'ମୁଖ୍ୟମନ୍ତ୍ରୀଙ୍କ ନୂଆପଡ଼ା ଗସ୍ତର କୌଣସି ପ୍ରଭାବ ପଡିବ ନାହିଁ'

ଭୁବନେଶ୍ବର ୧୬।୧୦: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନୂଆପଡ଼ା ଗସ୍ତର କୌଣସି ପ୍ରଭାବ ପଡିବ ନାହିଁ ବୋଲି କହିଛନ୍ତି ବିରୋଧୀ ଦଳ ମୁଖ୍ୟ ସଚେତକ । କିଛି ପାୱାର ଶୋ’ କାମ ଦେବନି । ସାଧାରଣ ଲୋକଙ୍କୁ ସାମିଲ କରି ନାଁ ନେବାକୁ ଚେଷ୍ଟା କରାଯାଉଛି । ଆମର କୌଣସି ନେତା ଅସନ୍ତୁଷ୍ଟ ନାହାନ୍ତି । ଯେଉଁମାନେ ସେଠାରେ ଦାୟିତ୍ୱରେ ଥିଲେ ସେମାନେ କେହି ଯାଇନାହାନ୍ତି । ସାଧାରଣ ଭୋଟରଙ୍କୁ ନେଇ ମିଶ୍ରଣ ପର୍ବ କରୁଛନ୍ତି ।

ଜିଲ୍ଲା ବାହାରର ଅନେକ ନେତା ବିଧାୟକ ଏବଂ ମନ୍ତ୍ରୀ ହୋଇଛନ୍ତି । ସେଥିରେ କିଛି ଅସୁବିଧା ନାହିଁ । କୌଣସି ଦଳ ମହିଳାଙ୍କୁ ସମ୍ମାନ ଦେଉନି, ଆଗକୁ ଛାଡ଼ୁନି । ନବୀନ ବାବୁ ମହିଳାଙ୍କ ପାଇଁ ଅନେକ କିଛି କରିଛନ୍ତି । ସେହି ଆଧାରରେ ମହିଳାଙ୍କୁ ଟିକେଟ୍ ଦିଆଯାଇଛି । ସେ ଓଡ଼ିଶାର ନେତ୍ରୀ । ବିଜେଡି ମହିଳା ଜନତା ଦଳର ସଭାନେତ୍ରୀ ଅଛନ୍ତି । ​​​​​​​​​​​​​​

​​​​​​​ସୂଚନାଯୋଗ୍ୟ ଯେ, ଅତାବିରାର ପୂର୍ବତନ ବିଧାୟିକା ସ୍ନେହାଙ୍ଗିନୀ ଛୁରିଆଙ୍କୁ ପ୍ରାର୍ଥୀ ଘୋଷଣା କରି ନବୀନ ପଟ୍ଟନାୟକ ରାଜ୍ୟ ରାଜନୀତିକୁ ଚମକାଇ ଦେଇଛନ୍ତି । ସ୍ନେହାଙ୍ଗିନୀ ଛୁରିଆ ବରଗଡ଼ ଜିଲ୍ଲା ଅତାବିରା ନିର୍ବାଚନ ମଣ୍ଡଳୀରୁ ୨୦୧୪ ଓ ୨୦୧୯ରେ ବିଜୟୀ ହୋଇଥିଲେ । ଆଉ ତାଙ୍କୁ ପ୍ରାର୍ଥୀ କରି ବିଜେଡି ମହିଳା କାର୍ଡ ଖେଳିଛି । ଅତାବିରାର ଝିଅ ଏବେ ନୂଆପଡ଼ା ରଣାଙ୍ଗନରେ ସମ୍ଭାଳିବେ ବିଜେଡିର ମୋର୍ଚ୍ଚା । ଏହା ପୂର୍ବରୁ ବିଜେଡି ପ୍ରାର୍ଥୀ ଦୌଡ଼ରେ ଥିଲେ ନୂଆପଡ଼ା ବିଜ୍ଞାପିତ ଅଞ୍ଚଳ ପରିଷଦ ଅଧ୍ୟକ୍ଷ ମହମ୍ମଦ ଆଦମ୍, ବିଜେଡିର ସାଧାରଣ ସଂପାଦକ ମନୋଜ ମିଶ୍ର ସହ ଆଉ କିଛି ନେତା । ତେବେ ଦଳ ସୁପ୍ରିମୋ ପୁରୁଖା ନେତ୍ରୀ, ରାଜନେତା ସ୍ନେହାଙ୍ଗିନୀଙ୍କ ଉପରେ କରିଛନ୍ତି ଭରସା ।

ଦକ୍ଷତା ସାଙ୍ଗକୁ ଆନୁଗତ୍ୟ ଉପରେ ବୋଧହୁଏ ଲାଗିଛି ଷ୍ଟାମ୍ପ । ଏକାଧିକ ଆଶାୟୀ ଥିଲେ ବି ବରିଷ୍ଠତା, ଅଭିଜ୍ଞତା, ଦକ୍ଷତା ଓ ଲୋକପ୍ରିୟତା ସ୍ନେହାଙ୍ଗିନୀଙ୍କୁ ଦଳ  ରଣାଙ୍ଗନରେ ଓହ୍ଲାଇଛି । ତେବେ ସ୍ନେହାଙ୍ଗିନୀଙ୍କୁ ପ୍ରାର୍ଥୀ କରି ବଡ଼ ଗୋଟି ଚାଳନା କରିଛନ୍ତି ନବୀନ ପଟ୍ଟନାୟକ । ନୂଆପଡ଼ା ମାଟି ସହ ଜଡ଼ିତ ନଥିବା ସ୍ନେହାଙ୍ଗିନୀଙ୍କୁ ପ୍ରାର୍ଥୀ କରି ବିଜେଡି ନୂଆପଡ଼ାର ରାଜନୈତିକ ସମୀକରଣ ବଦଳାଇବାକୁ ଅଣ୍ଟା ଭିଡ଼ିଛି । ଛୁରିଆ ଦଳର ଅନେକ ପଦରେ କାମ କରିବା ସହ ସାଙ୍ଗଠନିକ ଦାୟିତ୍ଵ ମଧ୍ୟ ସମ୍ଭାଳିଛନ୍ତି । ସବୁ ସମୀକରଣକୁ ଦୃଷ୍ଟିରେ ରଖି ଦଳ ମୁଖିଆ ସରପ୍ରାଇଜ୍ କାର୍ଡ ଖେଳିଛନ୍ତି ।

​​​​​​​​​​​​​​