ନୂଆଦିଲ୍ଲୀ: ଭାରତୀୟ ଟେଷ୍ଟ ଟିମ୍ର ଅଧିନାୟକ ଶୁଭମନ ଗିଲ୍ଙ୍କ ବ୍ୟାଟରୁ ରନ୍ ନୁହେଁ ରେକର୍ଡ ବର୍ଷା ଜାରି ରହିଛି । ଏଜବାଷ୍ଟନରେ ଇଂଲଣ୍ଡ ବିପକ୍ଷରେ ଖେଳାଯାଉଥିବା ଦ୍ୱିତୀୟ ଟେଷ୍ଟର ଦ୍ୱିତୀୟ ଇନିଂସରେ ଗିଲ୍ ପୁଣି ଏକ ଶତକୀୟ ଇନିଂସ ଖେଳିଛନ୍ତି । ସେ ୧୨୯ ବଲରେ ୧୦୦ ରନ୍ ପୂରଣ କରିଛନ୍ତି । ଏହା ପୂର୍ବରୁ ଭାରତର ଷ୍ଟାର୍ ବ୍ୟାଟର ପ୍ରଥମ ଇନିଂସରେ ଦ୍ୱିଶତକ ମାରିଥିଲେ । ଏହାସହ ଶୁଭମନ ଗିଲ୍ ଗୋଟିଏ ମ୍ୟାଚ୍ରେ ଦ୍ୱିଶତକ ଓ ଶତକ ମାରିବାରେ ଦୁନିଆର ନବମ ବ୍ୟାଟର ହୋଇଛନ୍ତି । ସୁନୀଲ ଗାଭାସ୍କରଙ୍କ ପରେ ଏହି କୀର୍ତ୍ତିମାନ କରିବାରେ ଦ୍ୱିତୀୟ ଭାରତୀୟ ହୋଇଛନ୍ତି । ମୋଟ ଉପରେ ଏହା ଶୁଭମନଙ୍କ ଟେଷ୍ଟ କ୍ୟାରିୟରର ୮ ଶତକ ।
ଭାରତର କିମ୍ୱଦନ୍ତି ଖେଳାଳି ସୁନୀଲ ଗାଭାସ୍କର ୧୯୭୧ରେ ୱେଷ୍ଟଇଣ୍ଡିଜ ବିପକ୍ଷରେ ଗୋଟିଏ ମ୍ୟାଚ୍ରେ ଶତକ ଓ ଦ୍ୱିଶତକ ମାରିଥିଲେ । ସେ ପ୍ରଥମ ପାଳିରେ ୧୨୪ ଓ ଦ୍ୱିତୀୟ ପାଳିରେ ୨୨୦ ରନ୍ କରିଥିଲେ । ଶୁଭମନ ଗିଲ୍ ୫୪ ବର୍ଷ ପରେ ଗୋଟିଏ ମ୍ୟାଚ୍ରେ ଦ୍ୱିଶତକ ଓ ଶତକ ହାସଲ କରିବାରେ ଦ୍ୱିତୀୟ ବ୍ୟାଟର ହୋଇଛନ୍ତି । ଗିଲ୍ ପ୍ରଥମ ଇନିଂସରେ ୨୬୯ ଓ ଦ୍ୱିତୀୟ ଇନିଂସରେ ଖବର ଲେଖାଯିବା ସୁଦ୍ଧା ଶତକ ପୂରଣ କରି ଅପରାଜିତ ଅଛନ୍ତି ।
ଶୁଭମନ ଗିଲ୍ ଗୋଟିଏ ଟେଷ୍ଟରେ ସବୁଠୁ ଅଧିକ ରନ୍ କରିବା ବ୍ୟାଟର ହୋଇଛନ୍ତି । ଏହି ମାମଲାରେ ସେ ଗାଭାସ୍କରଙ୍କୁ ପଛରେ ପକାଇଛନ୍ତି । ଗାଭାସ୍କର ୧୯୭୧ରେ ୱେଷ୍ଟଇଣ୍ଡିଜ ବିପକ୍ଷରେ ୩୪୪ ରନ୍ କରିଥିଲେ । ଶୁଭମନ ଗିଲ୍ ୩୬୯ ରନ୍ ସହ ଅପରାଜିତ ଅଛନ୍ତି । ଭିଭିଏସ୍ ଲକ୍ଷ୍ମଣ ୨୦୧୧ରେ ଅଷ୍ଟ୍ରେଲିଆ ବିପକ୍ଷରେ ୩୪୦ ରନ୍ କରିଥିଲେ । ସୌରଭ ଗାଙ୍ଗୁଲି ପାକିସ୍ତାନ ବିପକ୍ଷରେ ୨୦୦୭ରେ ଗୋଟିଏ ଟେଷ୍ଟରେ ୩୩୦ ରନ୍ କରିଥିଲେ ।
ଶୁଭମନ ଗିଲ୍ ଏସିଆ ବାହାରେ କୌଣସି ଟେଷ୍ଟ ମ୍ୟାଚରେ ୩୫୦ରୁ ଅଧିକ ରନ୍ କରିବାରେ ଦ୍ୱିତୀୟ ଏସୀୟ ଖେଳାଳି ହୋଇଛନ୍ତି । ତାଙ୍କ ପୂର୍ବରୁ ହନିଫ୍ ମହମ୍ମଦ ୧୯୫୮ରେ ୱେଷ୍ଟଇଣ୍ଡିଜ ବିପକ୍ଷରେ ବ୍ରିଜଟାଉନ ଟେଷ୍ଟରେ ମୋଟ ୩୫୪ ରନ୍ କରିଥିଲେ । ଗିଲ୍ SENA (ସାଉଥ୍ ଆଫ୍ରିକା, ଇଂଲଣ୍ଡ, ନ୍ୟୁଜିଲାଣ୍ଡ, ଅଷ୍ଟ୍ରେଲିଆ)ରେ କୌଣସି ଟେଷ୍ଟରେ ୩୦୦ରୁ ଅଧିକ ରନ୍ କରିବାରେ ତୃତୀୟ ଏସୀୟ ବ୍ୟାଟର ହୋଇଛନ୍ତି । ତାଙ୍କ ପୂର୍ବରୁ ରାହୁଲ ଦ୍ରାବିଡ଼ (୩୦୫) ଓ ସଚିନ ତେନ୍ଦୁଲକର (୩୦୧) ଅଷ୍ଟ୍ରେଲିଆରେ ଏପରି କରିଥିଲେ ।
