ନୂଆଦିଲ୍ଲୀ ୨୮।୮: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସଇ) ୨୦୨୫-୨୬ରେ ହେବାକୁ ଥିବା ୧୦ମ ଓ ଦ୍ୱାଦଶ ବୋର୍ଡ ପରୀକ୍ଷାକୁ ନେଇ ବଡ଼ ନିଷ୍ପତ୍ତି ନେଇଛି। ଏବେ ପରୀକ୍ଷାରେ ବସିବା ପାଇଁ ଛାତ୍ରଛାତ୍ରୀଙ୍କ ନିମନ୍ତେ ‘ଅପାର’ ଆଇଡି ବାଧ୍ୟତାମୂଳକ କରାଯାଇଛି। ଯେଉଁ ଛାତ୍ରଛାତ୍ରୀଙ୍କର ଏହି ଡିଜିଟାଲ ଆଇଡି ନଥିବ ସେମାନେ ବୋର୍ଡ ପରୀକ୍ଷାରେ ବସି ପାରିବେ ନାହିଁ। ସିବିଏସିଇ ପକ୍ଷରୁ ସ୍କୁଲ ମାନଙ୍କୁ ପଠାଯାଇଥିବା ଗାଇଲାଇନସରେ ଏହି ନିର୍ଦ୍ଦେଶ ରହିଛି ଯାହାକୁ ପାଳନ କରି ଲିଷ୍ଟ ଅଫ କ୍ୟାଣ୍ଡିଡେଟସ୍ (ଏଲଓସି) ଜମା କରିବା ବାଧ୍ୟତାମୂଳକ କରାଯାଇଛି।
ଉଲ୍ଲେଖଯୋଗ୍ୟ ଯେ ପ୍ରତିବର୍ଷ ସ୍କୁଲମାନେ ବୋର୍ଡ ପରୀକ୍ଷା ଆୟୋଜନ ପୂର୍ବରୁ ନିଜ ଛାତ୍ରଛାତ୍ରୀଙ୍କ ସମ୍ପର୍କରେ ସିବିଏସଇକୁ ଡାଟା ପଠାଇଥାନ୍ତି। ଏହି ଆଧାରରେ ଆଡମିଟ କାର୍ଡ ତିଆରି ହେବା ସହ ପରୀକ୍ଷା ପ୍ରକ୍ରିୟା ନିର୍ଦ୍ଧାରିତ ହୋଇଥାଏ। ତେବେ ଚଳିତବର୍ଷ ଏହି ବ୍ୟବସ୍ଥା ବଦଳି ଯାଇଛି। ବୋର୍ଡ ସବୁ ସ୍କୁଲମାନଙ୍କୁ ୨୯ଅଗଷ୍ଟରୁ ୩୦ ସେପ୍ଟେମ୍ବର ୨୦୨୫ ସୁଦ୍ଧା ଅନଲାଇନ ମାଧ୍ୟମରେ ଏଲଓସି ଜମା କରିବାକୁ ନିର୍ଦ୍ଦେଶ ଦେଇଛି। ଯେଉଁମାନେ ଡେରିରେ ଏଲଓସି ଜମା କରିବେ ସେମାନଙ୍କୁ ଏଥି ପାଇଁ ବିଳମ୍ବ ଶୁଳ୍କ ସହିତ ଏହି ପ୍ରକ୍ରିୟା ପୁରା କରିବାକୁ ପଡିବ।
ବୋର୍ଡ ସ୍ପଷ୍ଟ ରୂପେ କହିଛି ଯେ ଏଲଓସି ଓ ଶୁଳ୍କ ଜମା କରିବାର ଶେଷ ତାରିଖ ଗୋଟିଏ ହେବ, ଅର୍ଥାତ ଫର୍ମ ଓ ଫି ଉଭୟ ସମୟ ମଧ୍ୟରେ ଜମା କରିବାକୁ ପଡିବ। କେବଳ ସେହି ଛାତ୍ରଛାତ୍ରୀ ବୋର୍ଡ ପରୀକ୍ଷାରେ ବସି ପାରିବେ ଯେଉଁମାନଙ୍କ ନାମ ଏଲଓସିରେ ଥିବ। ଏଣୁ ସ୍କୁଲମାନଙ୍କୁ ଏହା ସୁନିଶ୍ଚିତ କରିବାକୁ କୁହାଯାଇଛି ସେମାନେ ଛାତ୍ରଙ୍କ ନାମ, ଜନ୍ମ ତାରିଖ, ଲିଙ୍ଗ, ଶ୍ରେଣୀ ଓ ଅଭିଭାବକଙ୍କ ନାମ ସାବଧାନତା ପୂର୍ବକ ଯାଞ୍ଚ କରି ବୋର୍ଡକୁ ପଠାନ୍ତୁ।
ସିବିଏସଇ ଚଳିତବର୍ଷ ବୋର୍ଡ ପରୀକ୍ଷାକୁ ଅପାର ଆଇଡି ସହ ଯୋଡିବାକୁ ନିଷ୍ପତ୍ତି ନେଇଛି। ଅପାର ଆଇଡି ଭାରତ ସରକାରଙ୍କ ଦ୍ୱାରା ଆରମ୍ଭ କରାଯାଇଥିବା ୧୨ ଅଙ୍କର ଡିଜିଟାଲ ପରିଚୟ ଅଟେ, ଯେଉଁଥିରେ ଛାତ୍ରଛାତ୍ରୀଙ୍କ ଶୈକ୍ଷଣିକ ରେକର୍ଡ ଡିଜିଟାଲୀ ରକେର୍ଡ ହୋଇଥାଏ। ଏଥିରେ ଛାତ୍ରଛାତ୍ରୀଙ୍କ ମାର୍କସିଟ୍, ଡିଗ୍ରି, ସାର୍ଟିଫିକେଟ, ଛାତ୍ରବୃତ୍ତି, ପୁରସ୍କାର ଓ ଅନ୍ୟ ଶିକ୍ଷାଗତ ଉପଲବ୍ଧି ସୁରକ୍ଷିତ ରହିବ। ଅର୍ଥାତ ଅପାର ଆଇଡି ଦ୍ୱାରା ଛାତ୍ର ଯେ କୌଣସିଠାରେ ପଢନ୍ତୁନା କାହିଁକି ତାଙ୍କର ଶିକ୍ଷା ଇତିହାସ ଗୋଟିଏ ପ୍ଲାଟଫର୍ମରେ ଉପଲବ୍ଧ ରହିବ। ସିବିଏସଇର ଯୁକ୍ତି ହେଉଛି ଏହି ପଦକ୍ଷେପ କେବଳ ପରିଚୟର ପାରଦର୍ଶିତା ସୁନିଶ୍ଚିତ କରିବନି ଭବିଷ୍ୟତରେ ପରୀକ୍ଷା ଓ ଫଳାଫଳରେ ଗଡ଼ବଡିକୁ ମଧ୍ୟ ରୋକିବ।
