ଆଧାର କାର୍ଡ ନାଗରିକତା, ବାସସ୍ଥାନ କିମ୍ବା ଜନ୍ମ ତାରିଖର ପ୍ରମାଣ ନୁହେଁ, ଏହା କେବଳ ପରିଚୟ ପ୍ରମାଣ: ୟୁଆଇଡିଏଆଇ

ନୂଆଦିଲ୍ଲୀ: ୧୨ ଅଙ୍କ ବିଶିଷ୍ଟ ଆଧାର ନମ୍ବର କେବଳ ପରିଚୟର ପ୍ରମାଣ, ନାଗରିକତା ନୁହେଁ। ଭାରତୀୟ ସ୍ୱତନ୍ତ୍ର ପରିଚୟ ପ୍ରାଧିକରଣ (UIDAI) ଆଜି ଏ ନେଇ ସ୍ପଷ୍ଟ କରିଛି। ଏହା ବ୍ୟତୀତ ଆଧାର କାର୍ଡ ଜନ୍ମ ତାରିଖର ପ୍ରମାଣ ନୁହେଁ ବୋଲି ୟୁଆଇଡିଏଆଇ କହିଛି। ପ୍ରକୃତରେ ଆଧାର କାର୍ଡ ଏବେ ପ୍ରାୟ ପ୍ରତ୍ୟେକ ଅତ୍ୟାବଶ୍ୟକ ସେବା ସହିତ ଲିଙ୍କ୍ ହୋଇଥିବାବେଳେ, ଅନେକ ଲୋକ ଏବେ ବି ଦ୍ୱନ୍ଦ୍ୱରେ ଅଛନ୍ତି ଯେ ସେମାନେ ସେମାନଙ୍କର ଜନ୍ମ ତାରିଖ କିମ୍ବା ଭାରତୀୟ ନାଗରିକତା ପ୍ରମାଣ କରିପାରିବେ କି ନାହିଁ। ଏପରି ଗୁଜବକୁ ଦୂର କରିବା ପାଇଁ ୟୁଆଇଡିଏଆଇ ଏହି ସ୍ପଷ୍ଟୀକରଣ ଜାରି କରିଛି।

ସେପଟେ ଡାକ ବିଭାଗ ବି ନିକଟରେ ଏ ସମ୍ପର୍କିତ ଏକ ନିର୍ଦ୍ଦେଶ ଜାରି କରିଥିଲା। ଆଧାର ନମ୍ବର ଆଧାର ଧାରକରଙ୍କ ପରିଚୟ ପ୍ରମାଣିତ କରିବା ପାଇଁ ବ୍ୟବହାର କରାଯାଇପାରିବ, କିନ୍ତୁ ଏହା ନାଗରିକତା, ବାସସ୍ଥାନ କିମ୍ବା ଜନ୍ମ ତାରିଖର ଏକ ନିଶ୍ଚିତ ପ୍ରମାଣ ନୁହେଁ ବୋଲି ଡାକ ବିଭାଗ କହିଥିଲା।

ତେଣୁ, ଏହାକୁ ଜନ୍ମ ତାରିଖର ଅନ୍ତିମ ପ୍ରମାଣ ଭାବରେ ବ୍ୟବହାର କରନ୍ତୁ ନାହିଁ। ସରକାର ସମସ୍ତ ଡାକଘରକୁ ଏହି ସୂଚନା ସମସ୍ତଙ୍କୁ ପ୍ରସାରିତ କରିବାକୁ ଏବଂ ସାର୍ବଜନୀନ ସ୍ଥାନରେ ନୋଟିସ ବୋର୍ଡରେ ପ୍ରଦର୍ଶନ କରିବାକୁ ନିର୍ଦ୍ଦେଶ ଦେଇଛନ୍ତି।

ସେପଟେ ଆଧାର ଅପଡେଟ ପାଇଁ ଫିସ୍ ମଧ୍ୟ ବଢ଼ିବାକୁ ଯାଉଛି। ଅକ୍ଟୋବର ୧ ତାରିଖରୁ ଆଧାର ବିବରଣୀ ଅପଡେଟ୍ କରିବା ମଧ୍ୟ ମହଙ୍ଗା ହୋଇଯିବ। ପ୍ରାୟ ପାଞ୍ଚ ବର୍ଷ ମଧ୍ୟରେ ଏହା ପ୍ରଥମ ବୃଦ୍ଧି ହୋଇଛି।

ନାଁ, ଠିକଣା କିମ୍ବା ଜନ୍ମ ତାରିଖ ଭଳି ଜନସଂଖ୍ୟାଗତ ପରିବର୍ତ୍ତନ ପାଇଁ ₹୫୦ ରୁ ₹୭୫ ଟଙ୍କା ଦେବାକୁ ପଡ଼ିବ। ସେହିପରି ବାୟୋମେଟ୍ରିକ୍ ଅପଡେଟ୍ ପାଇଁ ୧୦୦ ରୁ ₹୧୨୫ ଟଙ୍କା ଦେବାକୁ ହେବ। ନବଜାତ ଶିଶୁଙ୍କ ପାଇଁ ଆଧାର ପଞ୍ଜୀକରଣ ଏବଂ ଅପଡେଟ୍ ମାଗଣା ରହିବ। ୫ ବର୍ଷକ ବୟସରେ, ୫ ରୁ ୭ ବର୍ଷ ଏବଂ ୧୫ ରୁ ୧୭ ବର୍ଷ ବୟସର ପିଲାମାନଙ୍କ ପାଇଁ ବାୟୋମେଟ୍ରିକ୍ ଅପଡେଟ୍ ବାଧ୍ୟତାମୂଳକ କରାଯାଇଛି।