ନୂଆଦିଲ୍ଲୀ: ଅନ୍ୟାନ୍ୟ ଦେଶ ଭଳି ଭାରତ ଉପରେ ମଧ୍ୟ ଆମେରିକା ଲଗାଇଥିବା ପାଲଟା ଶୁଳ୍କକୁ ୯୦ ଦିନ ପର୍ଯ୍ୟନ୍ତ ସ୍ଥଗିତ ରଖିଲା ବୋଲି ଘୋଷଣା କରିଛି। ଏନେଇ ହ୍ୱାଇଟ୍ ହାଉସ୍ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି। ଏଥିରେ ଆମେରିକା ଚଳିତ ବର୍ଷ ଜୁଲାଇ ୯ ତାରିଖ ପର୍ଯ୍ୟନ୍ତ ୯୦ ଦିନ ପାଇଁ ଭାରତ ଉପରେ ପାଲଟା ଶୁଳ୍କକୁ ସ୍ଥଗିତ ରଖିଲା ବୋଲି ଘୋଷଣା କରାଯାଇଛି।
ଏପ୍ରିଲ ୨ ତାରିଖରେ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରାୟ ୬୦ଟି ଦେଶ ଉପରେ ସାର୍ବଜନୀନ ଶୁଳ୍କ ଘୋଷଣା କରିଥିଲେ। ଭାରତ ଉପରେ ବି ଅତିରିକ୍ତ ଶୁଳ୍କ ଲଗାଇଥିଲା ଆମେରିକା। ଫଳରେ ଭାରତର ଚିଙ୍ଗୁଡ଼ି ରପ୍ତାନୀ ଠାରୁ ଷ୍ଟୀଲ ପର୍ଯ୍ୟନ୍ତ ପ୍ରଭାବିତ ହେବାର ଆଶଙ୍କା ରହିଥିଲା। ଟ୍ରମ୍ପଙ୍କର ଏହି ପଦକ୍ଷେପର ଲକ୍ଷ୍ୟ ଥିଲା ଆମେରିକାର ବାଣିଜ୍ୟ ନିଅଣ୍ଟ ହ୍ରାସ କରିବା ଏବଂ ଘରୋଇ ଉତ୍ପାଦନକୁ ବୃଦ୍ଧି କରିବା।
ପଢନ୍ତୁ- ଟିଭି, ଫ୍ରିଜ୍ ଓ ସ୍ମାର୍ଟଫୋନ୍ ହେବ ଶସ୍ତା: ଶୁଳ୍କ ଭୟରେ ଭାରତକୁ ଇଲେକ୍ଟ୍ରୋନିକ୍ସ ଉପରେ ଡିସ୍କାଉଣ୍ଟ ଅଫର କଲା ଚୀନ
ଆମେରିକା ଭାରତ ଉପରେ ୩୬ ପ୍ରତିଶତ ଶୁଳ୍କ ଲଗାଇଥିଲା। ହେଲେ ଏହାର ପଡ଼ୋଶୀ ଥାଇଲାଣ୍ଡ,ଭିଏତନାମ ଓ ଚୀନ ଉପରେ କିନ୍ତୁ ବହୁ ଅଧିକ ଶୁଳ୍କ ଘୋଷଣା କରିଥିଲେ ଟ୍ରମ୍ପ। ତେବେ ଗତକାଲି(ଏପ୍ରିଲ ୯) ଏହି ପାଲଟା ଶୁଳ୍କକୁ ୯୦ ଦିନ ପର୍ଯ୍ୟନ୍ତ ସ୍ଥଗିତ ରଖିବାକୁ ଟ୍ରମ୍ପ ନିର୍ଦ୍ଦେଶ ଦେଇଛନ୍ତି। ତେବେ ହଂକଂ, ମାକାଉ ଓ ଚୀନ୍ ପାଇଁ କିନ୍ତୁ ଶୁଳ୍କ ସ୍ଥଗିତ ରଖାଯାଇ ନାହିଁ। ବରଂ ଚୀନ ଉପରେ ଶୁଳ୍କକୁ ୧୨୬ ପ୍ରତିଶତ ବୃଦ୍ଧି କରିଦେଇଛନ୍ତି ଟ୍ରମ୍ପ।
ଭାରତ ଉପରେ ଶୁଳ୍କ ସ୍ଥିଗିତକୁ ୧୦ ଏପ୍ରିଲ, ୨୦୨୫ ଦିବା ୧୨:୦୧ରୁ ୯ ଜୁଲାଇ, ୨୦୨୫ ଦିବା ୧୨:୦୧ ପର୍ଯ୍ୟନ୍ତ ସ୍ଥଗିତ ରଖାଯାଇଛି ବୋଲି ହ୍ୱାଇଟ୍ ହାଉସ୍ ନିର୍ଦ୍ଦେଶରେ ଉଲ୍ଲେଖ ରହିଛି।
ପଢନ୍ତୁ- ଆଇଫୋନ ତିଆରି କରିବାକୁ ଏତିକି ଖର୍ଚ୍ଚ ହୁଏ? ହେଲେ ଟ୍ରମ୍ପଙ୍କ ଶୁଳ୍କ ପରେ ମହଙ୍ଗା ହୋଇଯିବ
ତଥାପି ଦେଶଗୁଡ଼ିକ ଉପରେ ଲାଗୁ ହୋଇଥିବା ୧୦ ପ୍ରତିଶତ ବେସଲାଇନ୍ ଟାରିଫ୍ ବଳବତ୍ତର ରହିବ। ଇଣ୍ଡିଆଟୁଡେ ରିପୋର୍ଟ ଅନୁସାରେ, ଇସ୍ପାତ, ଆଲୁମିନିୟମ (ମାର୍ଚ୍ଚ ୧୨ ରୁ କାର୍ଯ୍ୟକାରୀ), ଅଟୋ ଏବଂ ଅଟୋ ଉପାଦାନ (ଏପ୍ରିଲ ୩ ରୁ) ଉପରେ ୨୫ ପ୍ରତିଶତ ଶୁଳ୍କ ମଧ୍ୟ କାଏମ ରହିଛି।
ଭାରତୀୟ ରପ୍ତାନି ସଂଗଠନ ମହାନିର୍ଦ୍ଦେଶକ ଅଜୟ ସହାୟ କହିଛନ୍ତି ଯେ ସେମିକଣ୍ଡକ୍ଟର, ଔଷଧ ଏବଂ କିଛି ଏନର୍ଜି ପ୍ରଡକ୍ଟ ଶୁଳ୍କ ଛାଡ଼ ବର୍ଗରେ ରହିଛି। ତେବେ ଟ୍ରମ୍ପ ଖୁବ୍ଶୀଘ୍ର ଭାରତୀୟ ଫାର୍ମା ଉପରେ ମଧ୍ୟ ଶୁଳ୍କ ଲାଗୁ କରିବାକୁ ଯୋଜନା କରିଥିଲେ।
