ମୁମ୍ଵାଇ ୨୯।୦୧; ବଲିଉଡ୍ ଅଭିନେତ୍ରୀ ସ୍ୱରା ଭାସ୍କର। ଅଭିନେତ୍ରୀ କଙ୍ଗନା ରାଣାୱତଙ୍କ ସହ 'ତନୁ ୱେଡ୍ସ ମନୁ' ଫିଲ୍ମରେ କାମ କରିଥିଲେ। ଏହା ପରେ, ଦୁହେଁ କେବେ ପରଦାରେ ଏକାଠି କାମ କରିନାହାନ୍ତି। ନିକଟରେ ସ୍ୱରା, କଙ୍ଗନାଙ୍କ ସହ ପୁଣି କାମ କରିବାକୁ ନେଇ ଉପରେ ପ୍ରଶ୍ନ କରାଯିବାରୁ ନିଜର ମନ କଥା କହିଛନ୍ତି। ସେ କଙ୍ଗନାଙ୍କ ରାଜନୀତି ଉପରେ ମଧ୍ୟ ନିଜର ମତାମତ ଦେଇଛନ୍ତି।
ଏକ ସାକ୍ଷାତକାରରେ, ସ୍ୱରା, କଙ୍ଗନାଙ୍କ ସହ କାମ କରିବାକୁ ସ୍ପଷ୍ଟ ଭାବରେ ମନା କରିଦେଇଛନ୍ତି। କହିଛନ୍ତି, "ବର୍ତ୍ତମାନ ମୋ ପାଇଁ କିମ୍ବା କଙ୍ଗନା ପାଇଁ ଏପରି କୌଣସି ସୁଯୋଗ ନାହିଁ ଏବଂ ଆସିବ ନାହିଁ। ମୁଁ ବିଶ୍ୱାସ କରେ ନାହିଁ ଯେ ବଲିଉଡର ଲୋକମାନେ ମୋ ସହିତ କାମ କରିବାକୁ ଚାହୁଁ ନାହାଁନ୍ତି କାହିଁକି ନା.. ସେମାନେ ବହୁତ ଖରାପ। ମୁଁ ସମ୍ପୂର୍ଣ୍ଣ ବ୍ୟାଗ୍ରାଉଣ୍ଡକୁ ବୁଝିପାରୁଛି। ମୁଁ ଭାବୁଛି ମହିଳା ଅଭିନେତ୍ରୀମାନେ ସାହସୀ। ପୁରୁଷ ଅଭିନେତାମାନେ ଚତୁରତା ଏବଂ ନିରାପଦରେ ଅଭିନୟ କରନ୍ତି।"
ରାଜନୀତି ଦୃଷ୍ଟିରୁ କଙ୍ଗନାଙ୍କ ସହ ତୁଳନା କରାଯିବା ପ୍ରଶ୍ନରେ ସ୍ୱରା କହିଛନ୍ତି, "କଙ୍ଗନାଙ୍କ ରାଜନୀତି ଅତ୍ୟନ୍ତ ବ୍ୟକ୍ତିଗତ ପ୍ରସଙ୍ଗ ଉପରେ ଆଧାରିତ। ସେ ନିଜକୁ ଅଧିକ ଗୁରୁତ୍ବ ଦିଅନ୍ତି। ବଲିଉଡକୁ ନେଇ ହଙ୍ଗାମା ହେଉ କିମ୍ବା ସୁଶାନ୍ତ ସିଂହ ରାଜପୁତଙ୍କ ପ୍ରସଙ୍ଗ। ଏହା ପରେ ମଧ୍ୟ, ସେ ଯେଉଁଭଳି ଭାବରେ କଥାବାର୍ତ୍ତା କରନ୍ତି, ଏପରିକି ଚାଷୀ ଆନ୍ଦୋଳନ ସମ୍ପର୍କରେ ମଧ୍ୟ, ତାଙ୍କର ସମ୍ପୂର୍ଣ୍ଣ ରାଜନୀତି ନିଜ ଉପରେ କେନ୍ଦ୍ରିତ। ମୋ ପାଇଁ ରାଜନୀତି ହେଉଛି ସାମାଜିକ, ସାମୂହିକ ପରିବର୍ତ୍ତନର ଏକ ମଞ୍ଚ। ମୁଁ ଆଜି ପର୍ଯ୍ୟନ୍ତ ଏପରି ରାଜନୀତି କରିନାହିଁ, କିମ୍ବା ଏପରି କୌଣସି ପ୍ରସଙ୍ଗ ଉଠାଇନାହିଁ ଯେଉଁଠାରେ ମୁଁ ନିଜକୁ ଶୀର୍ଷରେ ରଖିଛି। କାମ ନମିଳିଲେ ପ୍ରତିବାଦ କରିବାର ରାଜନୀତି ମୁଁ କରେ ନାହିଁ।"
