ହାଇଦ୍ରାବାଦ: କ୍ରିକେଟ୍କୁ କାହିଁକି ଅନିଶ୍ଚିତତାର ଖେଳ କୁହାଯାଏ, ତାହା ଆଜି ପୁଣି ଥରେ ପ୍ରମାଣିତ ହୋଇଛି। ୨୪୫ ରନ ସ୍କୋର ବି ଜିତି ପାରୁଟି ଟିମ୍। ଏମିତି ଅବିଶ୍ଵସନୀୟ ମ୍ୟାଚ୍ ଦେଖିବାକୁ ମିଳିଛି ଆଇପିଏଲ୍ ୨୦୨୫ର ୨୭ତମ ମୁକାବିଲାରେ। ଚୌକା-ଛକାର ବର୍ଷାରେ ଉଛୁଳିଲା ହାଇଦ୍ରାବାଦର ଷ୍ଟାଡିୟମ। ଆଉ ହାଇ ସ୍କୋରିଂ ମ୍ୟାଚ୍ରେ ବାଜି ମାରିଲା ସନରାଇଜର୍ସ ହାଇଦ୍ରାବାଦ। ଅଭିଷେକ ଶର୍ମାଙ୍କ ବିଧ୍ଵଂସୀ ଶତକ ଓ ଟ୍ରେଭିସ ହେଡଙ୍କ ଅର୍ଦ୍ଧଶତକ ବଳରେ ହାଇଦ୍ରାବାଦ ପଞ୍ଜାବ କିଙ୍ଗ୍ସ ଦ୍ଵାରା ଧାର୍ଯ୍ୟ ୨୪୬ ରନର ବିଜୟ ଲକ୍ଷ୍ୟକୁ ୧୮.୩ ଓଭରରେ ୨ ଓ୍ଵିକେଟ୍ ହରାଇ ସହ ଜରେ ହାସଲ କରି ନେଇଛି। ଆଇପିଏଲ୍ ଇତିହାସରେ ଦ୍ଵିତୀୟ ସର୍ବାଧିକ ସଫଳ ରନ ଚେଜ କରିଛି ହାଇଦ୍ରାବାଦ। ସବୁଠୁ ସଫଳ ରନ ଚେଜର ରେକର୍ଡ ପଞ୍ଜାବ କିଙ୍ଗ୍ସ ନାଁରେ ରହିଛି। ଦଳ ୨୦୨୪ରେ କୋଲକାତା ନାଇଟ୍ ରାଇଡର୍ସ ବିପକ୍ଷରେ ୨୬୨ ରନର ବିଜୟ ଲକ୍ଷ୍ୟ ସଫଳତାର ହାସଲ କରିଥିଲା।
ପ୍ରଥମେ ବ୍ୟାଟିଂ କରିଥିବା ପଞ୍ଜାବ ୬ ଓ୍ଵିକେଟ୍ ହରାଇ ୨୪୫ ରନ କରିଥିଲା। ଅଧିନାୟକ ଶ୍ରେୟସ ଆୟର ୮୨ ରନ କରିଥିବା ବେଳେ ପ୍ରଭସିମରନ ସିଂ ୪୨ ରନ କରିଥିଲେ। ଜବାବରେ ହାଇଦ୍ରାବାଦ ୯ଟି ବଲ ବାକି ଥାଇ ମାତ୍ର ୨ ଓ୍ଵିକେଟ୍ ହରାଇ ଲକ୍ଷ୍ୟ ହାସଲ କରି ନେଇଛି। ଅଭିଷେକ ଶର୍ମା ୫୫ ବଲ୍ରୁ ୧୪ ଚୌକା ଓ ୧୦ ଛକା ସହ ୧୪୧ ରନ ଖେଳି ଦଳକୁ ସହଜରେ ଜିତାଇଛନ୍ତି। ଟ୍ରେଭିସ ହେଡ ୬୬ ରନର ଇନିଂସ ଖେଳିଛନ୍ତି। ଲଗାତାର ୪ ପରାଜୟ ପରେ ଶେଷରେ ବିଜୟର ସ୍ଵାଦ ଚାଖିଛି ହାଇଦ୍ରାବାଦ। ଦଳ ପଏଣ୍ଟ ଟେବୁଲର ଅଷ୍ଟମକୁ ଉଠିଛି। ଅନ୍ୟପଟେ ପଞ୍ଜାବ କିଙ୍ଗ୍ସ ପଞ୍ଚମ ମ୍ୟାଚ୍ରୁ ଦ୍ଵିତୀୟ ପରାଜୟ ଭୋଗିଛି।
