ନୂଆଦିଲ୍ଲୀ ୨୮।୮: ଆମେରିକା ପକ୍ଷରୁ ଭାରତୀୟ ରପ୍ତାନୀ ଉପରେ ୫୦% ଟାରିଫ ଲାଗୁ କରାଯାଇଛି। ତେବେ ଏହି ଟାରିଫକୁ ଟାଳି ଭାରତ ସେପ୍ଟେମ୍ବର ମାସରେ ଋଷିଆରୁ କ୍ରୁଡ ଅଏଲ ଆମଦାନୀ ବଢାଇବାକୁ ଯାଉଛି। ରୟଟର୍ସ ରିପୋର୍ଟ ଅନୁସାରେ ରିଲାଏନ୍ସ ଇଣ୍ଡଷ୍ଟ୍ରିଜ୍ ଓ ନାୟେରା ଏନର୍ଜୀ ଅଗଷ୍ଟମାସ ତୁଳନାରେ ସେପ୍ଟେମ୍ବରରେ ୧୦-୨୦% ଅଧିକ ତୈଳ ଆମଦାନୀ କରିପାରନ୍ତି। ଏହାର ଅର୍ଥ ହେଉଛି ଏବେ ଦୈନିକ ଏକରୁ ଦେଢଲକ୍ଷ ବ୍ୟାରଲ ଏକ୍ସଟ୍ରା ଅଏଲ ଆମଦାନୀ ହେବ।
ୟୁକ୍ରେନର ଡ୍ରୋନ ଆକ୍ରମଣ ଯୋଗୁ ଋଷିଆର କେତେକ ଅଏଲ ରିଫାଇନାରୀ ଜଳି ଯାଇଛି। ସେ ସବୁ ରିଫାଇନାରୀରେ ପୂର୍ବ ଭଳି ତୈଳ ସୋଧନ ହୋଇ ପାରୁ ନାହିଁ। ରିଫାଇନାରୀ ପ୍ରଭାବିତ ହେବା ଯୋଗୁ ଋଷୀୟ ଉତ୍ପାଦକଙ୍କ ନିମନ୍ତେ ଏବେ ତୈଳ ସୋଧନ ଅସମ୍ଭବ ହୋଇ ପଡିଛି। ଏଣୁ ଅଧିକମାତ୍ରାରେ କ୍ରୁଡ ବିକ୍ରି ନିମନ୍ତେ ଦର ହ୍ରାସ କରାଯାଇ ପାରେ। ବର୍ତ୍ତମାନ ପରିସ୍ଥିତିରେ ଯଦି ଋଷିଆରୁ ତୈଳ ଆମଦାନୀ ଭାରତ ବନ୍ଦ କରିଦିଏ ତେବେ ଋଷିଆକୁ ତୈଳ ବିକ୍ରି ପାଇଁ ସମସ୍ୟାର ସମ୍ମୁଖୀନ ହେବାକୁ ପଡିବ।
ଯଦି ଏପରି କିଛି ହୁଏ ତେବେ ଋଷିଆର ଆୟ ଉପରେ ପ୍ରଭାବ ପଡିବ, ଯାହା ଋଷିଆର ସରକାରୀ ବଜେଟ୍ ଓ ୟୁକ୍ରେନ ବିରୋଧରେ ଜାରି ଯୁଦ୍ଧ ଲାଗି ସମସ୍ୟା ସୃଷ୍ଟି କରିବ। ତେବେ ଏ ନେଇ ରିଲାଏନ୍ସ ଇଣ୍ଡଷ୍ଟ୍ରିଜ, ନାୟରା ଏନର୍ଜୀ ଅଥବା ପେଟ୍ରୋଲିୟମ ମନ୍ତ୍ରାଳୟ ପକ୍ଷରୁ ଅଧିକାରୀକ ଭାବେ କିଛି କୁହାଯାଇ ନାହିଁ। ୨୦୨୨ ୟୁକ୍ରେନ ଯୁଦ୍ଧ ପରେ ଆମେରିକା ଓ ୟୁରୋପୀୟ ସଂଘ (ଇୟୁ) ଋଷିଆ ଉପରେ କଟକଣା ଜାରି କରିଛନ୍ତି। ଏହା ପରେ ଭାରତ ଋଷୀୟ ତୈଳର ବଡ଼ କ୍ରେତା ପାଲଟିଛି।
ତେବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତର ଏହି ପଦକ୍ଷେପକୁ ସମାଲୋଚନା କରିଛନ୍ତି ଓ ଋଷୀୟ ତୈଳ ଏବଂ ଅସ୍ତ୍ର ଶସ୍ତ୍ର କ୍ରୟ ଯୋଗୁ ଭାରତ ଉପରେ ୫୦% ଟାରିଫ ଲାଗୁ କରିଛନ୍ତି। ଅନ୍ୟପଟେ ଭାରତ ସରକାର ଆଲୋଚନା ମାଧ୍ୟମରେ ଟାରିଫ ସମସ୍ୟାର ସମାଧାନର ବାଟ ଖୋଜୁଛନ୍ତି। ଏପରି ସମୟରେ ଭାରତର ପ୍ରଧାନମନ୍ତ୍ରୀ ଋଷିଆ ରାଷ୍ଟ୍ରପତିଙ୍କୁ ଭେଟି କୁଟନୈତିକ ସମ୍ବଦ୍ଧକୁ ମଜଭୁତ କରିବାକୁ ଉଦ୍ୟମ କରୁଛନ୍ତି।
ଗତ ଦିନରେ ୟୁକ୍ରେନ ଋଷିଆର ୧୦ଟି ରିଫାଇନାରୀ ଉପରେ ଆକ୍ରମଣ କରିଛି। ଫଳରେ ଋଷିଆର ୧୭% ତୈଳ ସୋଧନ କ୍ଷମତା ହ୍ରାସ ହୋଇଛି। ଏଣୁ ଋଷିଆ ନିକଟରେ ଏବେ ବିପୁଳ କ୍ରୁଡ ବଞ୍ଚୁଛି, ଯାହାକୁ ସେ ରପ୍ତାନୀ କରିବାକୁ ଚାହୁଁଛି। ଭୋର୍ଟେକ୍ସା ତଥ୍ୟ ଅନୁସାରେ ଅଗଷ୍ଟମାସର ପ୍ରଥମ ୨୦ ଦିନ ଭାରତ ଦୈନିକ ୧୫ଲକ୍ଷ ବ୍ୟାରଲ ଋଷୀୟ କ୍ରୁଡ ଆମଦାନୀ କରିଛି। ଯଦିଓ ଏହା ଜୁଲାଇର ଆମଦାନୀ ସହ ସମାନ ତେବେ ତେବେ ଜାନୁୟାରୀ-ଜୁନ ଆମଦାନୀଠାରୁ କମ। ଭାରତ ଏବେ ସମୁଦ୍ର ରାସ୍ତାରେ ଋଷିଆ ତୈଳର ସବୁଠୁ ବଡ଼ କ୍ରେତା ପାଲଟିଛି । ଏହା ଭାରତର ମୋଟ ତୈଳ ଆବଶ୍ୟକତାର ୪୦%।
