ବନ୍ଦ ହେବ ଅଣଛାତ୍ରଙ୍କ ଦାଦାଗିରି: ଜାରି ହେଲା କଡା ନିୟମ, ଉତ୍କଳ ବିଶ୍ୱବିଦ୍ୟାଳୟ କ୍ୟାମ୍ପସରେ ଆଇ କାର୍ଡ ବାଧ୍ୟତାମୂଳକ

ଭୁବନେଶ୍ୱର: ଉତ୍କଳ ବିଶ୍ୱବିଦ୍ୟାଳୟ କୁଳସଚିବଙ୍କ ନୂଆ ନିୟମ। ଏଣିକି କ୍ୟାମ୍ପସ ଭିତରକୁ ପ୍ରବେଶ କଲେ ଆଇ କାର୍ଡ ପିନ୍ଧିବା ବାଧ୍ୟତାମୂଳକ। ନିୟମ ପାଳନ ନ କଲେ ପୋଲିସ ନେବ କଡା କାର୍ଯ୍ୟାନୁଷ୍ଠାନ। ବିଶ୍ୱବିଦ୍ୟାଳୟ ଭିତରେ ଶୃଙ୍ଖଳା ଓ ସୁରକ୍ଷାକୁ ସୁଦୃଢ କରିବା ପାଇଁ ବିଶ୍ୱବିଦ୍ୟାଳୟ ପକ୍ଷରୁ କଡା ନିର୍ଦେଶାବଳୀ ଜାରି ହୋଇଛି।

ଏହି ନୂଆ ନିୟମ ଜାରି କରିବା ପୂରା ଆକ୍ସନ ମୋଡରେ ଉତ୍କଳ ବିଶ୍ୱବିଦ୍ୟାଳୟର କୁଳ ସଚିବ। ଛାତ୍ରଛାତ୍ରୀଙ୍କ ସୁରକ୍ଷା ପାଇଁ ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି। ଯଦି କୌଣସି ଛାତ୍ର ଆଇ କାର୍ଡ ନ ପିନ୍ଧନ୍ତି ତେବେ ପୁଲିସ ସେମାନଙ୍କ ବିରୁଦ୍ଧରେ ଆକ୍ସନ ନେବ ବୋଲି ଘୋଷଣା କରାଯାଇଛି। ଅନେକ ସମୟରେ କ୍ୟାମ୍ପସ ଭିତରେ ହେଉଥିବା ବିଶୃଙ୍ଖଳା ଓ ଅପ୍ରତିକର ପରିସ୍ଥିତିକୁ ମୁକାବିଲା କରିବା ପାଇଁ ଏଭଳି ଏକ ନିର୍ଦ୍ଦେଶନାମା ଜାରି କରିଛି ଉତ୍କଳ ବିଶ୍ୱବିଦ୍ୟାଳୟ। ଏ ନେଇ ଏକ ସ୍ୱତନ୍ତ୍ର ବିଜ୍ଞପ୍ତି ମଧ୍ୟ ଜାରି କରିଛନ୍ତି ଉତ୍କଳ ବିଶ୍ୱବିଦ୍ୟାଳୟର କୁଳସଚିବ।

୧୮ ଫେବୃଆରୀ୨୦୨୬ରେ ଜାରି ହୋଇଥିବା ଏହି ନିର୍ଦ୍ଦେଶାବଳୀର କ୍ୟାମ୍ପସର ସୁରକ୍ଷା ଓ ଶୈଖିକ ବାତାବରଣକୁ ସୁଦୃଢ ରଖିବା ପାଇଁ ଲକ୍ଷ୍ୟ ରଖାଯାଇଛି। ତେବେ ଏହି ନୂଆ ନିୟମାନୁଯାୟୀ ବିଶ୍ୱବିଦ୍ୟାଳୟର ସୁରକ୍ଷା କର୍ମୀମାନେ ଯେକୌଣସି ସମୟରେ ଛାତ୍ରଛାତ୍ରୀଙ୍କ ପରିଚୟ ପତ୍ର ଯାଞ୍ଚ କରିପାରିବେ । ଯଦି ସେଥିରେ କୌଣସି ତ୍ରୁଟି ଦେଖାଯାଏ ତେବେ ତୁରନ୍ତ ନିଆଯିବ କାର୍ଯ୍ୟାନୁଷ୍ଠାନ। ଆଉ ଯେଉଁ ନିୟମକୁ ସ୍ୱାଗତ କରିଛନ୍ତି ବିଶ୍ୱବିଦ୍ୟାଳୟର ଛାତ୍ରଛାତ୍ରୀ।

