ଆସାମ ବିଧାନସଭାରେ ବହୁବିବାହ ବିଲ୍ ପାରିତ, ଦୋଷୀ ସାବ୍ୟସ୍ତ ହେଲେ ୭ ବର୍ଷର ଜେଲ୍ ଦଣ୍ଡ

ଗୌହାଟୀ: ବହୁବିବାହ ଉପରେ ପ୍ରତିବନ୍ଧକ ଲଗାଇବା ପାଇଁ ଆସାମ ବିଧାନସଭାରେ ଏକ ବିଲ୍ ପାସ୍ ହୋଇଛି। ଏହାକୁ ଏକ ଐତିହାସିକ ନିଷ୍ପତ୍ତି ବୋଲି କୁହାଯାଉଥିବାବେଳେ, ଏହି ଆଇନ ଅନୁଯାୟୀ ଦୋଷୀ ସାବ୍ୟସ୍ତ ହେଲେ ଅଭିଯୁକ୍ତକୁ ସାତ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ଏବଂ ପୀଡ଼ିତାଙ୍କୁ ୧.୪୦ ଲକ୍ଷ କ୍ଷତିପୂରଣ ଦେବା ପାଇଁ ନିୟମ ରହିଛି।

ସୂଚନାଥାଉକି, ମଙ୍ଗଳବାର ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ବିଧାନସଭାରେ ବହୁବିବାହ ନିଷିଦ୍ଧ ବିଲ୍ ଆଗତ କରିଥିଲେ। ଏହି ବିଲ୍ ଅନୁସାରେ ବହୁ ବିବାହ ଏକ ଅପରାଧ। ଏଥିରେ ଦୋଷୀ ସାବ୍ୟସ୍ତ ହେଲେ ସାତ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ହୋଇପାରେ। ତେବେ ବିଲ୍ରେ ଅନୁସୂଚିତ ଜନଜାତି (ST) ଏବଂ ଷଷ୍ଠ ଅନୁସୂଚୀ ଅଧୀନରେ ଥିବା ଅଞ୍ଚଳଗୁଡ଼ିକୁ ବାଦ ଦିଆଯାଇଛି।

ଅନୁସୂଚିତ ଜନଜାତିର ସଦସ୍ୟଙ୍କ ପାଇଁ ପ୍ରଯୁଜ୍ୟ ନୁହେଁ

ବିଧାନସଭା ବାଚସ୍ପତି ବିଶ୍ୱଜିତ ଦୈମାରିଙ୍କ ଅନୁମତି ପରେ, ହେମନ୍ତ ବିଶ୍ବ ଶର୍ମା "ଆସାମ ବହୁବିବାହ ନିଷେଧ ବିଲ୍, ୨୦୨୫" ଆଗତ କରିଥିଲେ। ଗାୟକ ଜୁବିନ ଗର୍ଗଙ୍କ ମୃତ୍ୟୁ ଉପରେ ଆଲୋଚନା ପରେ ଗୃହରୁ ଚାଲିଯାଇଥିବା ବିରୋଧୀ କଂଗ୍ରେସ, ଭାରତୀୟ କମ୍ୟୁନିଷ୍ଟ ପାର୍ଟି (ମାର୍କ୍ସବାଦୀ) ଏବଂ ରାଇଜୋର ଦଳ ବିଧାୟକମାନଙ୍କ ଅନୁପସ୍ଥିତିରେ ଏହି ବିଲ୍ ଆଗତ କରାଯାଇଥିଲା। ବିଲ୍ର ଉଦ୍ଦେଶ୍ୟ ଏବଂ କାରଣର ବିବୃତ୍ତି ଅନୁଯାୟୀ, ଏହା ରାଜ୍ୟରେ ବହୁବିବାହ ଏବଂ ବହୁପତ୍ନୀ ପ୍ରଥାକୁ ନିଷିଦ୍ଧ ଏବଂ ଦୂର କରିବା ପାଇଁ ଲକ୍ଷ୍ୟ ରଖିଛି। ତଥାପି, ବିଲ୍ର ବ୍ୟବସ୍ଥା ଷଷ୍ଠ ଅନୁସୂଚୀ କ୍ଷେତ୍ର ଏବଂ କୌଣସି ଅନୁସୂଚିତ ଜନଜାତିର ସଦସ୍ୟଙ୍କ ପାଇଁ ପ୍ରଯୁଜ୍ୟ ହେବ ନାହିଁ। ଏଥିରେ କୁହାଯାଇଛି ଯେ, ଯଦି ଜଣେ ବ୍ୟକ୍ତି ତାଙ୍କର ବିବାହକୁ ଲୁଚାଇ ଦ୍ୱିତୀୟ ବିବାହ କରନ୍ତି, ତେବେ ତାଙ୍କୁ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ଏବଂ ଜରିମାନା ସହିତ ଦଣ୍ଡିତ କରାଯାଇପାରିବ।