ନୀତୀଶଙ୍କ ହିଜାବ ହଟାଇବା ବିବାଦ ତେଜିଲା, ଜାଣନ୍ତୁ କ’ଣ କହୁଛନ୍ତି ନେତା?

ନୂଆଦିଲ୍ଲୀ ୧୯।୧୨: ମଞ୍ଚରେ ମହିଳା ଡାକ୍ତରଙ୍କ ହିଜାବ ହଟାଇବା ନେଇ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏବେ ବିବାଦରେ ଘେରି ଯାଇଛନ୍ତି। ବିରୋଧୀ ଦଳ ନେତାମାନେ ଏହାକୁ ମହିଳାଙ୍କ ଅପମାନ ବୋଲି କହୁଛନ୍ତି ଓ ଏଥି ପାଇଁ ନୀତିଶ କ୍ଷମା ମାଗନ୍ତୁ ବୋଲି ଦାବି କରୁଛନ୍ତି। ଅନ୍ୟପଟେ ଜେଡି(ୟୁ) ଓ ବିଜେପି ନୀତୀଶଙ୍କ ସପକ୍ଷରେ ଓହ୍ଲାଇ ଆସିଛନ୍ତି। ଏଥିରେ କେନ୍ଦ୍ରମନ୍ତ୍ରୀ ଗିରିରାଜ ସିଂହ କହିଛନ୍ତି ତେଣିକି ମହିଳା ଡାକ୍ତର ସରକାରୀ ଚାକିରୀ କରନ୍ତୁ କି ନ କରନ୍ତୁ ଏଥିରେ ଯାଏ କି ଆସେନି।

ତେବେ ଜମ୍ମୁ-କାଶ୍ମୀର ମୁଖ୍ୟମନ୍ତ୍ରୀ ଓମର ଅବଦୁଲ୍ଲା ଅସନ୍ତୋଷ ପ୍ରକାଶ କରିଛନ୍ତି। କହିଛନ୍ତି ନୀତୀଶ ଏବେ ଧିରେ ଧିରେ ତାଙ୍କର ରଙ୍ଗ ଦେଖାଇବା ଆରମ୍ଭ କଲେଣି। ଅବଦୁଲ୍ଲା କହିଛନ୍ତି ଯେ ନୀତୀଶ ଜଣେ ଧର୍ମନିରପେକ୍ଷ ନେତା ଭାବେ ବେଶ୍ ଜଣାଶୁଣା। ହେଲେ ମଞ୍ଚରେ ମହିଳାଙ୍କ ହିଜାବ ହଟାଇବା ଅତ୍ୟନ୍ତ ଅଶାଳୀନ ଓ ଏହାକୁ କୌଣସି ମତେ ଉଚିତ ବୋଲି କୁହାଯାଇ ପାରିବନି। ଏଥିରେ ନୀତୀଶଙ୍କ ହିଜାବ ବିବାଦ ନେଇ ଯେବେ ସଞ୍ଜୟ ନିଷାଦଙ୍କୁ ପ୍ରଶ୍ନ କରାଗଲା ସେ ଯାହା କହିଛନ୍ତି ତାହା ନୂଆ ବିବାଦକୁ ଜନ୍ମ ଦେଇଛି। ସେ କହିଛନ୍ତି ଯେ ନୀତୀଶ ହିଜାବ ଛୁଇଁବା ଯୋଗୁ ଯଦି ଏତେ ବିବାଦ ଅନ୍ୟ କୌଣସି ସ୍ଥାନକୁ ଛୁଇଁଥିଲେ କଣ ହୋଇ ନଥାନ୍ତା?ହେଲେ ଏବେ ସଞ୍ଜୟ ତାଙ୍କ ବୟାନରୁ ଓହରି ଯାଇଛନ୍ତି।

ତେବେ ଏଆଇଏମଆଇଏମ ନେତା ତଥା ପୂର୍ବତନ ସାଂସଦ ଇମତିୟାଜ ଜଲିଲ ସଞ୍ଜୟ ନିଷାଦଙ୍କ ବୟାନକୁ ନେଇ କଡ଼ା ଆପତ୍ତି କରିଛନ୍ତି। ସେ କହିଛନ୍ତି ଯେ ଯେଉଁ ଲୋକେ ଆମ ମହିଳାଙ୍କ ଗାରିମାକୁ ଅପମାନିତ କରୁଛନ୍ତି ଆମେ ତାଙ୍କ ହାତ ଭାଙ୍ଗି ଦେବୁ। ତେବେ ଏପରି ବୟାନକୁ କୌଣସି ମୂଲ୍ୟରେ ସ୍ୱୀକାର କରାଯାଇ ନପାରେ। ସେହିପରି କେନ୍ଦ୍ରମନ୍ତ୍ରୀ ଗିରିରାଜ ସିଂହ କହିଛନ୍ତି ଯେ ନୀତୀଶ କିଛି ଭୁଲ କରି ନାହାନ୍ତି। ଯଦି କେହି ନିଯୁକ୍ତି ପତ୍ର ନେବାକୁ ଯାଉଛନ୍ତି ସେ ତାଙ୍କ ମୁହଁ ଦେଖାଇବେ ନାହିଁ, ଏହା କଣ ଇସ୍ଲାମିକ ଦେଶ? ନୀତୀଶ କୁମାର ଜଣେ ଅଭିଭାବକର ଭୂମିକା ନିର୍ବାହ କରିଛନ୍ତି।

ଯଦି ଆପଣ ପାସପୋର୍ଟ କରିବାକୁ ଯାଉଛନ୍ତି କଣ ହିଜାବ ପିନ୍ଧା ଫଟୋ ଦେଉଛନ୍ତି? ଏୟାରପୋର୍ଟରେ କଣ ମୁହଁ ଘୋଡାଇ ଯାଉଛନ୍ତି?ଲୋକେ ପାକିସ୍ତାନ ଓ ଇଂଲିସ ଦେଶଙ୍କ କଥା କହୁଛନ୍ତି ହେଲେ ଭୁଲି ଯାଉଛନ୍ତି ଆମେ ଭାରତୀୟ। ଭାରତରେ ଆଇନର ଶସାନ ରହିଛି। ଅନ୍ୟପଟେ ବିଜେପିର ହରିଭୂଷଣ ଠାକୁର କହିଛନ୍ତି ନୀତୀଶ କିଛି ଭୁଲ କରି ନାହାନ୍ତି। ହିଜାବ ଉପରେ ଭାରତରେ ବ୍ୟାନ ଲାଗିବା ଦରକାର। ସରକାରୀ ଚାକିରୀରେ ତ ଏଥି ପାଇଁ କଡ଼ା କଟକଣା ଲାଗିବା ଦରକାର। କାରଣ ହିଜାବ ଯୋଗୁ ଆତଙ୍କବାଦ ପ୍ରସରୁଛି।