଖଲ ନାମାଙ୍କନରେ ନିଜ ନାଁରେ ଥିବ ୬ ଅପରାଧିକ ମାମଲା ମଧ୍ୟରୁ କେବଳ ୨ଟିର ସୂଚନା ଦେଇଥିଲେ। ଆଉ ଏହା ଅଦାଲତରେ ପ୍ରମାଣିତ ହେବା ପରେ ହାଇକୋର୍ଟ ଗ୍ବାଲିୟର ବେଞ୍ଚର ବିଚାରପତି ଜିଏସ ଅହଲୁବାଲିୟା ମୁକେଶ ମଲହୋତ୍ରାଙ୍କ ନିର୍ବାଚନକୁ ଅସିଦ୍ଧ ଘୋଷଣା କରିଥିଲେ। ଫଳରେ ଏବେ ଦ୍ବିତୀୟ ନମ୍ବରରେ ଥିବା ବିଜେପି ପ୍ରାର୍ଥୀ ରାମନିବାସ ରାଓ୍ବତଙ୍କ ବିଧାୟକ ହେବା ରାସ୍ତା ସଫା ହୋଇଛି।

ଏବେ ରାମନିବାସ ରାଓ୍ବତ ବିଜୟପୁର ବିଧାନସଭା ସିଟ୍ରୁ ନୂଆ ବିଧାୟକ ହେବେ। ଜଷ୍ଟିସ ଜିଏସ ଅହଲୁବାଲିୟାଙ୍କ ଅଦାଲତ କହିଛନ୍ତି ତଥ୍ୟ ଲୁଚାଇବା ନିର୍ବାଚନ ନିୟମ ଉଲ୍ଲଂଘନ। ସେପଟେ କଂଗ୍ରେସ ଏହି ନିଷ୍ପତ୍ତିକୁ ସୁପ୍ରିମକୋର୍ଟରେ ଚାଲେଞ୍ଜ କରିବା ନେଇ କହିଛି।