ପୁଣି ଚର୍ଚ୍ଚାକୁ ଫେରିଲା ମହାନଦୀ ଜଳବିବାଦ ପ୍ରସଙ୍ଗ : କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏ ପ୍ରସଙ୍ଗରେ ମତ ରଖିବା ପରେ ବୟାନବାଜି

ଭୁବନେଶ୍ବର୨୨।୧୧: ମହାନଦୀ ଜଳବିବାଦ ସମାଧାନ ପାଇଁ ଅଭିମାନ ନୁହେଁ ଦରକାର ସହମତି । ଏ ପ୍ରସଙ୍ଗରେ ରାଜନୈତିକ ମତଭେଦରୁ ଉର୍ଦ୍ଧ୍ବକୁ ଯାଇ ସ୍ବର ଏକ କଲେ ବାହାରିବ ସମାଧାନର ରାସ୍ତା । ଡଃ ହରେକୃଷ୍ଣ ମହତାବଙ୍କ ଜୟନ୍ତୀରେ ଯୋଗଦେବା ଅବସରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହିକଥା କହିବା ପରେ ପୁଣି ରାଜନୈତିକ ବିତର୍କକୁ ଫେରିଛି ଏହି ପ୍ରସଙ୍ଗ । ଧର୍ମେନ୍ଦ୍ର କହିଛନ୍ତି ଯଦି ଓଡ଼ିଶାରେ ରାଜନୈତିକ ସହମତି ପ୍ରକାଶ ପାଇବ ତାହାଲେ ସମାଧାନର ବାଟ ଫିଟିବ । ଆଉ ଆବଶ୍ୟକ ହେଲେ ସେ ଏପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ ଭେଟି ଆଲୋଚନା କରିବାକୁ ପ୍ରସ୍ତୁତ । କେବେ ମହାନଦୀ ଜଳ ବିବାଦର ସମାଧାନ ହେବ, କେବେ ଛତିଶଗଡ ସରକାର ତାଙ୍କର ମନମାନି ବନ୍ଦ କରିବେ ସେନେଇ ବିରୋଧି ପ୍ରଶ୍ନ କରୁଥିବା ବେଳେ ଧର୍ମେନ୍ଦ୍ରଙ୍କ ମନ୍ତବ୍ୟ ପ୍ରସଙ୍ଗକୁ ପୁଣି ରାଜନୈତିକ ବିତର୍କକୁ ଠେଲିଛି ।

କେନ୍ଦ୍ରମନ୍ତ୍ରୀଙ୍କ ବୟାନ ପରେ ବିଜେଡି ଓ କଂଗ୍ରେସ ତୀବ୍ର ପ୍ରତିକ୍ରିୟା ରଖିଛନ୍ତି । ବିଜେଡି କହିଛି, ନିର୍ବାଚନ ପ୍ରଚାର ସମୟରେ ଏନେଇ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ। ଓଡ଼ିଶାରେ ବିଜେପି, କେନ୍ଦ୍ରରେ ବିଜେପି ଏବଂ ଛତିଶଗଡ଼ରେ ବିଜେପି ସରକାର ଥିବାବେଳେ ପୁଣି ବିରୋଧୀ ଦଳଙ୍କୁ ସାଥିରେ ନେବାର କ’ଣ ଅଛି ବୋଲି ପ୍ରଶ୍ନ କରିଛି ବିଜେଡ଼ି । କଂଗ୍ରେସ କହିଛି, ବହୁ ପୂର୍ବରୁ ମହାନଦୀ ଲଢେଇ ଜାରି ରଖିଛି ଦଳ । ଯଦି କେନ୍ଦ୍ରମନ୍ତ୍ରୀ କହୁଛନ୍ତି ସର୍ବଦଳୀୟ ଆଲୋଚନା ହେଉ, ତାହାଲେ କେନ୍ଦ୍ରମନ୍ତ୍ରୀ ବୈଠକ ଡାକନ୍ତୁ, ସେମାନେ ଆଲୋଚନାକୁ ଆସିବେ । ବିରୋଧୀଙ୍କୁ ଉତ୍ତର ଦେଇ ଶାସକ ଦଳ କହିଛି, ମହାନଦୀ ଜଳ ବିବାଦ ଏକ ରାଜ୍ୟ ସ୍ବାର୍ଥ ପ୍ରସଙ୍ଗ । ଏଥିପାଇଁ ଦଳ ମତ ନିର୍ବିଶେଷରେ ସବୁ ଦଳ ଏକାଠି ହେବାର ଆବଶ୍ୟକତା ରହିଛି । ପୂର୍ବ ସରକାର ଏହି ପ୍ରସଙ୍ଗରେ ଯାହା କରିବା କଥା ତାହା କରି ନାହାନ୍ତି । କେନ୍ଦ୍ରମନ୍ତ୍ରୀ ଯେଉଁ ପ୍ରସ୍ତାବ ଦେଇଛନ୍ତି ତାହା ସ୍ବାଗତଯୋଗ୍ୟ ପଦକ୍ଷେପ ।