ଗୋଟିଏ ଝଟକାରେ ୧୦ ଲକ୍ଷ କୋଟି ଟଙ୍କା ସ୍ୱାହା, ୧୦୬୬ ପଏଣ୍ଟ ଖସିଲା ସେନ୍‌ସେକ୍ସ; ସେୟାର ବଜାରରେ ହାହାକାର

ନୂଆଦିଲ୍ଲୀ: ଭାରତୀୟ ସେୟାର ବଜାରରେ ମଙ୍ଗଳବାର ହାହାକାର ସୃଷ୍ଟି ହୋଇଛି । ସେନ୍‌ସେକ୍ସ ଓ ନିଫ୍ଟି ୧ ପ୍ରତିଶତରୁ ଅଧିକ ହ୍ରାସ ପାଇ ବନ୍ଦ ହୋଇଛି । କାରବାର ବେଳେ ନିଫ୍ଟି ୨୫୨୦୦ ତଳକୁ ଖସି ନିଜର ୪ ମାସର ସର୍ବନିମ୍ନ ସ୍ତରରେ ପହଞ୍ଚିଥିଲା । ଏହି କାରଣରୁ ନିବେଶକଙ୍କୁ ପ୍ରାୟ ୧୦ ଲକ୍ଷ କୋଟି ଟଙ୍କା କ୍ଷତି ହୋଇଛି । ଗ୍ଲୋବାଲ୍ ଟ୍ରେଡକୁ ନେଇ ଉତ୍ତେଜନା, ତୃତୀୟ ତ୍ରୈମାସିକ ପରିମାଣରେ ମିଶ୍ରିତ ଫଳାଫଳ ଓ ବିଦେଶୀ ନିବେଶକଙ୍କ ଲଗାତାର ବିକ୍ରିରେ ବାଜର ଚାପରେ ରହିଛି ।

କାରବାର ଶେଷରେ ବିଏସ୍‌ଇର ୩୦ ସେୟାର ବିଶିଷ୍ଟ ପ୍ରମୁଖ ସୂଚକାଙ୍କ ସେନସେକ୍ସ ୧,୦୬୫.୭୮ ପଏଣ୍ଟ ବା ୧.୨୮% ହ୍ରାସ ପାଇ ୮୨,୧୮୦.୪୭ ସ୍ତରରେ ବନ୍ଦ ହୋଇଛି । ନିଫ୍ଟି ୩୫୩ ପଏଣ୍ଟ ବା ୧.୩୮% ହ୍ରାସ ପାଇ୨୫,୨୩୨.୫୦ ସ୍ତରରେ ବନ୍ଦ ହୋଇଛି । ସ୍ମଲ୍ ଏବଂ ମିଡ୍-କ୍ୟାପ୍ ଷ୍ଟକ୍ ମଧ୍ୟ ହ୍ରାସ ପାଇଛି । ବିଏସ୍‌ଇ ମିଡ୍‌କ୍ୟାପ୍ ଏବଂ ବିଏସଇ ସ୍ମଲ୍‌କ୍ୟାପ୍ ଉଭୟ ୨%ରୁ ଅଧିକ ହ୍ରାସ ପାଇଛି । ୭୦୦ରୁ ଅଧିକ ଷ୍ଟକ୍ ସେମାନଙ୍କର ୫୨ ସପ୍ତାହର ସର୍ବନିମ୍ନ ସ୍ତରରେ ପହଞ୍ଚିଛି ।

ସେକ୍ଟୋରାଲ୍ ଫ୍ରଣ୍ଟରେ ବି ସ୍ଥିତି ଦୁର୍ବଳ ରହିଛି । ସମସ୍ତ ସେକ୍ଟୋରାଲ ଇଣ୍ଡେକ୍ସ ଲାଲ ସଂକେତରେ ବନ୍ଦ ହୋଇଛି । ରିଅଲ୍ଟି ସେକ୍ଟର ସବୁଠୁ ଅଧିକ ମାଡ଼ ସହିଛି । ଏହା ପ୍ରାୟ ୫% ହ୍ରାସ ପାଇଥିଲା । ଅଟୋ, ଆଇଟି, ମିଡିଆ, ମେଟାଲ୍, ପିଏସୟୁ ବ୍ୟାଙ୍କ, ଫାର୍ମା, ତୈଳ ଏବଂ ଗ୍ୟାସ ଏବଂ କଞ୍ଜ୍ୟୁମର ଡ୍ୟୁରେବଲ୍ସ ସେକ୍ଟର ମଧ୍ୟ ୧.୫%ରୁ ୨.୫% ହ୍ରାସ ପାଇଛି ।

ବିଏସ୍‌ଇରେ ତାଲିକାଭୁକ୍ତ କମ୍ପାନିଗୁଡ଼ିକର ମୋଟ ବଜାର ପୁଞ୍ଜି ଆଜି ୪୫୫.୭୮ ଲକ୍ଷ କୋଟିକୁ ହ୍ରାସ ପାଇଛି, ଯାହା ପୂର୍ବ କାରବାର ଦିନରେ ୪୬୫.୬୮ ଲକ୍ଷ କୋଟି ଥିଲା । ଏହିପରି ବିଏସ୍‌ଇରେ ତାଲିକାଭୁକ୍ତ କମ୍ପାନିଗୁଡ଼ିକର ବଜାର ପୁଞ୍ଜି ଆଜି ପ୍ରାୟ ୯.୯୦ ଲକ୍ଷ କୋଟି ହ୍ରାସ ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କ ସମ୍ପତ୍ତି ପ୍ରାୟ ୯.୯୦ ଲକ୍ଷ କୋଟି ହ୍ରାସ ପାଇଛି । ଆଜି ଷ୍ଟକ୍ ବଜାରରେ ହ୍ରାସ ଏତେ ଅଧିକ ଥିଲା ଯେ ବିଏସ୍‌ଇ ସେନ୍‌ସେକ୍ସର ୩୦ ମଧ୍ୟରୁ ୨୯ ସେୟାର ହ୍ରାସ ସହିତ ଲାଲ ସଂକେତରେ ବନ୍ଦ ହୋଇଥିଲା ।