ନୂଆଦିଲ୍ଲୀ ୯।୩: ସଂସଦ ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ ୧୦ ମାର୍ଚ୍ଚ ସୋମବାର ଆରମ୍ଭ ହେଉଛି। ଏଥିରେ ସରକାର ଓ ବିପକ୍ଷ ମଧ୍ୟରେ ଅନେକ ପ୍ରସଙ୍ଗକୁ ନେଇ ବିବାଦ ହେବାର ଅନୁମାନ କରାଯାଉଛି। ଏଣୁ ସଂସଦ ଅଧିବେଶନର ଏହି ପର୍ଯ୍ୟାୟ ବେଶ୍ ହଙ୍ଗାମାଦାର ହୋଇପାରେ ବୋଲି ଆକଳନ କରାଯାଉଛି। କୁହାଯାଉଛି ବିରୋଧୀ ଦଳ ଭୋଟର ଲିଷ୍ଟରେ ହେରଫେର, ମଣିପୁର ହିଂସା ଓ ଟ୍ରମ୍ପ ପ୍ରଶାସନ ସହିତ ଭାରତର ସମ୍ପର୍କ ଭଳି ପ୍ରସଙ୍ଗ ଉଠାଇ ପାରନ୍ତି।
ଅନ୍ୟପଟେ ସରକାର ଅନୁଦାନ ଦାବି ଲାଗି ସଂସଦର ମଞ୍ଜୁରୀ ପ୍ରାପ୍ତ କରିବା, ବଜେଟ ପ୍ରକ୍ରିୟା ପୁରା କରିବା ଓ ୱାକଅଫ ସଂଶୋଧନ ବିଧେୟକ ଗୃହୀତ କରିବା ଉପରେ ନିଜର ଧ୍ୟାନ କେନ୍ଦ୍ରିତ କରିବେ। ଏହା ଛଡା କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମଣିପୁରରେ ରାଷ୍ଟ୍ରପତି ଶାସନ ଜାରି ନିମନ୍ତେ ସଂସଦର ମଞ୍ଜୁରୀ ପାଇଁ ଏକ ବୈଧାନିକ ପ୍ରସ୍ତାବ ମଧ୍ୟ ଉପସ୍ଥାପନ କରିପାରନ୍ତି। ସେହିପରି ଅର୍ଥମନ୍ତ୍ରୀ ନିର୍ମଳା ସୀତାରମଣ ସୋମବାର ସଂସଦରେ ମଣିପୁର ବଜେଟ୍ ଉପସ୍ଥାପନ କରିବେ। କାରଣ ମୁଖ୍ୟମନ୍ତ୍ରୀ ଏନ.ବୀରେନ ସିଂହଙ୍କ ଇସ୍ତଫା ପରେ ଫେବୃଆରୀ ୧୩ ତାରିଖରୁ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ ହୋଇଛି।
ସଂସଦର ଏହି ଅଧିବେଶନ କାଳରେ ୱକଅଫ ସଂଶୋଧନ ବିଧେୟକକୁ ଗୃହୀତ କରିବା ପ୍ରଥମ ପ୍ରାଥମିକତା ରହିବ। ସେପଟେ କଂଗ୍ରେସ ନେତା ଜୟରାମ ରମେଶ ୱକଫ ବିଧେୟକକୁ ଗୃହରେ ମିଳିତ ବିରୋଧ କରିବା ପାଇଁ ଇଣ୍ଡିଆ ବ୍ଲକର ନେତାମାନଙ୍କ ସହିତ କଂଗ୍ରେସ ବିଚାର ବିମର୍ଷ କରିବ ବୋଲି କହିଛନ୍ତି । କଂଗ୍ରେସ ବଜେଟ ଅଧିବେଶନର ଦ୍ୱିତୀୟ ଅଧ୍ୟାୟରେ ଟ୍ରମ୍ପଙ୍କ ରେସିପ୍ରୋକାଲ ଟାରିଫ ଧମକ ପ୍ରସଙ୍ଗ ମଧ୍ୟ ଉଠାଇବ। ଉଲ୍ଲେଖଯୋଗ୍ୟ ଯେ ସଂସଦର ବଜେଟ ଅଧିବେଶନର ପ୍ରଥମ ପର୍ଯ୍ୟାୟ ୩୧ ଜାନୁୟାରୀରୁ ଫେବୃଆରୀ ୧୩ ତାରିଖ ପର୍ଯ୍ୟନ୍ତ ଚାଲିଥିଲା। ସେହିପରି ଦ୍ୱିତୀୟ ପର୍ଯ୍ୟାୟ ୧୦ ଏପ୍ରିଲରୁ ଆରମ୍ଭ ହୋଇ ଏପ୍ରିଲ ୪ ତାରିଖ ପର୍ଯ୍ୟନ୍ତ ଚାଲିବ।
