ହାରିବା ପରେ ସମୀକ୍ଷା ଆରମ୍ଭ : ମଲ୍ଲିକାର୍ଜୁନ ଖଡଗେଙ୍କ ଘରେ ରାହୁଲଙ୍କ ବୈଠକ

ନୁଆଦିଲ୍ଲୀ, ୧୫|୧୧: ବିହାରରେ କଂଗ୍ରେସକୁ ଲାଗିଛି ଶକ୍ତ ଝଟକା । ଏତେ ବଡ ଜାତୀୟ ଦଳ ବିହାରରେ ଖାଇଛି ମାତ୍ । ଦଳର ମାତ୍ର ୬ ଜଣ ବିଧାୟକ ନିର୍ବାଚନରେ ବିଜୟ ଲାଭ କରିଛନ୍ତି । ଯାହାକୁ ନେଇ କଂଗ୍ରେସକୁ ସମାଲୋଚନା କରାଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କଠୁ ଆରମ୍ଭ କରି ଅନେକ ବିଜେପି ନେତା କଂଗ୍ରେସକୁ ଟାର୍ଗେଟ୍ କରିଛନ୍ତି । କଂଗ୍ରେସ ନେତା ଶଶି ଥରୁର ଦଳ ନିଜେ ଆତ୍ମସମୀକ୍ଷା କରିବା ଦରକାର ବୋଲି କହିଛନ୍ତି । ଏହାରି ଭିତରେ ପ୍ରଥମ ଥର ବଡ ବୈଠକ ଡାକିଛନ୍ତି ରାହୁଲ ଗାନ୍ଧୀ ।

ରିପୋର୍ଟ ଅନୁସାରେ, ଶନିବାର ଦିଲ୍ଲୀରେ କଂଗ୍ରେସର ସମୀକ୍ଷା ବୈଠକ ଆୟୋଜିତ ହୋଇଛି । ଦଳର ସଭାପତି ମଲିକାର୍ଜୁନ ଖଡଗେଙ୍କ ବାସଭବନରେ ଏହାର ଆୟୋଜନ ହୋଇଛି । ଏଥିରେ କଂଗ୍ରେସ ନେତା ରାହୁଲ ଗାନ୍ଧୀ, କେସି ବେଣୁଗୋପାଳ ଏବଂ ଅଜୟ ମାକେନ ଯୋଗ ଦେଇଥିଲେ ।

ବୈଠକରେ ନେତାମାନେ ଫଳାଫଳ ଉପରେ ଆଲୋଚନା କରିଥିଲେ । ଭବିଷ୍ୟତ ପାଇଁ ଦଳର ଆଭିମୁଖ୍ୟ କଣ ରହିବ ସେନେଇ ବିସ୍ତୃତ ଭାବେ ଆଲୋଚନା କରାଯାଇଥିଲା । ଦଳ ବିହାରରେ କାହିଁକି ପରାସ୍ତ ହେଲା ସେନେଇ ଗଭୀର ଭାବେ ସମୀକ୍ଷା କରୁଛି ।

ସୂଚନାଯୋଗ୍ୟ, ବିହାର ବିଧାନସଭା ନିର୍ବାଚନରେ କଂଗ୍ରେସ ୬୦ଟି ଆସନରେ ପ୍ରାର୍ଥୀ ଦେଇଥିଲା । କିନ୍ତୁ ଦଳମାତ୍ର ୬ଟି ଆସନରେ ଜିତିପାରିଥିଲା । ୨୦୨୦ ଅପେକ୍ଷା ଦଳର ଭୋଟ୍ ସେୟାର ହ୍ରାସ ପାଇଥିବା ବେଳେ ସିଟ୍ ମଧ୍ୟ ପୂର୍ବ ନିର୍ବାଚନ ତୁଳନାରେ କମିଥିଲା ।