ମୋବାଇଲ ଡାଟା ଭଳି ଶସ୍ତା ହେବ AI: ନୂଆଦିଲ୍ଲୀରେ ଆୟୋଜିତ ଏଆଇ ସମିଟରେ ମୁକେଶ ଅମ୍ବାନୀଙ୍କ ଘୋଷଣା

ନୂଆଦିଲ୍ଲୀ: ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ଼ର ଅଧ୍ୟକ୍ଷ ମୁକେଶ ଅମ୍ବାନୀ ଇଣ୍ଡିଆ ଏଆଇ ଇମ୍ପାକ୍ଟ ସମିଟ୍‌ରେ ଘୋଷଣା କରିଛନ୍ତି ଯେ, ଜିଓ ଯେଉଁଭଳି ଭାବରେ ଦେଶରେ ଡାଟାକୁ ଶସ୍ତା କରିଥିଲା, ଠିକ ସେହିପରି ଏବେ କୃତ୍ରିମ ବୁଦ୍ଧିମତ୍ତା (ଆର୍ଟିଫିସିଆଲ ଇଣ୍ଟେଲିଜେନ୍ସ)କୁ ମଧ୍ୟ ସାଧାରଣ ଭାରତୀୟଙ୍କ ପାଖରେ ସୁଲଭ ଦରରେ ଉପଲବ୍ଧ କରାଯିବ। ଏଥିସହିତ ସେ କହିଛନ୍ତି ଯେ, 'ଭାରତ ବୁଦ୍ଧିମତ୍ତାକୁ ଭଡାରେ ନେଇପାରିବ ନାହିଁ' ଏବଂ ଜିଓ ଦେଶକୁ ଇଣ୍ଟରନେଟ୍ ଯୁଗ ପରେ ବର୍ତ୍ତମାନ 'ଇଣ୍ଟେଲିଜେନ୍ସ ଯୁଗ' ସହିତ ଯୋଡ଼ିବ।

ଏହି ଦିଗରେ ଜିଓ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ୍ ଆଗାମୀ ସାତ ବର୍ଷରେ ୧୦ ଲକ୍ଷ କୋଟି ଟଙ୍କା ନିବେଶ କରିବେ। ଏହି ନିବେଶ ଭାରତରେ ଶକ୍ତିଶାଳୀ ଏଆଇ ଭିତ୍ତିଭୂମି ସୃଷ୍ଟି କରିବା ସହ ଆଗାମୀ ଦଶକଗୁଡିକ ପାଇଁ ଆର୍ଥିକ ଦୃଢ଼ତା ସୁନିଶ୍ଚିତ କରିବାର ଉଦ୍ଦେଶ୍ୟରେ କରାଯିବ ବୋଲି ସେ କହିଛନ୍ତି।

କମ୍ପାନୀ ଜାମନଗରରେ ପର୍ଯ୍ୟୟକ୍ରମେ ମଲ୍ଟି-ଗିଗାୱାଟ୍ ଏଆଇ-ରେଡି ଡାଟା ସେଣ୍ଟର ପାର୍କ ବିକଶିତ କରୁଛି। ୨୦୨୬ ଶେଷ ମଧ୍ୟରେ ୧୨୦ ମେଗାୱାଟ୍ କ୍ଷମତା ଆରମ୍ଭ କରିବାର ଲକ୍ଷ୍ୟ ରହିଛି, ଯାହାକୁ ପରବର୍ତ୍ତୀକାଳରେ ଗିଗାୱାଟ୍ ସ୍ତର ପର୍ଯ୍ୟନ୍ତ ବଢ଼ାଯିବ। ଏହି ସମ୍ପୂର୍ଣ୍ଣ ଭିତ୍ତିଭୂମି ସବୁଜ ଶକ୍ତି (ଗ୍ରିନ୍ ଏନର୍ଜି) ଉପରେ ଆଧାରିତ ହେବ। ସେହିପରି ଜିଓ ଏହାର ନେଟୱର୍କ ଜରିଆରେ ସମଗ୍ର ଦେଶରେ ଏଭଳି କମ୍ପ୍ୟୁଟିଂ କ୍ଷମତା ଉପଲବ୍ଧ କରାଇବ, ଯାହା ଦ୍ୱାରା ଏଆଇ ସେବାଗୁଡିକ ଅଳ୍ପ ଖର୍ଚ୍ଚରେ ଏବଂ ଦ୍ରୁତ ଗତିରେ ଲୋକମାନଙ୍କ ପାଖରେ ତଥା ଦୋକାନ, କ୍ଷୁଦ୍ର ବ୍ୟବସାୟ, ସ୍କୁଲ୍, ହସ୍ପିଟାଲ୍ ଓ ଚାଷଜମି ପର୍ଯ୍ୟନ୍ତ ପହଞ୍ଚିପାରିବ।

