ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ ମାମଲା, ସ୍କାନରରେ ପୂର୍ବତନ ବିଧାୟକ

ବ୍ରହ୍ମପୁର ୨୨/୧୦: ଆଇନଜୀବୀ ତଥା ବିଜେପି ନେତା ପୀତବାସ ପଣ୍ଡା ହତ୍ୟାକାଣ୍ଡ ମାମଲା । ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କୁ ଉଠାଇ ନେଲା ପୋଲିସ । ବିଳମ୍ବିତ ରାତିରେ ବିକ୍ରମ ପଣ୍ଡାଙ୍କୁ ଉଠାଇ ନେଇ ଜେରା କରୁଛି ପୋଲିସ । ଅଜ୍ଞାତ ସ୍ଥାନରେ ରଖି ପଚରାଉଚରା କରୁଥିବା ସୂଚନା ରହିଛି । ଏହାସହ ସାର୍ପସୁଟର୍ ସହ ଜଣେ ଛାତ୍ରନେତା ବି ଅଟକ ସୂଚନା । 

ସୂଚନା ଥାଉକି, ମଙ୍ଗଳବାର ଗତକାଲି ରାତିରେ ତାଙ୍କୁ ପୋଲିସର ଏକ ସ୍ୱତନ୍ତ୍ର ଟିମ ଆସି ଡାକି ନେଇଥିବା ସୂଚନା ମିଳିଛି । ବିଳମ୍ବିତ ରାତି ଯାଏଁ ତାଙ୍କୁ ଜେରା କରାଯାଇଛି ।  ଏହି ମାମଲାରେ ପୂର୍ବରୁ ଜଣେ କର୍ପୋରେଟର ଓ ବରିଷ୍ଠ ନେତାଙ୍କୁ ପୋଲିସ ଅଟକ ରଖିଛି । ହେଲେ ହାଇପ୍ରୋଫାଇଲ ହତ୍ୟାକାଣ୍ଡର ରହସ୍ୟ ଭେଦି ପାରିନି ପୁଲିସ । ଏହାରି ଭିତରେ ପୂର୍ବତନ ବିଧାୟକ ଶ୍ରୀ ପଣ୍ଡାଙ୍କୁ ପୁଲିସର ପଚରାଉଚୁରା ଚର୍ଚ୍ଚାର ବିଷୟ ହୋଇଛି । ଘନଘନ ତଦନ୍ତ, ତୁହାକୁ ତୁହା ଜେରା ।

ରାଜନେତାଙ୍କଠାରୁ ଆରମ୍ଭ କରି ସେମାନଙ୍କ ସମର୍ଥକ, ଛାତ୍ରନେତା, କର୍ପୋରେଟର୍‌, ଅପରାଧୀଙ୍କୁ ଉଠାଇ ଆଣି ମାରାଥନ୍‌ ଜେରା ମଧ୍ୟ ହୋଇଛି । ୧୫ ଦିନର ଅନୁସନ୍ଧାନ ଓ ଜେରା ଭିତରେ ପୋଲିସ ତଦନ୍ତ ଅନ୍ତିମ ପର୍ଯ୍ୟାୟରେ । ଶେଷ ଲିଙ୍କ୍‌ରେ ତଦନ୍ତ । ଆଉ ମାତ୍ର ଦିନେ କି ଦୁଇ ଦିନର ସମୟ । ଏହା ଭିତରେ ମାମଲାର ପର୍ଦ୍ଦାଫାସ୍‌ ହେବ ।

ଏ ସମ୍ପର୍କରେ ଦକ୍ଷିଣାଞ୍ଚଳ ଆଇଜି ନୀତି ଶେଖର ଗଣମାଧ୍ୟମରେ କହିଥିବାବେଳେ ଆଇନଜୀବୀ ତଥା ବିଜେପି ନେତା ପୀତବାସ ହତ୍ୟା ମାମଲାର ଖୁବ୍‌ଶୀଘ୍ର ଖୁଲାସା ହୋଇଯିବା ଆଶା ପ୍ରକାଶ ପାଇଛି । ଏହି ହତ୍ୟା ପଛରେ ଦୀର୍ଘଦିନର ରାଜନୈତିକ ଶତ୍ରୁତା କାରଣ ବୋଲି ମଧ୍ୟ ପୋଲିସ ସନ୍ଦେହ କରୁଛି । ସେପଟେ ଏହି ଖବର ପାଇବା କ୍ଷଣି ଦଳୀୟ କର୍ମୀମାନେ ଥାନାମୁହାଁ ହୋଇଛନ୍ତି । ଅପରପକ୍ଷରେ ଦିଗପହଣ୍ଡିର ଜଣେ ଫେରାର ଅପରାଧୀ ଉପରେ ପୋଲିସର ସମସ୍ତ ନଜର କେନ୍ଦ୍ରୀଭୂତ ହୋଇଛି ।

ସେ ୨/୩ ଥର ଚକ୍‌ମା ଦେଇ ଖସିଯିବାରେ ସଫଳ ହୋଇଛନ୍ତି । ତେବେ ତାଙ୍କର ଜଣେ ସହଯୋଗୀ ଆଇନଜୀବୀଙ୍କୁ ଭୁବନେଶ୍ୱରରୁ ଉଠାଯାଇଥିବା କୁହାଯାଉଛି । ଗିରଫ ହୋଇଥବା ଜଣେ ଅପରାଧୀର ବୟାନକୁ ଭିତ୍ତି କରି ପୁରୀ ବେଳାଭୂମି ବାଲିରୁ ଏକ ବନ୍ଧୁକ ଜବତ ହୋଇଥିବା ସୂଚନା ମିଳିଛି । କୁହାଯାଉଛି ଏହି ବନ୍ଧୁକ ହତ୍ୟାରେ ବ୍ୟବହୃତ ହୋଇଥିଲା । ତେବେ ସବୁକିଛି ପୋଲିସ ତଦନ୍ତ ପରେ ସ୍ପଷ୍ଟ ହେବ ।