ନୂଆଦିଲ୍ଲୀ,୧୦/୦୫: ଦିଲ୍ଲୀ ଅବକାରୀ ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଅନ୍ତରୀଣ ଜାମିନ ଉପରେ ଶୁକ୍ରାବାର ସୁପ୍ରିମକୋର୍ଟରେ ଫଇସଲା । କୋର୍ଟରୁ ଆପ୍ ସୁପ୍ରିମୋଙ୍କୁ ଆଶ୍ବସ୍ତି ମିଳିପାରେ । ଏହାକୁ ନେଇ ଆପ୍ ନେତା ଚାତକ ଭଳି ଚାହିଁ ରହିଛନ୍ତି । ତେବେ ଏହାର ଦିନକ ପୂର୍ବରୁ ଅର୍ଥାତ୍ ଗୁରୁବାର ପ୍ରବର୍ତ୍ତନ ନିର୍ଦ୍ଦେଶାଳୟ ସୁପ୍ରିମକୋର୍ଟରେ ସତ୍ୟପାଠ ଦାଖଲ କରିବା ସହ କେଜ୍ରିୱାଲଙ୍କ ସମ୍ଭାବ୍ୟ ଜାମିନକୁ ବିରୋଧ କରିଛି । ନିର୍ବାଚନରେ ପ୍ରଚାର କରିବା ମୌଳିକ ଅଧିକାର ନୁହେଁ ବୋଲି ଇଡି କହିଛି ।
ସୁପ୍ରିମକୋର୍ଟରେ ଇଡି ନିଜ ଯୁକ୍ତିରେ ଦର୍ଶାଇଛି ଯେ କେଜ୍ରିୱାଲ ନିର୍ବାଚନ ଲଢ଼ୁନାହାନ୍ତି । ଏହା ପୂର୍ବରୁ କୌଣସି ନେତାଙ୍କୁ ନିର୍ବାଚନୀ ପ୍ରଚାର ନିମନ୍ତେ ନ୍ୟାୟିକ ହାଜତରୁ ଜାମିନ ପ୍ରଦାନ କରାଯାଇ ନାହିଁ । ପ୍ରଚାର କରିବା ମୌଳିକ ଅଧିକାର ନୁହେଁ । ତେଣୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଜାମିନ ଦେବା ଯୁକ୍ତିଯୁକ୍ତ ନୁହେଁ । ଗତ ୭ ତାରିଖରେ ଶୁଣାଣି ବେଳେ ସୁପ୍ରିମକୋର୍ଟ ଇଡିକୁ କହିଥିଲେ ଯେ ନିର୍ବାଚନ ୫ ବର୍ଷକୁ ଥରେ ଆସେ । ଏହା ଅସାଧାରଣ ପରିସ୍ଥିତି । ଯଦି ଆମେ କେଜ୍ରିୱାଲଙ୍କୁ ଜାମିନ ପ୍ରଦାନ କରୁ ତେବେ ସେ ଦିଲ୍ଲୀ ସରକାରରେ କୌଣସି ପ୍ରକାର ହସ୍ତକ୍ଷେପ କରିବେ ନାହିଁ । ଏହି ସର୍ତ୍ତରେ କେଜ୍ରିୱାଲଙ୍କୁ ଜାମିନ ମିଳିବା ନେଇ ଆଶା କରାଯାଉଥିବାରୁ ତାହା ପୂର୍ବରୁ ଇଡି ସତ୍ୟପାଠ ଦାଖଲ କରି ଜାମିନକୁ ରୋକିବାକୁ ଉଦ୍ୟମ କରିଛି ।
ସୁପ୍ରିମକୋର୍ଟ କହିଥିଲେ, ଶୁକ୍ରବାର କେଜ୍ରିୱାଲଙ୍କ ଅନ୍ତରୀଣ ଜାମିନ ଉପରେ ରାୟ ଶୁଣାଇବୁ । ଗିରଫଦାରିକୁ ଚ୍ୟାଲେଞ୍ଜ୍ ଦିଆଯିବା ସଂକ୍ରାନ୍ତ ମୁଖ୍ୟ ମାମଲା ଉପରେ ମଧ୍ୟ ଶୁକ୍ରବାର ନିଷ୍ପତ୍ତି ନିଆଯିବ । ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ମୁଖ୍ୟମନ୍ତ୍ରୀ କେଜ୍ରିୱାଲ ଏପ୍ରିଲ ୧ରୁ ତିହାର ଜେଲରେ ବନ୍ଦୀ ଅଛନ୍ତି । ସେ ପ୍ରଚାର କରିପାରୁ ନାହାନ୍ତି । ଆପ୍ର ଗଡ଼ ବୋଲାଉଥିବା ଦିଲ୍ଲୀରେ ମେ ୨୫ରେ ସମସ୍ତ ୭ ଲୋକସଭା ଆସନରେ ମତଦାନ ହେବ । ସେହିଭଳି ଆପ୍ ସରକାର ଚାଲିଥିବା ପଞ୍ଜାବରେ ଜୁନ୍ ୧ରେ ଲୋକସଭା ନିର୍ବାଚନ ହେବ । କେଜ୍ରିୱାଲଙ୍କ ଅନୁପସ୍ଥିତିରେ ତାଙ୍କ ପତ୍ନୀ ସୁନୀତା କେଜ୍ରିୱାଲ ଦଳର ପ୍ରଚାର ମଙ୍ଗ ଧରିଛନ୍ତି ।