ଅମ୍ବାନୀ ଜୋର ଦେଇ କହିଛନ୍ତି ଯେ ଜିଓ ଏଆଇ ଭାରତୀୟ ଭାଷାମାନଙ୍କରେ କାମ କରିବ, ଯାହା ଫଳରେ ଚାଷୀ, ଯୁବକ, ଛାତ୍ରଛାତ୍ରୀ ଓ ଛୋଟ ବ୍ୟବସାୟୀମାନେ ନିଜ ଭାଷାରେ ଏହାର ଲାଭ ନେଇପାରିବେ। ଏହି କ୍ରମରେ ଶିକ୍ଷା ପାଇଁ ଜିଓ ଶିକ୍ଷା ଏଆଇ, ସ୍ୱାସ୍ଥ୍ୟ ପାଇଁ ଜିଓ ଆରୋଗ୍ୟ ଏଆଇ, କୃଷି ପାଇଁ ଜିଓ କୃଷି ଏବଂ ସାଧାରଣ ବ୍ୟବହାର ପାଇଁ ଜିଓ ଭାରତ ଆଇକ୍ୟୁ ପରି ପ୍ଲାଟଫର୍ମ ପ୍ରସ୍ତୁତ କରାଯାଇଛି, ଯାହା ସ୍ଥାନୀୟ ଭାଷାରେ ଏଆଇ ଆଧାରିତ ସହାୟତା ଉପଲବ୍ଧ କରାଇବ।

ମୁକେଶ ଅମ୍ବାନୀ ବିଶ୍ୱାସ ବ୍ୟକ୍ତ କରିଛନ୍ତି ଯେ, ଯଦି ପ୍ରଯୁକ୍ତି ସୁଲଭ ଏବଂ ଦେଶର ଆବଶ୍ୟକତା ଅନୁରୂପ ବିକଶିତ କରାଯିବ ତେବେ ଭାରତ ଏକବିଂଶ ଶତାବ୍ଦୀରେ ଅଗ୍ରଣୀ ଏଆଇ ଶକ୍ତି ହୋଇପାରିବ। ଜିଓର ଏହି ଘୋଷଣାଗୁଡିକରୁ ସଂକେତ ମିଳୁଛି ଯେ, କନେକ୍ଟିଭିଟି ପରେ ବର୍ତ୍ତମାନ କମ୍ପାନୀ ଏଆଇକୁ ପରବର୍ତ୍ତୀ ଜାତୀୟ ଭିତ୍ତିଭୂମି ଭାବେ ଗଢ଼ି ତୋଳିବା ଦିଗରେ ଆଗକୁ ବଢୁଛି।

ଏଆଇ କୁ ନେଇ ଆସୁଥିବା ଚିନ୍ତାଗୁଡିକ ବିଷୟରେ ମୁକେଶ ଅମ୍ବାନୀ କହିଛନ୍ତି ଯେ, "ଏଆଇ ସେହି ମନ୍ତ୍ର ଯାହା ପ୍ରତ୍ୟେକ ଯନ୍ତ୍ରକୁ ଦ୍ରୁତ, ଉତ୍ତମ ଓ ସ୍ମାର୍ଟ ଉପାୟରେ କାମ କରିବାର ଶକ୍ତି ଦେଇଥାଏ। ମୁଁ ଏଆଇକୁ ଆଧୁନିକ ‘ଅକ୍ଷୟ ପାତ୍ର’ ଭାବେ ଦେଖୁଛି, ଯାହା ଅସରନ୍ତି ପୋଷଣ ପ୍ରଦାନ କରିପାରିବ। ଏଆଇ ନିଯୁକ୍ତି ନେବ ନାହିଁ, ବରଂ ଉଚ୍ଚ-ଦକ୍ଷତା ବିଶିଷ୍ଟ କାର୍ଯ୍ୟକ୍ଷେତ୍ରରେ ନୂଆ ସୁଯୋଗ ସୃଷ୍ଟି କରିବ।

ନିଜ ସମ୍ବୋଧନର ପ୍ରାରମ୍ଭରେ ମୁକେଶ ଅମ୍ବାନୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭିଜନକୁ ପ୍ରଶଂସା କରି କହିଛନ୍ତି ଯେ, ଏଆଇ-ଆଧାରିତ ବିକାଶର ଏହି ପଦକ୍ଷେପ ୨୦୪୭ ମଧ୍ୟରେ ଭାରତକୁ ବିକଶିତ ରାଷ୍ଟ୍ର କରିବାର ଜାତୀୟ ଲକ୍ଷ୍ୟକୁ ନୂତନ ଗତି ଦେବ। ସେ କହିଛନ୍ତି ଯେ, ଏହି ପଦକ୍ଷେପ କେବଳ ଭାରତ ପାଇଁ ନୁହେଁ, ବରଂ ଗ୍ଲୋବାଲ୍ ସାଉଥର ଦେଶମାନଙ୍କ ପାଇଁ ମଧ୍ୟ ଏକ ପ୍ରେରଣାଦାୟକ ମଡେଲ୍ ହୋଇପାରିବ।