ବିଶ୍ୱକପ୍ ଜିତିବା ପରେ ସାଧାରଣ ଯାତ୍ରୀଙ୍କ ଭଳି ଟ୍ରେନ୍‌ରେ ଘରକୁ ଫେରିଲେ ଷ୍ଟାର୍ କ୍ରିକେଟର: ଟିସି ଚିହ୍ନିବା ବେଳକୁ ବଞ୍ଚାଇଲେ ପତ୍ନୀ, ପଢ଼ନ୍ତୁ ପୂରା ଘଟଣା

ମୁମ୍ବାଇ: ଟି-୨୦ ବିଶ୍ୱକପ୍ ୨୦୨୬ ବିଜୟ ପରେ ଭାରତୀୟ ଦଳର ଅନ୍ୟ ଖେଳାଳିମାନେ ସ୍ୱତନ୍ତ୍ର ବିମାନ ଏବଂ ଭିକ୍ଟ୍ରି ପରେଡର ପ୍ରସ୍ତୁତି କରୁଥିବା ବେଳେ ଷ୍ଟାର୍ ଅଲରାଉଣ୍ଡର ଶିବମ୍ ଦୁବେ ଏକ ଭିନ୍ନ ଉପାୟରେ ଘରକୁ ଫେରିଛନ୍ତି। ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ନ୍ୟୁଜିଲାଣ୍ଡକୁ ହରାଇ ବିଶ୍ୱ ବିଜୟୀ ହେବାର କିଛି ଘଣ୍ଟା ପରେ, ଦୁବେ ଏସି ଥ୍ରୀ-ଟାୟାର୍ (AC 3-Tier) କୋଚ୍ରେ ସାଧାରଣ ଯାତ୍ରୀଙ୍କ ଭଳି ନିଜର ପରିଚୟ ଲୁଚାଇ ମୁମ୍ବାଇ ଯାତ୍ରା କରିଛନ୍ତି।

ପରିବାରକୁ ଭେଟିବାକୁ ହେଉଥିଲେ ତରତର

ମ୍ୟାଚ୍ ସରିବା ପରେ କୌଣସି ଫ୍ଲାଇଟ୍ ଉପଲବ୍ଧ ନଥିଲା। କାରରେ ଗଲେ ଅଧିକ ସମୟ ଲାଗିବ, ତେଣୁ ସେ ଟ୍ରେନ୍ରେ ଯିବାକୁ ନିଷ୍ପତ୍ତି ନେଇଥିଲେ। ନିଜର ୪ ବର୍ଷର ପୁଅ ଆୟାନ ଏବଂ ୨ ବର୍ଷର ଝିଅ ମେହୱିଶଙ୍କୁ ଭେଟିବା ପାଇଁ ସେ ଏତେ ବ୍ୟାକୁଳ ଥିଲେ ଯେ, ସୋମବାର ଭୋର୍ ସମୟରେ ହିଁ ଅହମ୍ମଦାବାଦରୁ ଟ୍ରେନ୍ ଧରିଥିଲେ ବୋଲି ଗଣମାଧ୍ୟମକୁ ଦେଇଥିବା ସାକ୍ଷାତକାରରେ କହିଛନ୍ତି।

ମାସ୍କ ପିନ୍ଧି ଲୁଚାଇଲେ ପରିଚୟ

ଶିବମ୍ ଦୁବେଙ୍କ ଶାରୀରିକ ଗଠନ ଏବଂ ଲୋକପ୍ରିୟତା ଦୃଷ୍ଟିରୁ ସାଧାରଣ ଲୋକଙ୍କ ଗହଳିରେ ଲୁଚିବା ପ୍ରାୟତଃ ଅସମ୍ଭବ। ଭୋର୍ ୫:୧୦ ରେ ଟ୍ରେନ୍ ଛାଡ଼ିବାର ଥିଲା। ଲୋକଙ୍କ ନଜରରୁ ବର୍ତ୍ତିବା ପାଇଁ ସେ ମାସ୍କ ଓ ଫୁଲ୍ ସ୍ଲିଭ୍ ଟି-ସାର୍ଟ ପିନ୍ଧିଥିଲେ। ଟ୍ରେନ୍ ଛାଡ଼ିବାର ମାତ୍ର ୫ ମିନିଟ୍ ପୂର୍ବରୁ ସେ କାର୍ରୁ ବାହାରି ପ୍ଲାଟଫର୍ମକୁ ଆସିଥିଲେ ଏବଂ ସିଧା ନିଜର ଅପର୍ ବର୍ଥ (Top berth) କୁ ଚଢ଼ିଯାଇଥିଲେ।

