ନୂଆଦିଲ୍ଲୀ ୨୯।୮: ଭାରତ ଉପରେ ଟ୍ରମ୍ପଙ୍କ ୫୦% ଟାରିଫ ଲଗାଇବାର କାରଣ ଏବେ ସାମ୍ନାକୁ ଆସିଛି। ଏ ନେଇ ଜେଫରିଜ ବ୍ୟାଙ୍କ ଏକ ରିପୋର୍ଟ ଜାରି କରିଥିବା ବେଳେ ଅସଲ କାରଣ ପଦାକୁ ଆସିଛି। ପହଲଗାମ ଆତଙ୍କୀ କାଣ୍ଡ ପରେ ପାକିସ୍ତାନକୁ ପାନେ ବୁଦ୍ଧି ଚଖେଇଛି ଭାରତ। ଏହି କାର୍ଯ୍ୟାନୁଷ୍ଠାନରେ ଭାରତ ପାକିସ୍ତାନ ଭିତରେ ଥିବା ଅନେକ ଆତଙ୍କବାଦୀ ଆଡ୍ଡା ଧ୍ୱଂସ୍ତ କରିଥିଲା। ଆତଙ୍କବାଦୀ ଆଡ୍ଡା ନଷ୍ଟ ହେବାରୁ ଭାରତ ବିରୋଧରେ ପାକ୍ ଯୁଦ୍ଧକୁ ଓହ୍ଲାଇ ଆସିଥିଲା।
ତେବେ ଭାରତର ସାମରିକ ରଣନୀତି ଆଗରେ ପାକିସ୍ତାନ ଆଣ୍ଠେଇ ପଡିଥିଲା ଓ ଯୁଦ୍ଧବିରାମ ନିବେଦନ କରିବାରୁ ସିଜଫାୟାର ହୋଇଛି। ଏହି ସିଜଫାୟାର ମଧ୍ୟରେ ଟ୍ରମ୍ପଙ୍କ ମଧ୍ୟସ୍ଥତାର କଥା ମଧ୍ୟ ଉଠିଥିଲା। ତେବେ ଭାରତ ଏହାକୁ ଅସ୍ୱୀକାର କରିଦେଇଥିଲା। ଏହା ପରେ ଭାରତକୁ ନେଇ ଟ୍ରମ୍ପଙ୍କ ମନବୃତ୍ତି ବଦଳି ଯାଇଛି ଓ ସେ ଭାରତୀୟ ରପ୍ତାନୀ ଉପରେ ୫୦% ଟାରିଫ ଲଗାଇଛନ୍ତି।
ଏହାକୁ ନେଇ ଜେଫରିଜ ବ୍ୟାଙ୍କ କହିଛି ଯେ ଯୁଦ୍ଧରେ ଟ୍ରମ୍ପଙ୍କୁ ମଧ୍ୟସ୍ଥତା ନିମନ୍ତେ ଅନୁମତି ଦିଆଯାଇନଥିଲା, ଏଣୁ ସେ ୫୦% ଟାରିଫ ଲାଗୁ କରିଛନ୍ତି। ଜେଫରିଜ ରିପୋର୍ଟ ଅନୁସାରେ ଭାରତ ଉପରେ ଏତେ ଅଧିକ ଟାରିଫ ଟ୍ରମ୍ପଙ୍କ ଅସନ୍ତୋଷ ଯୋଗୁ ଲାଗିଛି। ସେ ମେ ମାସରେ ଦୁଇ ଦେଶଙ୍କ ମଧ୍ୟରେ ଜାରି ବିବାଦରେ ହସ୍ତକ୍ଷେପ କରିବା ବୋଲି ଆଶା ବାନ୍ଧିଥିଲେ। ହେଲେ ଭାରତ ଓ ପାକିସ୍ତାନ ମଧ୍ୟରେ ଦୀର୍ଘ ସମୟରୁ ଚାଲିଆସୁଥିବା ତିକ୍ତତାକୁ ସମାପ୍ତ କରିବା ପାଇଁ ଭୂମିକା ନିର୍ବାହ ନିମନ୍ତେ ତାଙ୍କୁ ଭାରତ ଅନୁମତି ଦେଇ ନଥିଲା।
ଭାରତ କହିଥିଲା ଯେ ପାକିସ୍ତାନ ସହ ଯୁଦ୍ଧରେ ଅନ୍ୟ କୌଣସି ଦେଶର ଆମେ ହସ୍ତକ୍ଷେପ ଚାହୁଁ ନାହୁଁ। କେବଳ ଏତିକି ନୁହେଁ ଅନେକ ଅବସରରେ ଟ୍ରମ୍ପ ଭାରତ-ପାକିସ୍ତାନ ବିବାଦ ସହ ବିଶ୍ୱର ଅନେକ ଯୁଦ୍ଧକୁ ସମାପ୍ତ କରିଥିବା ଦାବି କରନ୍ତି। ଏଣୁ ହ୍ୱାଇଟ୍ ହାଉସ ରାଷ୍ଟ୍ରପତିଙ୍କୁ ନୋବେଲ ଶାନ୍ତି ପୁରସ୍କାର ମିଳୁ ବୋଲି ଦାବି କରୁଛି। ତେବେ ଭାରତ ଆମେରିକା କଥାରେ ରାଜି ନ ହେବା ଯୋଗୁ ଟ୍ରମ୍ପ ପ୍ରଥମେ ୨୫% ଟାରିଫ ଲାଗୁ କରିଥିଲେ। ଏହା ପରେ ସେ ଋଷିଆରୁ ତୈଳ କ୍ରୟକୁ ନେଇ ଅସନ୍ତୋଷ ପ୍ରକାଶ କରି ଆଉ ୨୫% ଟାରିଫ ଲାଗୁ କରିଛନ୍ତି। ଅର୍ଥାତ ଭାରତ ଉପରେ ମୋଟ ୫୦% ଟାରିଫ ଲାଗୁ ହୋଇଛି। ଟ୍ରମ୍ପଙ୍କ ଏହି ମନବୃତ୍ତିକୁ କେତେକ ଦେଶ ସମାଲୋଚନା କରିଛନ୍ତି। ଭାରତ ମଧ୍ୟ ଏହାକୁ ସମାଲୋଚନା କରି ତାଙ୍କର ଏପରି ମନବୃତ୍ତିକୁ ଅନୁଚିତ ବୋଲି କହିଛି।
