ବାତ୍ୟା ‘ଡିଟଓ୍ବା’ ପ୍ରଭାବ; ଶ୍ରୀଲଙ୍କାରେ ଗଲାଣି ୧୩୨ ଜଣକ ଜୀବନ, ରାଷ୍ଟ୍ରପତି ଲୋଡ଼ିଲେ ଅନ୍ତର୍ଜାତୀୟ ସହାୟତା

ନୂଆଦିଲ୍ଲୀ: ବାତ୍ୟା ‘ଡିଟଓ୍ବା’ ପ୍ରଭାବରେ ଶ୍ରୀଲଙ୍କାରେ ପ୍ରବଳ ବର୍ଷା ଜାରି ରହିଛି। ଏପର୍ଯ୍ୟନ୍ତ ବର୍ଷା ଏବଂ ବନ୍ୟା ଯୋଗୁ ୧୩୨ ଜଣକ ମୃତ୍ୟୁ ହୋଇଥିବାବେଳେ ୧୭୬ ନିଖୋଜ ହୋଇଛନ୍ତି। ବିପର୍ଯ୍ୟୟ ପରିଚାଳନା କେନ୍ଦ୍ର (ଡିଏମସି)ର ସୂଚନା ଅନୁସାରେ, ବାତ୍ୟା ଯୋଗୁ ୧୫ ହଜାର ଘର ନଷ୍ଟ ହୋଇଛି ଏବଂ ୭୮ ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି।

ଏଭଳି ସ୍ଥିତିରେ ଶନିବାର ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାର ଦିଶାନାୟକେ ଜରୁରୀ ପରିସ୍ଥିତି ଘୋଷଣା କରିଛନ୍ତି ଏବଂ ଅନ୍ତର୍ଜାତୀୟ ସହାୟତା ଲୋଡ଼ିଛନ୍ତି। ଏହାଦ୍ବାରା ତାଙ୍କୁ ଶ୍ରୀଲଙ୍କାରେ ଏକ ସପ୍ତାହ ପର୍ଯ୍ୟନ୍ତ କ୍ଷୟକ୍ଷତିର ମୁକାବିଲା ପାଇଁ ବ୍ୟାପକ ଅଧିକାର ମିଳିଯାଇଛି। ସେହିଭଳି ବିଦେଶରେ ରହୁଥିବା ଶ୍ରୀଲଙ୍କାବାସୀଙ୍କୁ ସହାୟତା ପାଇଁ ଦାନ ଦେବାକୁ ମଧ୍ୟ ଅନୁରୋଧ କରିଛନ୍ତି ରାଷ୍ଟ୍ରପତି।  ଡିଏମସି ମହାନିର୍ଦ୍ଦେଶକ ସମ୍ପତ କୋଟୁବେଗାଡ଼ା କହିଛନ୍ତି, ଏପର୍ଯ୍ୟନ୍ତ ୧୩୨ ଜଣକ ମୃତ୍ୟୁ ହୋଇଛି, ୧୭୬ ଜଣକ ନିଖୋଜ ଅଛନ୍ତି। ସେ ଏହା ମଧ୍ୟ କହିଛନ୍ତି ଯେ, ସେନା, ନୌସେନା ଏବଂ ବାୟୁ ସେନା ଉଦ୍ଧାର କାର୍ଯ୍ୟ ତ୍ବରାନ୍ବିତ କରିଛନ୍ତି।

ଆହୁରି ମଧ୍ୟ ଜଣାପଡ଼ିଛି ଯେ, କଲୋମ୍ବୋ ଠାରୁ ୧୧୫ କିଲୋମିଟର ପୂର୍ବରେ କ୍ୟାଣ୍ଡିର ମଧ୍ୟ ଜିଲ୍ଲାରେ ଭୂସ୍ଖଳନ ହୋଇଛି। ଏଥିରେ ମୁଖ୍ୟ ରାସ୍ତାର ଅନେକ ସ୍ଥାନ ଜଳମଗ୍ନ ହୋଇଛି। ତଳିଆ ଅଞ୍ଚଳରେ ବନ୍ୟା ଯୋଗୁ ସ୍ଥିତି ଆହୁରି ଖରାପ ହୋଇଛି। ଅଧିକାରୀ କେଲାନୀ ନଦୀର କୂଳରେ ରହୁଥିବା ନିବାସୀଙ୍କୁ ସୁରକ୍ଷିତ ସ୍ଥାନକୁ ଉଦ୍ଧାର କରିବାକୁ ନିର୍ଦ୍ଦେଶ ଦେଇଛନ୍ତି। ଅବଶ୍ୟ ରାଜଧାନୀ ସମେତ ଦେଶର ଅଧିକାଂଶ ସ୍ଥାନରେ କମ୍ ବର୍ଷ ହୋଇଛି। କିନ୍ତୁ ଉତ୍ତର ଅଞ୍ଚଳରେ ବାତ୍ୟା ପ୍ରଭାବରୁ ବର୍ଷା ଲାଗି ରହିଛି।

ସେପଟେ ଭାରତ ଦୁଇ ବିମାନରେ ରିଲିଫ୍ ସାମଗ୍ରୀ ପଠାଇଛି। ପୂର୍ବରୁ କଲୋମ୍ବୋରେ ଥିବା ଏକ ଭାରତୀୟ ଯୁଦ୍ଧପୋତ ମଧ୍ୟ ପୀଡ଼ିତଙ୍କ ସହାୟତା ପାଇଁ ନିଜର ରାସନ ଦାନ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ୍ସରେ ଏକ ପୋଷ୍ଟ କରି ମୃତକଙ୍କ ପାଇଁ ଶୋକ ବ୍ୟକ୍ତ କରିଛନ୍ତି ଏବଂ ଶ୍ରୀଲଙ୍କା ପ୍ରତି ସହଯୋଗ ଯୋଗାଇ ଦେବା କଥା କହିଛନ୍ତି। ସେ ଏହା ଉପରେ ମଧ୍ୟ ଜୋର ଦେଇଛନ୍ତି ଯେ, ଭାରତ ଏହି ଅଭିଯାନ ଅନୁସାରେ ତୁରନ୍ତ ରିଲିଫ୍ ସାମଗ୍ର ଏବଂ ମହତ୍ବପୂର୍ଣ୍ଣ ମାନବୀୟ ସହାୟତା ପଠାଇଥିଲା।

ସୂଚନାଯୋଗ୍ୟ, ଏହି ବାତ୍ୟା ୨୦୧୭ ପରେ ଶ୍ରୀଲଙ୍କାର ସବୁଠୁ ବିପଜ୍ଜନକ ପ୍ରାକୃତିକ ବିପର୍ଯ୍ୟୟ। ବନ୍ୟା ଏବଂ ଭୂସ୍ଖଳନ ୨୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା ଏବଂ ଲକ୍ଷ ଲକ୍ଷ ଲୋକଙ୍କୁ ବାସହରା ହେବାକୁ ପଡ଼ିଥିଲା।