ଧନତେରସରେ ଖୋଲିଲା ବାଙ୍କେବିହାରୀ ମନ୍ଦିରର ରହସ୍ୟମୟ କୋଠରୀ, ଜାଣନ୍ତୁ କିପରି ଥିଲା ଦୃଶ୍ୟ

ମଥୁରା ୧୮।୧୦: ଧନତେରସ ଅବସରରେ ମଥୁରାର ବିଶ୍ୱ ପ୍ରସିଦ୍ଧ ବାଙ୍କେବିହାରୀ ମନ୍ଦିରର ଏକ ବନ୍ଦଥିବା କୋଠରୀକୁ ଖୋଲା ଯାଇଛି। ଏହି କୋଠରୀକୁ ମନ୍ଦିରର କୋଷାଗାର କୁହାଯାଉଥିବା ବେଳେ ପ୍ରାୟ ୫୪ ବର୍ଷ ପରେ ଏହାକୁ ଖୋଲା ଯାଇଛି। ପାଖାପାଖି ଅର୍ଦ୍ଧ ଶତାବ୍ଦୀ ପରେ ମନ୍ଦିରର କୋଷାଗାର ଖୋଲାଯାଉଥିବା ଖବର ପ୍ରଚାରିତ ହେବାମାତ୍ରେ ସ୍ଥାନୀୟ ଲୋକେ ଓ ଶ୍ରଦ୍ଧାଳୁଙ୍କ ମଧ୍ୟରେ ବେଶ୍ ଉତ୍ସାହ ଦେଖାଯାଇଛି। ଏଣୁ କୌଣସି ପ୍ରକାରର ଅପ୍ରିୟ ଘଟଣାରୁ ବର୍ତ୍ତିବା ପାଇଁ ମନ୍ଦିର ପରିସରର ସୁରକ୍ଷାକୁ କଡ଼ାକାଡ଼ି କରାଯାଇଛି।

ମନ୍ଦିରର ସେବାୟତ ଗୋସ୍ୱାମୀ ଓ ଆଭାସ ଗୋସ୍ୱାମୀ ମନ୍ଦିରର ଏହି ରହସ୍ୟମୟ କୋଠରୀର ଇତିହାସ ସମ୍ପର୍କରେ ସୂଚନା ଦେଇଛନ୍ତି। ସେମାନେ କହିଛନ୍ତି ଏହି କୋଠରୀଟି ମନ୍ଦିରର ଗର୍ଭଗୃହକୁ ଲାଗି ରହିଛି। ତେବେ ଏହାକୁ ଠାକୁରଙ୍କ ଖଜଣା ଖାନା କୁହାଯାଇ ପାରିବ ନାହିଁ। କାରଣ ଏଠାରେ ଠାକୁରଙ୍କୁ ଭକ୍ତ ଦେଉଥିବା ଦାନ ମହଜୂଦ ରଖାଯାଏନା। ତେବେ ଏହାକୁ ସୁରକ୍ଷାଗତ କାରଣରୁ ବନ୍ଦ ରଖାଯାଏ। ଆଭାସ ଗୋସ୍ୱାମୀ କହିଛନ୍ତି ପୂର୍ବରୁ ମନ୍ଦିରରେ ବିଶେଷ ସୁରକ୍ଷା ବ୍ୟବସ୍ଥା ନଥିଲା। ଏଣୁ ଠାକୁରଙ୍କ ଦୈନନ୍ଦିନ ବ୍ୟବହାରରେ ଆସୁଥିବା ଛୋଟମୋଟ ବାସନକୁସନ, ପୋଷାକ ଓ ଅଳଙ୍କାର ଆଦି ଏଠାରେ ରଖାଯାଏ। ତେବେ ଠାକୁରଙ୍କ ଛୋଟମୋଟ ଆଭୂଷଣକୁ ପରେ ମଥୁରା ଷ୍ଟେଟବ୍ୟାଙ୍କରେ ଜମା କରାଯାଇଥିଲା।

ଶନିବାର ମନ୍ଦିରର ଏହି କୋଠରୀଟି ଖୋଲାଯିବାରୁ କିଛି ଲୋକ ଏହା ମଧ୍ୟକୁ ପ୍ରବେଶ କରିଛନ୍ତି। ସେତେବେଳେ କୋଠରୀରେ ପାଣି ଥିବାର ଦେଖାଯାଇଥିଲା। ଏଣୁ ମନ୍ଦିର ପ୍ରଶାସନ କୋଠରୀଟିକୁ ସଫାସୁତୁରା କରାଉଛି। ଆଭାସ ଗୋସ୍ୱାମୀ କହିଛନ୍ତି ଯେ ମନ୍ଦିରରେ ଅନ୍ୟ ମନ୍ଦିର ପରି ରାଜକୀୟ ଧନ ସମ୍ପତ୍ତି ନାହିଁ । ସେ କହିଛନ୍ତି ଯେ ପ୍ରାରମ୍ଭିକ ଯାଞ୍ଚରେ କୋଠରୀରୁ ସେପରି ମୂଲ୍ୟବାନ ସାମଗ୍ରୀ ମିଳି ନାହିଁ। କୋଠରୀର ସାଫସଫେଇ ପରେ ଯାହା ମିଳିବ ସେଥିରେ ଠାକୁରଙ୍କ ଦୈନନ୍ଦିନ ପୂଜା କାର୍ଯ୍ୟରେ ଆସୁଥିବା ପ୍ରାଚୀନ ବସ୍ତୁ ମିଳିବ।