ବରଗଡ଼ ଧନୁଯାତ୍ରା ୨୦୨୫: ସରିଲା କୃଷ୍ଣ- ବଳାରାମଙ୍କ ଭୂମିକା ପାଇଁ କଳାକାର ଚୟନ

ବରଗଡ଼: ଡିସେମ୍ବର ୨୪ରୁ ଆରମ୍ଭ ହେଉଛି ବିଶ୍ବ ପ୍ରସିଦ୍ଧ ବରଗଡ଼ ଧନୁଯାତ୍ରା। ଗତ ସୋମବାର ଧନୁଯାତ୍ରା ପାଇଁ ଶୁଭ ସ୍ତମ୍ଭ ସ୍ଥାପିତ ହୋଇଥିବାବେଳେ,  ଧନୁଯାତ୍ରାକୁ କିପରି ଅଧିକ ଆକର୍ଷଣୀୟ କରାଯାଇପାରିବ ସେନେଇ କଳାକାର ମଧ୍ୟ ନୂତନ ସଂଳାପ ଓ ନୂତନ ଅଭିନୟ ଦେଖାଇବା ପାଇଁ ଉତ୍ସାହିତ । ଏହାରି ମଧ୍ୟରେ ସରିଛି କୃଷ୍ଣ- ବଳରାମଙ୍କ ଚରିତ୍ର ପାଇଁ କଳାକାର ଚୟନ।

ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରାରେ ଗତ ବର୍ଷ ଭଳି ଚଳିତ ବର୍ଷ ମଧ୍ୟ କୃଷ୍ଣ ଭୂମିକାରେ ସ୍ୱପ୍ନିଲ ମହାପାତ୍ର ଅଭିନୟ କରିବେ। ସେହିଭଳି ବଳରାମଙ୍କ ଭୂମିକାରେ ଦିବ୍ୟାଂଶୁ ବିର୍ତ୍ତିଆ ଓ ରାଧାଙ୍କ ଭୂମିକାର ସାଇନା ପ୍ରଧାନ ଅଭିନୟ ପାଇଁ ସୁଯୋଗ ପାଇଛନ୍ତି। ଏହା ପୂର୍ବରୁ କଂସ ମହାରାଜଙ୍କ ଚରିତ୍ର ପାଇଁ ବରଗଡ଼ ଜିଲ୍ଲା ଭେଡେନ୍‌ ବ୍ଲକ ଚିଚିଣ୍ଡା ଗାଁର ସୁଶୀଲ ମେହେର ମନୋନୀତ ହୋଇଥିଲେ। ସେ ବିଶ୍ୱପ୍ରସିଦ୍ଧ ବରଗଡ଼ ଧନୁଯାତ୍ରାରେ ପ୍ରଥମ ଥର ପାଇଁ କଂସ ହେବାକୁ ଯାଉଛନ୍ତି। ପୂର୍ବରୁ ଦେବକୀ, ନାରଦ, ଚାଣୁର , ମୁଷ୍ଟିକ, ସାର୍ତ୍ତକି, ବସୁଦେବ , ଅକ୍ରୁର ଏବଂ ଉଗ୍ରସେନ, ମହାମନ୍ତ୍ରୀ ଓ ସେନାପତି ଭୂମିକା ପାଇଁ ମଧ୍ୟ କଳାକାର ଚୟନ ସରିଛି।

ଉଲ୍ଲେଖଯୋଗ୍ୟ, ଡିସେମ୍ବର ୨୪ ତାରିଖରୁ ଆରମ୍ଭ ହେବ ବିଶ୍ୱର ସର୍ବବୃହତ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା। ୧୧ ଦିନ ବ୍ୟାପୀ ଚାଲିବାକୁ ଥିବା ଏହି ଧନୁଯାତ୍ରା ୨୦୨୬ ମସିହା ଜାନୁଆରୀ ମାସ ୩ ତାରିଖରେ ଶେଷ ହେବ।