ପଞ୍ଜାବ କିଙ୍ଗ୍ସ ବୋର୍ଡରେ ୨୪୫ ରନ କରିବା ପରେ କେହି ଏମିତି ଆଶା କରି ନ ଥିଲେ ମ୍ୟାଚ୍ର ଗତି ଏମିତି ମୋଡ ନେବ। ହାଇଦ୍ରାବାଦର ଦୁଇ ଓପନର ଅଭିଷେକ ଶର୍ମା ଓ ଟ୍ରେଭିସ ହେଡ୍ କ୍ରିଜକୁ ଓହ୍ଲାଇବା ମାତ୍ରେ ଧୂଆଁଧାର ବ୍ୟାଟିଂ କରିଥିଲେ। ବିଶେଷ କରି ଅଭିଷେକ ଶର୍ମା ପଞ୍ଜାବ ବୋଲରଙ୍କୁ ନିର୍ମମ ପ୍ରହାର କରିଥିଲେ। ଦୁଇ ବ୍ୟାଟରଙ୍କ ଆଗରେ ବିବଶ ନଜର ଆସିଥିଲେ ପଞ୍ଜାବର ବୋଲର। ଚୌକା ଓ ଛକା ବର୍ଷା କରି ଚାଲିଥିଲେ ଅଭିଷେକ। ଦୁଇ ବ୍ୟାଟର ପ୍ରଥମ ଓ୍ଵିକେଟ୍ରେ ମାତ୍ର ୧୨.୨ ଓଭରରେ ୧୭୧ ରନ ଯୋଡ଼ି ଦଳର ବିଜୟ ସୁନିଶ୍ଚିତ କରିଥିଲେ। ଟ୍ରେଭିସ ହେଡ ୩୭ ବଲରୁ ୯ ଚୌକା ଓ ୩ ଛକା ସହ ୬୬ ରନ କରି ପାଭିଲିୟନ ଫେରିଥିଲେ।
ଅନ୍ୟପଟେ ଅଭିଷେକଙ୍କ ବିସ୍ଫୋରଣ ଜାରି ରହିଥିଲା। ସେ ୪୦ ବଲ୍ରୁ ଶତକ ପୂରଣ କରିଥିଲେ। ୨୨୨ ରନ ସ୍କୋରରେ ଏହି ବାମହାତୀ ବ୍ୟାଟରଙ୍କ ଅବିସ୍ମରଣୀୟ ଇନିଂସର ଅନ୍ତ ଘଟିଥିଲା। ଅଭିଷେକ ମାତ୍ର ୫୫ ବଲରୁ ୧୪ ଚୌକା ଓ ୧୦ ଛକା ସହ ୧୪୧ ରନ କରି ଦଳର ବିଜୟ ସହଜ କରିଥିଲେ। ହେନରିକ କ୍ଲାସେନ ୨୧ ରନ ଓ ଇଶାନ କିଶନ ୯ ରନ କରି ଦଳ ବିଜୟର ଔପଚାରିକତା ପୂରଣ କରିଥିଲେ।
ଏଥିସହ ଆଇପିଏଲ୍ ଇତିହାସରେ ଦ୍ଵିତୀୟ ସବୁଠୁ ସଫଳ ବିଜୟ ଲକ୍ଷ୍ୟ ପିଛା କରି ଇତିହାସ ରଚିଛି ହାଇଦ୍ରାବାଦ। ସବୁଠୁ ସଫଳ ରନ ଚେଜର ରେକର୍ଡ ପଞ୍ଜାବ କିଙ୍ଗ୍ସ ନାଁରେ ରହିଛି। ଦଳ ୨୦୨୪ରେ କୋଲକାତା ନାଇଟ୍ ରାଇଡର୍ସ ବିପକ୍ଷରେ ୨୬୨ ରନର ବିଜୟ ଲକ୍ଷ୍ୟ ସଫଳତାର ହାସଲ କରିଥିଲା। କୋଲକାତା ୨୬୧ ରନ କରିଥିଲା। ବୋଲିଂରେ ପଞ୍ଜାବର ସମସ୍ତ ବୋଲର ମହଙ୍ଗା ସାବ୍ୟସ୍ତ ହୋଇଛନ୍ତି।
