ଭୁବନେଶ୍ଵର: ଭକ୍ତଙ୍କ ନଜର ଏବେ ବିଜେଡି ନେତାଙ୍କ ଉପରେ, ଯେଉଁ ନେତାମାନେ ନିର୍ବାଚନ ସମୟରେ କଂଗ୍ରେସ ଛାଡ଼ି ବିଜେଡିରେ ମିଶିଥିଲେ।ତେବେ ନିର୍ବାଚନରେ ଦଳ କ୍ଷମତାଚ୍ୟୁତ ହେବା ପରେ ଏହି ନେତାମାନେ ଏବେ ଏକପ୍ରକାର ଏକଘରକିଆ ହୋଇପଡିଛନ୍ତି। ତେଣୁ ନୂଆ ପିସିସି ମୁଖିଆ ଭକ୍ତ ଦାସଙ୍କ ଡାକରା ସେମାନଙ୍କୁ ସଞ୍ଜିବନୀ ଦେଇଛି। ଏବଂ ଭକ୍ତ ଦାସଙ୍କ ସର୍ବକ୍ଷମା ଯୋଜନା ପରେ ସେମାନେ ବିଜେଡି ଛାଡି କଂଗ୍ରେସକୁ ଫେରି ପାରନ୍ତି ବୋଲି ଚର୍ଚ୍ଚା ହେଉଛି। ରାଜ୍ୟ କଂଗ୍ରେସର ଦାୟିତ୍ବ ନେବା ପରେ ଆସନ୍ତା ମଙ୍ଗଳବାର ଓଡିଶା ଆସୁଛନ୍ତି ଭକ୍ତ ଦାସ।ସେହିଦିନ କଂଗ୍ରେସ ଆରମ୍ଭ କରିବ ସଂକଳ୍ପ ପଦଯାତ୍ରା। ଭୁବନେଶ୍ବରରୁ ପୁରୀ ପର୍ଯନ୍ତ ହେବ ପଦଯାତ୍ରା।
ପିସିସି ମଙ୍ଗ ଧରୁଧରୁ ଆକ୍ସନ ମୁଡରେ ଭକ୍ତ ଦାସ। ଭକ୍ତଙ୍କ ନଜର ଏବେ ବିଜେଡି ନେତାଙ୍କ ଉପରେ।ନିର୍ବାଚନ ପୂର୍ବରୁ ବହୁ ନେତା କଂଗ୍ରେସ ଛାଡି ବିଜେଡିରେ ହୋଇଥିଲେ ସାମିଲ।କିନ୍ତୁ ବିଜେଡିର ପରାଜୟ ପରେ ସେହି ନେତାଙ୍କୁ ବିଜେଡିରେ ମିଳୁନି ଗୁରୁତ୍ବ।ତେଣୁ ନୂଆ ପିସିସି ମୁଖ୍ୟ ଭକ୍ତ ଦାସଙ୍କ ଡାକରା ସେମାନଙ୍କୁ ଦେଇଛି ସଞ୍ଜିବନୀ। ନିଜ ରାଜନୈତିକ କ୍ୟାରିଅରକୁ ସଜାଡିବା ପାଇଁ କଂଗ୍ରେସ ହିଁ ସେମାନଙ୍କ ପାଇଁ ବିକଳ୍ପ ହେବ।
ନିର୍ବାଚନ ପୂର୍ବରୁ ପୂର୍ବତନ ବିଧାୟକ ଚିରଞ୍ଜୀବୀ ବିଶ୍ବାଳ, ସୁରେନ୍ଦ୍ର ସିଂ ଭୋଇ, ପ୍ରଫୁଲ୍ଲ ମାଝୀ, ଅଂଶୁମାନ ମହାନ୍ତି, ଭୂପିନ୍ଦର ସିଂଙ୍କ ଭଳି ପୁରୁଖା ନେତାଙ୍କ ନାଁ ଅଧିକ ଚର୍ଚ୍ଚାରେ।କାରଣ ସେମାନେ ବିଜେଡିରେ ମିଶିଥିଲେ।ଭକ୍ତ ଦାସଙ୍କ ସର୍ବକ୍ଷମା ଯୋଜନା ପରେ ସେମାନେ ବିଜେଡି ଛାଡି କଂଗ୍ରେସକୁ ଫେରିପାରନ୍ତି ବୋଲି ଚର୍ଚ୍ଚା ହେଉଛି।ଏପରିକି କଂଗ୍ରେସର ବହୁ ବରିଷ୍ଠ ନେତା ପୂର୍ବରୁ ବିଜେଡିରେ ସାମିଲ ହୋଇଥିଲେ। ଏବେ ସେମାନଙ୍କୁ ଦଳକୁ ଫେରାଇ ନେବାକୁ ଆହ୍ବାନ ଦେଇ ବିଜେଡିର ଟେନସନ୍ ବଢ଼ାଇଛନ୍ତି ଭକ୍ତ।
