ନୂଆଦିଲ୍ଲୀ: ନା କଂଗ୍ରେସ ହାତ ଛାଡ଼ି ପାରୁଛନ୍ତି ନା ବିଜେପିକୁ ଆସି ପାରୁଛନ୍ତି। ବର୍ତ୍ତମାନ ତ୍ରିଶଙ୍କୁ ଅବସ୍ଥାରେ ଥିରୁଅନନ୍ତପୁରମ ସାଂସଦ ଶଶି ଥରୁର। କଂଗ୍ରେସ ଦଳ ଓ ଥରୁରଙ୍କ ମଧ୍ୟରେ ବିବାଦ ରହିଥିବା ନେଇ ଚର୍ଚ୍ଚା ହେଉଥିବା ବେଳେ ଦଳର ବରିଷ୍ଠ ନେତା କେ.ମୁରଲୀଧରନ ଏକ ବଡ଼ ବିସ୍ଫୋରଣ କରିଛନ୍ତି। ଜାତୀୟ ସୁରକ୍ଷା ପ୍ରସଙ୍ଗରେ ଥରୁର ଯେପର୍ଯ୍ୟନ୍ତ ତାଙ୍କ ମତ ପରିବର୍ତ୍ତନ ନ କରିଛନ୍ତି ସେ ପର୍ଯ୍ୟନ୍ତ ତିରୁଅନନ୍ତପୁରମର କୌଣସି ଦଳୀୟ କାର୍ଯ୍ୟକ୍ରମରେ ତାଙ୍କୁ ନିମନ୍ତ୍ରଣ କରାଯିବ ନାହିଁ ବୋଲି ମୁରଲୀଧନରନ କହିଛନ୍ତି।
ମୁରଲୀଧରନ କହିଛନ୍ତି ଯେ ଥରୁର, କଂଗ୍ରେସ କାର୍ଯ୍ୟକାରିଣୀ କମିଟି (CWC) ଜଣେ ସଦସ୍ୟ ଥିଲେ ମଧ୍ୟ, ତାଙ୍କୁ ଆଉ ଆମ ମଧ୍ୟରୁ ଜଣେ ବୋଲି ବିବେଚନା କରାଯାଉ ନାହିଁ। କଂଗ୍ରେସ ସାଂସଦଙ୍କ ବିରୋଧରେ କ'ଣ କାର୍ଯ୍ୟାନୁଷ୍ଠାନ ଆବଶ୍ୟକ ତାହା ଦଳର ଜାତୀୟ ନେତୃତ୍ୱ ନିଷ୍ପତ୍ତି ନେବେ। ଥରୁର ଆମ ସହିତ ନାହାନ୍ତି, ତେଣୁ ତାଙ୍କର କୌଣସି କାର୍ଯ୍ୟକ୍ରମ ବର୍ଜନ କରିବାର ପ୍ରଶ୍ନ ଉଠୁ ନାହିଁ ବୋଲି ମୁରଲୀଧରନ କହିଛନ୍ତି
ଜାତୀୟ ସୁରକ୍ଷା ପ୍ରସଙ୍ଗରେ ଥରୁରଙ୍କ ମତ ନେଇ ଜଣେ ସାମ୍ବାଦିକ ପ୍ରଶ୍ନ କରିବାରୁ ମୁରଲୀଧରନ ଏଭଳି ପ୍ରତିକ୍ରିୟା ଦେଇଥିଲେ। ତାଙ୍କର ପ୍ରତିକ୍ରିୟା ଏପରି ସମୟରେ ଆସିଛି ଯେତେବେଳେ କଂଗ୍ରେସ ଏବଂ ଅନ୍ୟାନ୍ୟ ଇଣ୍ଡିଆ ବ୍ଲକ୍ ସଦସ୍ୟମାନେ ସଂସଦର ମୌସୁମୀ ଅଧିବେଶନରେ ସରକାରଙ୍କୁ ଟାର୍ଗେଟ୍ କରିବାକୁ ଯୋଜନା କରୁଛନ୍ତି। ପହଲଗାମ ଆତଙ୍କବାଦୀ ଆକ୍ରମଣରେ 'ସୁରକ୍ଷା ତ୍ରୁଟି' ଏବଂ ଅପରେସନ ସିନ୍ଦୂର ଅଧୀନରେ ହାସଲ ହୋଇଥିବା ଫଳାଫଳକୁ ନେଇ ଆଗାମୀ ମୌସୁମୀ ଅଧିବେଶନରେ ନରେନ୍ଦ୍ର ମୋଦି ସରକାରଙ୍କୁ ଘେରିବାକୁ ଯୋଜନା କରୁଥିବା ବେଳେ ଥରୁରଙ୍କ ଭୂମିକା କଂଗ୍ରେସ ପାଇଁ ଗୌଣ ହୋଇଛି।
