ନୂଆଦିଲ୍ଲୀ: ସୋସିଆଲ୍ ମିଡିଆ ଆପ୍ ଟେଲିଗ୍ରାମର ପ୍ରତିଷ୍ଠାତା ଏବଂ ସିଇଓ ପାଭେଲ ଖୁଲାସା କରିଛନ୍ତି ଯେ ୧୨ ଦେଶରେ ତାଙ୍କର ୧୦୦ରୁ ଅଧିକ ସନ୍ତାନ ଅଛନ୍ତି । ସେ ଏହା ପଛର କାହାଣୀ ମଧ୍ୟ କହିଛନ୍ତି । ସେ କହିଛନ୍ତି ଯେ ଗତ ୧୫ ବର୍ଷ ଧରି ସେ ସ୍ପର୍ମ (ଶୁକ୍ରାଣୁ) ଦାନ କରି ଆସୁଛନ୍ତି । ତେବେ ଏହାର ଆରମ୍ଭ ସହଜ ନଥିଲା, ପ୍ରଥମେ ଏହାକୁ ସେ ଏକ ପାଗଳାମୀ ବୋଲି ଭାବୁଥିଲେ, କିନ୍ତୁ ପରେ ଗୋଟିଏ ଘଟଣା ପୂରା ଚିନ୍ତାଧାରା ବଦଳାଇ ଦେଇଥିଲା । ସେ ଏହି କାମକୁ ସମାଜ ପ୍ରତି ନିଜ କର୍ତ୍ତବ୍ୟ ବୋଲି ମଧ୍ୟ କହିଛନ୍ତି ।
ପାଭେଲ୍ ଡ୍ଡରୋଭ ଟେଲିଗ୍ରାମର ପ୍ରତିଷ୍ଠାତା । ଫୋର୍ବ୍ସ ଅନୁସାରେ ୨୦୨୪ରେ ତାଙ୍କର ଆନୁମାନିକ ସମ୍ପତ୍ତି ୧୫୫୦ କୋଟି ୟୁଏସ୍ ଡଲାର ଥିଲା । ବିଲେନିୟର ବ୍ୟବସାୟୀ ପାଭେଲ ନିକଟରେ ଖୁଲାସା କରିଛନ୍ତି ଯେ ୧୨ ଦେଶରେ ସେ ୧୦୦ ଅଧିକ ପିଲାର ଜନକ ଅଟନ୍ତି । ସେ ଦାବି କରିଛନ୍ତି ଯେ ଏହି ସବୁ ପିଲା ତାଙ୍କ ଦ୍ୱାରା ଦାନ କରାଯାଇଥିବା ଶୁକ୍ରାଣୁରୁ ଜନ୍ମିତ । ସେ ଖୁଲାସା କରି କହିଛନ୍ତି ଯେ ଏହି ସବୁ ୧୫ ବର୍ଷ ପୂର୍ବେ ଆରମ୍ଭ କରିଥିଲେ, ଯେତେବେଳେ ତାଙ୍କର ଜଣେ ବନ୍ଧୁ ଏକ ଅଜବ ଅନୁରୋଧ କରିଥିଲେ । ପାଭେଲଙ୍କ ଅନୁସାରେ ତାଙ୍କ ସାଙ୍ଗଙ୍କ ସନ୍ତାନ ଜନ୍ମ ହେଉ ନଥିଲା । ତେଣୁ ଉଭୟ ସ୍ୱାମୀ-ସ୍ତ୍ରୀ ତାଙ୍କ ପାଖକୁ ଆସି ସାହାଯ୍ୟ ପାଇଁ ନିବେଦନ କରିଥିଲେ ।
ପାଭେଲ କହିଛନ୍ତି ଯେ ବହୁ ନିବେଦନ ପରେ ସେ କ୍ଲିନିକକୁ ଯାଇ ଶୁକ୍ରାଣୁ ଦାନ କରିବା ପାଇଁ ରାଜି ହୋଇଥିଲେ । ଏହାପରେ ତାଙ୍କ ସାଙ୍ଗ ଏକ ସୁସ୍ଥ ପିଲାର ବାପା-ମାଆ ହୋଇଥିଲେ । ଏହାପରଠୁ ତାଙ୍କର ସ୍ପର୍ମ ଦାନ କରିବା ଅଭିଯାନ ଆରମ୍ଭ ହୋଇଥିଲା । ସେ ଏକ ଟେଲିଗ୍ରାମ ଚ୍ୟାନେଲକୁ କହିଛନ୍ତି, 'ମୁଁ ଏବେ ଏବେ ଜାଣିବାକୁ ପାଇଲି ଯେ ମୋର ୧୦୦ରୁ ଅଧିକ ପିଲା ଅଛନ୍ତି । ଏହା ସେହି ବ୍ୟକ୍ତିର ମାମଲାରେ ହୋଇଛି ଯିଏ କେବେ ବିବାହ କରି ନାହିଁ ଏବଂ ସବୁବେଳେ ଏକା ରହିବାକୁ ପସନ୍ଦ କରେ ।'
