ଦନ୍ତାହାତୀ ‘ରାମୁ’ର କଙ୍କାଳକୁ ସଂରକ୍ଷଣ କରାଯିବ, ସର୍ବସାଧାରଣଙ୍କ ପାଇଁ ଗୋଡ଼ିବାରିରେ ପ୍ରଦର୍ଶିତ ହେବ

ଭୁବନେଶ୍ବର ୫।୧୨: ଦନ୍ତାହାତୀ ‘ରାମୁ’ର କଙ୍କାଳକୁ ସଂରକ୍ଷଣ କରାଯିବ । ଚନ୍ଦକା ଡମପଡ଼ା ଅଭୟାରଣ୍ୟର ମୁଖ୍ୟ ଫାଟକ ଗୋଡ଼ିବାରିରେ ଏହି କଙ୍କାଳ ସର୍ବସାଧାରଣଙ୍କ ପାଇଁ ପ୍ରଦର୍ଶିତ ହେବ । ଏ ନେଇ ବନ ବିଭାଗର ସମସ୍ତ ପ୍ରକ୍ରିୟା ଶେଷ ହୋଇଛି । କଙ୍କାଳକୁ ସଂରକ୍ଷଣ କରିବା ପାଇଁ ସ୍କେଲିଟନ୍ ମ୍ୟାନ୍ ଅଫ୍ ଇଣ୍ଡିଆ ଡ. ଶିବ ପ୍ରସାଦ ପରିଡ଼ା ଚନ୍ଦକା ଡିଏଫଓଙ୍କୁ ସହାୟତା କରିବେ ବୋଲି ବନ ବିଭାଗ ସୂତ୍ରରୁ ଜଣାପଡ଼ିଛି ।

ସୂଚନାଯୋଗ୍ୟ ଯେ, ଚନ୍ଦକା-ଡମପଡ଼ା ଅଭୟାରଣ୍ୟ ଅନ୍ତର୍ଗତ ଭରତପୁରରେ ରାମୁ ଥିଲା ଏକ ବଳଶାଳୀ ହାତୀ । ପ୍ରାୟ ୩୫ ବର୍ଷ ପୂର୍ବେ ଏହି ଜଙ୍ଗଲରେ ରାମୁ ଜନ୍ମ ନେଇଥିଲା । ଏହି ଦନ୍ତା ହାତୀଟି ଭରତପୁର, ଅନ୍ଧାରୁଆ, ମାଳିମ ଠାକୁରାଣୀ ରାସ୍ତା, ମଳିପଡ଼ା, ଶାମପୁର, ଗୋଠପାଟଣା ତଥା ଖୋର୍ଦ୍ଧା ଡିଭିଜନ ଅଞ୍ଚଳକୁ ନିୟମିତ ବ୍ୟବଧାନରେ ଯିବା ଆସିବା କରୁଥିଲା । ଉକ୍ତ ଅଞ୍ଚଳରେ ଥିବା ଲୋକଙ୍କ ବାଡ଼ିବଗିଚାରେ ପଶି ଫସଲ ନଷ୍ଟ କରୁଥିଲା । ରାମୁ କେବଳ ନିଜ ପେଟ ପାଇଁ ଏତେ ନାଟ କରୁଥିଲା । ହେଲେ ଲୋକଙ୍କୁ କେବେ ଆକ୍ରମଣ ତ ଦୂରେ ଥାଉ, କେବେବି ଆଡ଼ ଆଖିରେ ଅନାଏ ନାହିଁ । ତେଣୁ ‘ରାମୁ’ ବନ କର୍ମଚାରୀଙ୍କଠାରୁ ଆରମ୍ଭ କରି ସଭିଁଙ୍କ ପ୍ରିୟ ଥିଲା ।

ବାରାମ୍ବାର ଜନବସତି ମୁହାଁ ହେଉଥିବାରୁ ରାମୁକୁ କାବୁ କରି ତା’ ବେକରେ ରେଡିଓକଲାର ବାନ୍ଧିବା ପାଇଁ ବନବିଭାଗ ବାରମ୍ବାର ଚେଷ୍ଟା କରିଥିଲେ ମଧ୍ୟ ଫେଲ୍ ମାରିଥିଲା । ଶେଷରେ ରାମୁ ହାତୀକୁ ଟ୍ରାଙ୍କୁଲାଇଜ୍ ମାଡ଼ କରି ବନବିଭାଗ ଚନ୍ଦକା-ଡମପଡ଼ା ଅଭୟାରଣ୍ୟରେ ଥିବା ହାତୀଙ୍କ ‘ପାଠଶାଳା’କୁ ଆଣିବାକୁ ଯୋଜନା କରିଥିଲା । ସେଠାରେ ତାକୁ ମାହୁନ୍ତମାନଙ୍କ ଦ୍ୱାରା ପ୍ରଶିକ୍ଷଣ ଦିଆ ଯାଇଥାନ୍ତା । ପରେ ତାକୁ ଜଙ୍ଗଲ ଜଗିବାଠାରୁ ଆରମ୍ଭ କରି ପର୍ଯ୍ୟଟକଙ୍କୁ ପିଠିରେ ବସାଇ ଜଙ୍ଗଲ ବୁଲାଇବା କାମରେ ନିୟୋଜିତ କରାଯିବା ପାଇଁ ଚନ୍ଦକା ବନବିଭାଗ ଯୋଜନା କରିଥିଲା । ହେଲେ ଏହା ପୂର୍ବରୁ ଏହି ବିଶାଳକାୟ ରାମୁ ଗତବର୍ଷ ଅଗଷ୍ଟ ୧୯ରେ ଚୁନକୋଳି ବସ୍ତି ନିକଟରେ ବିଦ୍ୟୁତ ସଂସ୍ପର୍ଶରେ ଆସି ପ୍ରାଣ ହରାଇଥିଲା । ରାମୁ ମରିଯିବା ପରେ ହାତୀପ୍ରେମୀମାନେ ଦୁଃଖରେ ଭାଙ୍ଗିପଡ଼ିଥିଲେ । ଏପରିକି ଅନ୍ଧାରୁଆ ଗାଁରେ ରାମୁ ପାଇଁ ପିଣ୍ଡ ଦାନ କରାଯାଇଥିଲା । ଚଳିତବର୍ଷ ରାମୁର କଙ୍କାଳ ସଂରକ୍ଷଣ କରିବାକୁ ହାତୀପ୍ରେମୀ ଦାବି କରିଆସୁଥିଲେ । ସ୍ନେକ୍ ହେଲ୍ପଲାଇନ୍ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ମଧ୍ୟ ଡିଏଫ୍ଓ ଏବଂ ପିସିସିଏଫ୍ଙ୍କ ଚିଠି ଲେଖି ରାମୁ ହାତୀର କଙ୍କାଳ ସଂରକ୍ଷଣ ପାଇଁ ଦାବି କରିଥିଲେ । ଏହାପରେ ବନ ବିଭାଗ ଯୋଜନା ଆରମ୍ଭ କରିଥିଲା ।

ଏହାପୂର୍ବରୁ ଓଡ଼ିଶାରେ ପ୍ରଥମ ଥର ଆଚାର୍ୟ୍ୟବିହାରରେ ଥିବା ଆଞ୍ଚଳିକ ପ୍ରାକୃତିକ ଇତିହାସ ସଂଗ୍ରହାଳୟରେ ଦନ୍ତାହାତୀ ‘ଶଙ୍କର’ର କଙ୍କାଳ ବୈଜ୍ଞାନିକ ପ୍ରଣାଳୀରେ ସଂରକ୍ଷଣ କରାଯାଇଛି ।