ନୂଆଦିଲ୍ଲୀ ୧୧।୫: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଜେଲରୁ ବାହାରିବା ପରେ ଶନିବାର ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିଛନ୍ତି। ଏହି ଅବସରରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବର୍ଷିଛନ୍ତି। ସେ କହିଛନ୍ତି ଯେ ୫୦ ଦିନ ପରେ ଜେଲରୁ ଫେରିଛନ୍ତି, କାରଣ ତାଙ୍କ ଉପରେ ବଜରଙ୍ଗବଲୀଙ୍କ କୃପା ହୋଇଛି। ମୁଁ ଏମିତିରେ ଜେଲରୁ ମୁକୁଳିନି ବଜରଙ୍ଗବଲୀ ମୋତେ ଦିଲ୍ଲୀ ଓ ଦେଶର ରାଜନୀତିରେ ପରିବର୍ତ୍ତନ କରିବାକୁ ବାହାରକୁ ପଠାଇଛନ୍ତି।
ମୁଖ୍ୟମନ୍ତ୍ରୀ କେଜରିୱାଲ ତାଙ୍କ ସମ୍ବୋଧନରେ କହିଛନ୍ତି ଯେ ଅନେକ ଲୋକଙ୍କ ପ୍ରଶ୍ନ କେଜରିୱାଲ ତାଙ୍କ ପଦରୁ ଇସ୍ତଫା କାହିଁକି ଦେଉ ନାହାନ୍ତି? ସବୁଠୁ ଅଧିକ ବିଜେପି ଲୋକେ ଏହି ପ୍ରଶ୍ନ କରୁଛନ୍ତି। ତେବେ ମୁଁ ଆଜି ଆପଣମାନଙ୍କୁ ଏହା ପଛର ସତ୍ୟତା କହୁଛି ମୁଁ କାହିଁକି ଇସ୍ତଫା ଦେଇ ନାହିଁ। ସେ କହିଛନ୍ତି ଯେ ୭୫ ବର୍ଷରେ ଭାରତର ଯେତେ ରାଜ୍ୟରେ ନିର୍ବାଚନ ହୋଇଛି କିନ୍ତୁ କେଉଁଠି ଦିଲ୍ଲୀ ଭଳି ଐତିହାସିକ ବିଜୟ କେଉଁଠିବି କେଉଁ ପାର୍ଟିକୁ ମିଳି ନାହିଁ।
ସେ କହିଛନ୍ତି ଯେ ଦିଲ୍ଲୀରେ ଐତିହାସିକ ଭୋଟ ଅନ୍ତରରେ ଆମ ଆଦମୀ ପାର୍ଟି ସରକାର ହୋଇଛି। ଏତେ ବହୁମତରେ ନିର୍ବାଚନ ଜିତିବା ପରେ ସେମାନେ ଜାଣିଥିଲେ ଯେ କେଜରିୱାଲ ଏଠାରୁ ନିର୍ବାଚନ ହାରିବେ ନାହିଁ। ଏଣୁ ସେମାନେ ଷଡ଼ଯନ୍ତ୍ର ରଚିଲେ ମିଥ୍ୟା କେସରେ ଫସାଇ ଦିଅ ସେ ନିଜକୁ ନିଜେ ଜେଲ ଚାଲିଯିବେ ଓ ତାଙ୍କୁ ଇସ୍ତଫା ଦେବାକୁ ପଡିବ। ପରେ ତାଙ୍କ ସରକାର ବି ଚାଲିଯିବ। ଏଣୁ ମୁଁ ମଧ୍ୟ ଠାଣି ନେଇଥିଲି ଯେ ଜେଲରୁ ଗଣତନ୍ତ୍ର ଚଳାଇ ଦେଖାଇବି। ଜେଲରୁ ସରକାର ଚଳାଇ ଦେଖାଇବି।
ଆଜି ଯଦି ମୁଁ ଜେଲରୁ ଇସ୍ତଫା ଦେଉ ନାହିଁ ତାର ଏକ କାରଣ ହେଉଛି ମୁଁ ଏକଛାତ୍ରବାଦ ବିରୋଧରେ ଲଢୁଛି, ଯଦି କାଲି କେନ୍ଦ୍ରରେ ପୁଣି ସେମାନଙ୍କ ସରକାର ହେଲା ତେବେ ଏମାନେ ଅନ୍ୟ ରାଜ୍ୟମାନଙ୍କରେ ଅଣ ବିଜେପି ମୁଖ୍ୟମନ୍ତ୍ରୀମାନଙ୍କୁ ମିଥ୍ୟା ମାମଲାରେ ଫସାଇ ଜେଲରେ ଭରିବେ ଓ ସେମାନଙ୍କ ସରକାର ଭାଙ୍ଗିଦେବେ। ମୁଁ ସେମାନଙ୍କ ଏହି ଇଛାକୁ ପୂରଣ ହେବାକୁ ଦେବିନି। ସେ କହିଛନ୍ତି ଯେ ମୋର ପଦପଦବୀର ଲାଳସା ନାହିଁ। ଯେତେବେଳେ ପ୍ରଥମ ଥର ମୁଖ୍ୟମନ୍ତ୍ରୀ ହୋଇଥିଲି୪୯ ଦିନରେ ନିଜେ ପଦ ଛାଡି ଦେଇଥିଲି। ଏମିତି ହଜାରେ ମୁଖ୍ୟମନ୍ତ୍ରୀ ପଦ ବଳିଦାନ କରିବାକୁ ମୁଁ ପ୍ରସ୍ତୁତ।
ହେଲେ ମୁଁ ଆଜି ଏଥି ପାଇଁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଉନି କାରଣ ମୋତେ ରାଜନୈତିକ ଷଡ଼ଯନ୍ତ୍ର ରଚନା କରି ଜେଲକୁ ପଠାଯାଇଛି। ମୋ ଲଢେଇ ଏକଛତ୍ରବାଦ ବିରୋଧରେ ମୋର ଜେଲ ଯିବା ଅନେକ ଲୋକଙ୍କୁ ଭାବୁକ କରିଛି। ମୁଁ ସମସ୍ତଙ୍କୁ କୃତଜ୍ଞତା ଜଣାଉଛି। ସମସ୍ତେ ଖୁସିରେ ରହନ୍ତୁ ଈଶ୍ୱରଙ୍କ ନିକଟରେ ଏହି କାମନା କରୁଛି।
