ନୂଆଦିଲ୍ଲୀ: ପହଲଗାମ ଆତଙ୍କୀ ହମଲାର ମୁହଁତୋଡ ଜବାବ ଦେଇଛି ଭାରତ । ପାକିସ୍ତାନ ଓ ପାକିସ୍ତାନ ଅଧିକୃତକ କାଶ୍ମୀର(ପିଓକେ)ରେ ଏକ ସଙ୍ଗେ ୯ ଆତଙ୍କୀ ଶିବିର ଉପରେ ମଙ୍ଗଳବାର ଅଧ ରାତିରେ ବୋମା ବର୍ଷଣ କରିଛି । ଭାରତର ଏୟାର ଷ୍ଟ୍ରାଇକ ସମୟରେ ଶୋଇ ରହିଥିବା ପାକିସ୍ତାନର ନିଦ ଭାଙ୍ଗି ଯାଇଛି । ଭାରତର ଏୟାର ଷ୍ଟ୍ରାଇକ ପରେ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫ ଯୁଦ୍ଧର ଧମକ ଦେଇଛନ୍ତି ।

Also read: ଆତଙ୍କବାଦ ବିରୋଧରେ ଭାରତର ବଡ଼ ପ୍ରହାର; ‘ଅପରେସନ୍ ସିନ୍ଦୂର’ ସଫଳ, ପାକିସ୍ତାନରେ ୯ ଆତଙ୍କୀ ଶିବିର ଧ୍ବଂସ

ହମଲାର କିଛି ଘଣ୍ଟା ପରେ ଶେହବାଜ ସରିଫ ଏକ୍ସରେ ନିଜର ପ୍ରତିକ୍ରିୟା ଦେଇ ଭାରତର ଏୟାର ଷ୍ଟ୍ରାଇକକୁ ସ୍ୱୀକାର କରିଛନ୍ତି। ଆଉ ଭାରତର ଚାଲାକିକୁ ମଧ୍ୟ ସେ ମାନିଛନ୍ତି । ଶରିଫ ଏକ୍ସରେ ଲେଖିଛନ୍ତି, ଚାଲାକ ଶତ୍ରୁ ପାକିସ୍ତାନର ପାଞ୍ଚ ସ୍ଥାନରେ ହମଲା କରିଛି । ଭାରତ ଦ୍ୱାରା ଥୋପା ଯାଇଥିବା ଏହି ଯୁଦ୍ଧ କୃତ୍ୟର ପୂରା ଜବାବ ଦେବାକୁ ପାକିସ୍ତାନର ଅଧିକାର ରହିଛି । ସମଗ୍ର ଦେଶ ପାକିସ୍ତାନୀ ସଶସ୍ତ୍ର ବଳ ସହିତ ରହିଛି ଏବଂ ପୂରା ପାକିସ୍ତାନୀ ରାଷ୍ଟ୍ରର ମନୋବଳ ଓ ଭାବନା ଉଚ୍ଚରେ ରହିଛି । ପାକିସ୍ତାନ ଓ ପାକିସ୍ତାନୀ ସଶସ୍ତ୍ର ବଳ ଜାଣିଛନ୍ତି ଯେ, ଶତ୍ରୁ ସହ କେମିତି ମୁକାବିଲା କରାଯାଏ । ଆମେ ଶତ୍ରୁ ଦେଶକୁ ତାର ଉଦ୍ଦେଶ୍ୟ ସାଧିତ ହେବାକୁ ଦେବୁ ନାହିଁ ବୋଲି ପାକିସ୍ତାନ ପ୍ରଧାନମନ୍ତ୍ରୀ କହିଛନ୍ତି । 

ଏପ୍ରିଲ ୨୨ ପହଲଗାମ ଆତଙ୍କୀ ହମଲା ପରେ ଭାରତ ଆତଙ୍କବାଦୀ ଓ ଏହାର ପୃଷ୍ଠପୋଷକଙ୍କୁ କଡା ସନ୍ଦେଶ ଦେଇଥିଲା । ଏପ୍ରିଲ ୨୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିହାରର ଝଞ୍ଜାରପୁରରେ ଆୟୋଜିତ କାର୍ଯ୍ୟକ୍ରମରେ ଦୁନିଆକୁ ସନ୍ଦେଶ ଦେଇଥିଲେ ଯେ, ଭାରତ ଆତଙ୍କବାଦୀଙ୍କୁ ସେମାନଙ୍କ କଳ୍ପନାଠୁ ବି ବଡ ସଜା ଦେବୁ । ତେବେଠୁ ଆଶା କରାଯାଉଥିଲା ଭାରତ ସୀମା ପାର ଯାଇ ଆତଙ୍କବାଦୀଙ୍କୁ ତାଙ୍କ ଘରେ ହିଁ ଦଣ୍ଡ ଦେବ ।