କୁଲଡିହା ଅଭୟାରଣ୍ୟରେ ବାଘ ଗଣନା ଆରମ୍ଭ, ବାଘର ପାଦ ଚିହ୍ନ ଦେଖି କରାଯିବ ଗଣତି

ନୀଳଗିରି ୨୦।୧୧:ବାଲେଶ୍ଵର ଜିଲ୍ଲା ନୀଳଗିରି ଅଞ୍ଚଳରେ ଥିବା କୁଲଡିହା ଅଭୟାରଣ୍ୟରେ ବାଘ ଗଣନା ଗୁରୁବାର ଠାରୁ ଆରମ୍ଭ ହୋଇଛି । ଡିଏଫଓ ପ୍ରଫୁଲ୍ଲ ମଲ୍ଲିକଙ୍କ ନିର୍ଦ୍ଦେଶରେ ବନ ବିଭାଗର ଟିମ୍ କୁଲଡିହା ଅଭୟାରଣ୍ୟର ଚାରିପଟୁ ଘଞ୍ଚ ଜଙ୍ଗଲ ଭିତରକୁ ଯାଇ ଏହି ଗଣନା ପ୍ରକ୍ରିୟାରେ ସାମିଲ ହୋଇଛନ୍ତି ।

ପୂର୍ବରୁ ବାଘ ଗଣନା ପାଇଁ ପ୍ଲାଷ୍ଟର ପ୍ୟାରିସ ଜଙ୍ଗଲରେ ବସାଯାଇଥିବା ବେଳେ ଏହାକୁ ମାଡିବା ପରେ ବାଘର ପାଦ ଚିହ୍ନ ଦେଖି କେଉଁ ପ୍ରକାରର ବାଘ ବୋଲି ଜଣାପଡିବ । ସେହିପରି ଝରଣାକୁ ପାଣି ପିଇବା ପାଇଁ ବାଘ ସାଧାରଣତଃ ଆସିଥାନ୍ତି । ଝରଣା କୂଳରେ ସନ୍ତସନ୍ତିଆ ଜାଗାରେ ମଧ୍ୟ ବାଘର ପାଦ ଚିହ୍ନ ଦେଖି ଗଣତି କରାଯିବ ବୋଲି ଜଣାପଡିଛି ।

୨୭୨ ୭୫ ବର୍ଗ କିଲୋମିଟର ଏହି ଅଭୟାରଣ୍ୟରେ ବିଭିନ୍ନ ପ୍ରଜାତିର ଜୀବଜନ୍ତୁ ଥିବାବେଳେ ବାଘ ମଧ୍ୟ ଅଛନ୍ତି । କଲରାପତରିଆ, ହେଟା ବାଘ ଥିବାବେଳେ ଗତବର୍ଷ ଶିମିଳିପାଳ ଅଭୟାରଣ୍ୟରୁ ଏକ ମହାବଳ ବାଘ ଆସି ବେଶ କିଛିଦିନ ରହିଥିଲା । କୁଲଡିହା ଅଭୟାରଣ୍ୟରେ ଏକ ବାଘୁଣୀ ଥିବାବେଳେ ମହାବଳଟି କିଛି ଦିନ ରହିଥିଲା । ଏହାରି ଭିତରେ ଜୀବଜନ୍ତୁ, ଗୋରୁଗାଈ ଶିକାର କରି ମଧ୍ୟ ଖାଇଥିଲା । କିଛି ଦିନ ପୂର୍ବରୁ ତାର ଖୋଜଖବର ନଥିବା ବେଳେ ବନ ବିଭାଗ ପାଇଁ ଏହା ଚିନ୍ତାର କାରଣ ପାଲଟିଥିଲା ।