ନୂଆଦିଲ୍ଲୀ: ତାମିଲନାଡ଼ୁ ରାଜ୍ୟପାଳ ପୁଣି ଥରେ ବିବାଦୀୟ । ଆର.ଏନ୍ ରବି ଏବେ ଆଉ ଏକ ବିବାଦରେ ଫସିଛନ୍ତି । ମଦୁରାଇର ଏକ ଘରୋଇ ଇଞ୍ଜିନିୟରିଂ କଲେଜରେ ଆୟୋଜିତ କାର୍ଯ୍ୟକ୍ରମରେ ରାଜ୍ୟପାଳ ଆର.ଏନ ରବି ମୁଖ୍ୟ ଅତିଥି ଭାବେ ସାମିଲ ହୋଇଥିଲେ । ରାଜ୍ୟସ୍ତରୀୟ ଭାଷଣ ପ୍ରତିଯୋଗିତାରେ ବିଜେତା ଛାତ୍ରଛାତ୍ରୀଙ୍କୁ ପୁରସ୍କାର ପ୍ରଦାନ କରିଥିଲେ । ଏହି ସମୟରେ ସେ ‘କମ୍ବ ରାମାୟଣ’ର ରଚୟତା, ମହାନ ତାମିଲ୍ କବି କମ୍ବରଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ । ଏହା ସହିତ କମ୍ବ ରାମାୟଣର ସାଂସ୍କୃତିକ ମହତ୍ତ୍ବ ବାବଦରେ ଜଣାଇଥିଲେ । ରାଜ୍ୟପାଳ ନିଜ ଭାଷଣ ଶେଷ କରିବା ପରେ ଛାତ୍ରଙ୍କୁ ‘ଜୟ ଶ୍ରୀରାମ’ କହିବାକୁ କହିଥିଲେ । ଛାତ୍ରମାନେ ତାଙ୍କୁ ଅନୁସରଣ କରି ‘ଜୟ ଶ୍ରୀରାମ’ ନାରା ଦେଇଥିଲେ । ଯାହା ସୋସିଆଲ୍ ମିଡିଆରେ ଭାଇରାଲ୍ ହେବା ସହିତ ବିବାଦ ଛିଡ଼ା ହୋଇଛି । ଏହା ପୂର୍ବରୁ ରାଜ୍ୟପାଳ ଆର.ଏନ ରବି ତାମିଲନାଡ଼ୁ ସରକାରଙ୍କ ବିଲ୍ ଅଟାଇ ବିଦାଦୀୟ ହୋଇଥିଲେ । ଏହାକୁ ନେଇ ସୁପ୍ରିମକୋର୍ଟ ତାଙ୍କ ଉପରେ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି ।
‘ଜୟ ଶ୍ରୀରାମ’ ନାରାକୁ ନେଇ ଶସକ ଡିଏମକେ ରାଜ୍ୟପାଳଙ୍କ ଉପରେ ବର୍ଷିଛି । ପାର୍ଟି ମୁଖପାତ୍ର ଧରିଣୀଧରନ କହିଛନ୍ତି, ରାଜ୍ୟପାଳ ଆର.ଏନ୍ ରବି ବାରମ୍ବାର ସମ୍ବିଧାନର ଧର୍ମ ନିରପେକ୍ଷ ମୂଲ୍ୟବୋଧକୁ ଉଲ୍ଲଘଂନ କରୁଛନ୍ତି । ସେ ଆରଏସଏସର ମୁଖପାତ୍ର ଭଳି ବ୍ୟବହାର କରୁଛନ୍ତି । ତେଣୁ ସେ ରାଜ୍ୟପାଳ ପଦର ମର୍ଯ୍ୟାଦା ରଖି ଇସ୍ତଫା ଦେଇଦେବା ଆବଶ୍ୟକ । ସେ ସଂଘୀୟ ଢାଞ୍ଚକୁ ଉଲ୍ଲଘଂନ କରିଛନ୍ତି । ସୁପ୍ରିମକୋର୍ଟ ମଧ୍ୟ ରାଜ୍ୟପାଳଙ୍କ ସୀମାକୁ ନିର୍ଣ୍ଣୟ କରିଛନ୍ତି । ରାଜ୍ୟପାଳ ସମ୍ବିଧାନର ବିପରୀତ ଦିଗରେ କାର୍ଯ୍ୟକରୁଛନ୍ତି ବୋଲି ଡିଏମକେ ମୁଖପାତ୍ର କହିଛନ୍ତି ।