ଟିସିଙ୍କ ପ୍ରଶ୍ନ ଆଉ ପତ୍ନୀ ଅଞ୍ଜୁମଙ୍କ ଚତୁରତା

ଯାତ୍ରା ସମୟରେ ସବୁଠାରୁ ଆଶ୍ଚର୍ଯ୍ୟଜନକ ମୁହୂର୍ତ୍ତ ସେତେବେଳେ ଆସିଲା ଯେତେବେଳେ ଟିକେଟ୍ କଲେକ୍ଟର (TC) ପହଞ୍ଚିଥିଲେ। ଚାର୍ଟରେ ନାମ ଦେଖି ଟିସି ପଚାରିଥିଲେ, "ଶିବମ୍ ଦୁବେ? ସେ କିଏ, କ୍ରିକେଟର କି?"

ଏହି ସମୟରେ ଦୁବେଙ୍କ ପତ୍ନୀ ଅଞ୍ଜୁମ୍ ଉପସ୍ଥିତ ବୁଦ୍ଧି ଖଟାଇ ତୁରନ୍ତ କହିଥିଲେ, "ନା, ନା। ସେ ଏଠାକୁ କେଉଁଠୁ ଆସିବେ?" ଅଞ୍ଜୁମଙ୍କ ଏହି କଥା ଶୁଣି ଟିସିଙ୍କ ସନ୍ଦେହ ଦୂର ହୋଇଥିଲା ଏବଂ ଦୁବେ ଲୋକଙ୍କ ଭିଡ଼ରୁ ସୁରକ୍ଷିତ ରହିଯାଇଥିଲେ।

ବୋରିଭଲିରେ ପୋଲିସ୍ ଏସକର୍ଟ

ରାତିରେ ବାଥରୁମ୍ ଯିବା ଆସିବା ବେଳେ କେହି ତାଙ୍କୁ ଚିହ୍ନି ନଥିଲେ ମଧ୍ୟ, ଦିନ ବେଳା ବୋରିଭଲି ଷ୍ଟେସନରେ ଓହ୍ଲାଇବା ବେଳେ ତାଙ୍କୁ ଲୋକେ ଘେରିଯିବାର ଭୟ ଥିଲା। ଏଥିପାଇଁ ସେ ମୁମ୍ବାଇ ପୋଲିସ ସହ ଯୋଗାଯୋଗ କରିଥିଲେ। ପୋଲିସ ପ୍ରଥମେ ଭାବିଥିଲା ଯେ ସେ ଏୟାରପୋର୍ଟରେ ପହଞ୍ଚିବେ, କିନ୍ତୁ ଟ୍ରେନ୍ କଥା ଶୁଣି ଆଶ୍ଚର୍ଯ୍ୟ ହୋଇଥିଲେ। ପରେ ପୋଲିସ୍ ଏସକର୍ଟ ମିଳିବା ଫଳରେ ସେ ସୁରକ୍ଷିତ ଭାବେ ଷ୍ଟେସନରୁ ବାହାରି ଘରେ ପହଞ୍ଚିଥିଲେ।

ବିଶ୍ୱକପରେ ଦମଦାର ପ୍ରଦର୍ଶନ

ଫାଇନାଲ୍ ମ୍ୟାଚରେ ନ୍ୟୁଜିଲାଣ୍ଡ ବିପକ୍ଷରେ ଶେଷ ଓଭରରେ ସେ ୨ଟି ଛକା ଏବଂ ୩ଟି ଚୌକା ମାରି ଦଳର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଭାରତ ପାଇଁ ଫିନିସର ଭୂମିକା ତୁଲାଇଥିବା ଦୁବେ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ୮ଟି ଇନିଂସ ଖେଳି ୩୯.୧୬ ହାର ଏବଂ ୧୬୯.୦୬ ଷ୍ଟ୍ରାଇକ୍ ରେଟରେ ମୋଟ ୨୩୫ ରନ୍ ସଂଗ୍ରହ କରିଛନ୍ତି। ବିଶ୍ୱକପ୍ ଭଳି ବଡ଼ ଟୁର୍ଣ୍ଣାମେଣ୍ଟର ଚାପ ପରେ ଏହି ଶାନ୍ତ ଟ୍ରେନ୍ ଯାତ୍ରା ତାଙ୍କ ପାଇଁ ଏକ ନିଆରା ଅନୁଭୂତି ଆଣିଦେଇଥିଲା।