କେବଳ ସେତିକି ନୁହେଁ ପଶ୍ଚିମ ଓଡ଼ିଶାରେ କଂଗ୍ରେସର ଏବେ ବି ଭୋଟ ବ୍ୟାଙ୍କ ରହିଛି।ଭକ୍ତ ଦାସ ପଶ୍ସିମ ଓଡିଶାର ନେତୃତ୍ବ ନେଉଥିବାରୁ କଂଗ୍ରେସକୁ ଏହା ଅଧିକ ମାଇଲେଜ ଦେବ।ଏପରିକି ଏବେ ପଶ୍ଚିମ ଓଡିଶାରେ କଂଗ୍ରେସ ସହ ବିଜେପିର ଲଢେଇ ବୋଲି କୁହାଯାଉଛି।ଯେଉଁ ନେତା କଂଗ୍ରେସ ଛାଡି ବିଜେଡି ଯାଇଛନ୍ତି, ସେମାନେ ଯଦି ଫେରନ୍ତି କଂଗ୍ରେସକୁ ଅଧିକ ଫାଇଦା ହେବ ବୋଲି ରାଜନୈତିକ ସମୀକ୍ଷକ କହିଛନ୍ତି।
ରାଜ୍ୟ କଂଗ୍ରେସ ଦାୟିତ୍ବ ନେବା ପରେ ମଙ୍ଗଳବାର ଓଡ଼ିଶା ଆସୁଛନ୍ତି ଭକ୍ତ ଦାସ। ସେହିଦିନ କଂଗ୍ରେସ ଆରମ୍ଭ କରିବ ସଂକଳ୍ପ ପଦଯାତ୍ରା।ଏହା ଭୁବନେଶ୍ୱର ବିମାନବନ୍ଦର ଠାରୁ ଲିଙ୍ଗିପୁର ପର୍ଯନ୍ତ ଯିବ।ପୁନର୍ବାର ଲିଙ୍ଗିପୁରୁରୁ ପିପିଲି ପର୍ଯନ୍ତ ପଦଯାତ୍ରା ପରେ ପିପିଲିରେ ରାତ୍ରିଯାପନ କରିବେ ପିସିସି ସଭାପତି, ଅନ୍ୟ କଂଗ୍ରେସ ନେତା ଓ କର୍ମୀ।ପରେ ୧୯ ତାରିଖରେ ପୁନର୍ବାର ପଦଯାତ୍ରା ଆରମ୍ଭ ହୋଇ ତେଇଶିପୂରୁ ପର୍ଯନ୍ତ ଯିବ।
ପରେ ଚନ୍ଦନପୁରରେ ପଦଯାତ୍ରା ପହଂଚି ରାତ୍ରିଯାପନ କରିବେ କଂଗ୍ରେସ ନେତା।ସେହିଭଳି ୨୦ ତାରିଖ ସକାଳେ ପଦଯାତ୍ରା ଚନ୍ଦନପୁରରୁ ବାହାରି ବାଟମଙ୍ଗଳାରେ ମଧ୍ୟାହ୍ନ ଭୋଜନ ପରେ ଅପରାହ୍ନରେ ମହାପ୍ରଭୁଙ୍କୁ ଦର୍ଶନ କରିବେ ନବ ନିଯୁକ୍ତ ପିସିସି ସଭାପତି ଓ କଂଗ୍ରେସ କର୍ମୀ, ନେତା। ସଫଳ ଓଡ଼ିଶାର ରୂପାୟନ ସହ ଉନ୍ନତି କାମନା ହିଁ ଏହି ପଦଯାତ୍ରାର ମୁଖ୍ୟ ଲକ୍ଷ୍ୟ।