ଉତ୍କଳବିଶ୍ୱବିଦ୍ୟାଳୟ ରାଜ୍ୟର ଏକ ବୃହତ ଓ ଅଗ୍ରଣୀ ଶିକ୍ଷାନୁଷ୍ଠାନ। ଓଡ଼ିଶାର ପ୍ରାୟ ସମସ୍ତ ଜିଲ୍ଲାର ପିଲାମାନେ ଏଠାକୁ ପାଠ ପଢିବାକୁ ଆସିଥାନ୍ତି । ହେଲେ ଅନେକ ସମୟରେ କ୍ୟାମ୍ପସ ଭିତରେ ହେଉଥିବା ଅନୈତିକ କାର୍ଯ୍ୟକଳାପ ପାଇଁ ଅସୁବିଧାର ସମ୍ମୁଖୀନ ହୋଇଥାନ୍ତି ଏଠି ଅଧ୍ୟୟନରତ ଛାତ୍ରଛାତ୍ରୀ । ଆଗରୁ ଅଣଛାତ୍ର ଏଠି ବିଭିନ୍ନ ହଷ୍ଟେଲକୁ ଜବରଦଖଲ କରି ରଖିଥିଲେ। ଆଉ ଯାହାକୁ ନେଇ କ୍ୟାମ୍ପସ ନେଇଥିଲା ଦୃଢ କାର୍ଯ୍ୟାନୁଷ୍ଠାନ। ଆଉ ଆଗକୁ ଏମିତି ବିଶୃଙ୍ଖଳା ନ ଘଟିବାକୁ ଦୃଷ୍ଟିରେ ରଖି ଏମିତି ଏକ କଡା ନିୟମ ପ୍ରଣୟନ କରିଛି ବିଶ୍ୱବିଦ୍ୟାଳୟ।

କୁଳସଚିବଙ୍କ ଦ୍ୱାରା ଜାରି କରାଯାଇଥିବା ଏହି ନିର୍ଦ୍ଦେଶାବଳୀ ମଧ୍ୟରେ ପରିସର ମଧ୍ୟରେ ଏକାଧିକ କଡ଼ା ନିୟମ ଲାଗୁ କରାଯାଇଛି। ଏବେ ବିଶ୍ୱବିଦ୍ୟାଳୟ ପରିସର ମଧ୍ୟରେ ଥିବା ସମସ୍ତ ଛାତ୍ରଛାତ୍ରୀଙ୍କ ପାଇଁ ବୈଧ ପରିଚୟ ପତ୍ର (ID Card)ସାଥୀରେ ରଖିବା ବାଧ୍ୟତାମୂଳକ କରାଯାଇଛି। ଯଦି କୌଣସି ଛାତ୍ର କ୍ୟାମ୍ପସରେ ରହିବାର ସଠିକ୍ କାରଣ ଦର୍ଶାଇ ନ ପାରନ୍ତି,ତେବେ ତାଙ୍କୁ ଜଣେ'ଅନଧିକୃତ ବ୍ୟକ୍ତି'ଭାବେ ଗଣନା କରାଯିବ ଏବଂ ପୋଲିସ ଜିମା ଦିଆଯିବ। ସେହିଭଳି କ୍ୟାମ୍ପସ ଭିତରେ ସମସ୍ତ ପ୍ରକାରର ନିଶାଦ୍ରବ୍ୟ,ତମ୍ବାଖୁ,ସିଗାରେଟ୍ ଏବଂ ଭେପ୍ସ ପ୍ରମୁଖ ଦ୍ରବ୍ୟଗୁଡ଼ିକର ବ୍ୟବହାର ଓ ବିକ୍ରି ଉପରେ ମଧ୍ୟ ସମ୍ପୂର୍ଣ ରୋକ ଲଗାଯାଇଛି। ଯାହାଫଳରେ ସମ୍ପୂର୍ଣ୍ଣ ସୁରକ୍ଷା ବଳୟରେ ରହିପାରିବ ବିଶ୍ୱବିଦ୍ୟାଳୟ କ୍ୟାମ୍ପସ। ତେବେ କୁଲସଚିବ ଜାରି କରିଥିବା ଏହି ନୂଆ ନିୟମକୁ କେତେ କଡ଼ାକଡ଼ି ଭାବେ ପାଳନ କରାଯାଉଛି ଓ ଏହାର ଫଳାଫଳ କଣ ବାହାରୁଛି ତା ଉପରେ ସମସ୍ତଙ୍କ ନଜର ରହିଛି।