କାବୁଲ ୧୬।୦୪ : ଭୂକମ୍ପରେ ଥରିଲା ଆଫଗାନିସ୍ତାନ । ବୁଧବାର ଭୋର ସମୟରେ ଆଫଗାନିସ୍ତାନରେ ଜୋରଦାର ଭୂକମ୍ପ ଝଟ୍କା ଅନୁଭୂତ ହୋଇଛି । ଯାହାର ତୀବ୍ରତା ରିକ୍ଟର ସ୍କେଲରେ ୫.୯ ରହିିଥିଲା । ହିନ୍ଦୁକୁଶ ଅଞ୍ଚଳରେ ଭୁପୃଷ୍ଠରୁ ୭୫ କିଲୋମିଟର ଗଭୀରତାରେ ଏହି ଭୂକମ୍ପର କେନ୍ଦ୍ର ସୃଷ୍ଟି ହୋଇଛି । ଭୂକମ୍ପର ଝଟ୍କା ଦିଲ୍ଲୀ-ଏନସିଆର ସମେତ ଉତ୍ତର ଭାରତର କେତେକ ସ୍ଥାନରେ ଅନୁଭୂତ ବି ହୋଇଛି ।
ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ରର ରିପୋର୍ଟ ଅନୁସାରେ, ଭୂକମ୍ପର କେନ୍ଦ୍ରସ୍ଥଳ ହିନ୍ଦୁକୁଶ ବୋଲି କୁହାଯାଉଛି । ସେପଟେ ୟୁରୋପିଆନ୍-ମେଡିଟେରିଆନ୍ ସିସମୋଲୋଗିକାଲ୍ ସେଣ୍ଟର (EMSC) ଅନୁସାରେ ବଗଲାନଠାରୁ ୧୬୪ କିଲୋମିଟର ପୂର୍ବରେ ଏହା କେନ୍ଦ୍ରସ୍ଥଳ ରହିଛି । ବଗଲାନ ସହରର ଜନସଂଖ୍ୟା ୧,୦୮,୦୦୦ ରହିଛି । ଇଏମଏସସି ଦ୍ୱାରା ପ୍ରଥମେ ଭୂକମ୍ପର ତୀବ୍ରତା ୬.୪ ଥିବା କହୁଯାଇଥିଲା, କିନ୍ତୁ ପରେ ଏହାକୁ ସଂଶୋଧିତ କରି ୫.୬ ବୋଲି ରିପୋର୍ଟ କରାଗଲା ।
ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ରର ଏକ୍ସରେ ସେୟାର କରିଥିବା ସୂଚନା ଅନୁସାରେ ଭୋର ୫.୧୪ରେ ୩୩.୧୮ ଉତ୍ତର ଅକ୍ଷାଂଶ ଓ ୭୫.୮୯ ପୂର୍ବ ଦ୍ରାଘିମା ମଧ୍ୟରେ ଭୂକମ୍ପ ହୋଇଛି । ଭୂକମ୍ପର ଗଭୀରତା ୫ କିଲୋମିଟର ରହିଛି । UNOCHA ଅନୁସାରେ ଆଫଗାନିସ୍ତାନ ପ୍ରାକୃତିକ ବିପର୍ଯ୍ୟର କେନ୍ଦ୍ରସ୍ଥଳି ହୋଇ ରହିଛି । ଏଠାରେ ଲଗାତାର ଭାବେ ବନ୍ୟା, ଭୂସ୍ଖଳନ ଓ ଭୂକମ୍ପ ଝଟକା ଦେଖିବାକୁ ମିଳୁଛି ।
