ଭୁବନେଶ୍ଵର: ଧାନ ବିକ୍ରି ପାଇଁ ଜାଲିଆତି କରି ପଞ୍ଜିକରଣ କରିଥିବା ଚାଷୀଙ୍କ ବିରୋଧରେ ହେବ ବଡ଼ କାର୍ଯ୍ୟାନୁଷ୍ଠାନ । ଯେଉଁମାନେ ନିଜ ଜମି ବଦଳରେ ରାସ୍ତା, ଗୋଚର ଜମି, ଶ୍ମଶାନ ଓ ସରକାରୀ ଜମିକୁ ଦେଖାଇ ପଞ୍ଜିକରଣ କରିଛନ୍ତି ସେମାନଙ୍କୁ ଚିହ୍ନଟ କରିବା ଲାଗି ସବୁ ଜିଲ୍ଲାପାଳମାନଙ୍କୁ ଖୁବ୍ ଶୀଘ୍ର ଚିଠି କରିବ ଯୋଗାଣ ବିଭାଗ । କେବଳ ଚାଷୀ ନୁହନ୍ତି ଏଭଳି ଜାଲିଆତିରେ ସମ୍ପୃକ୍ତ ଥିବା ସମବାୟ ଅଧିକାରୀଙ୍କ ବିରୋଧରେ ମଧ୍ୟ ଆକ୍ସନ ହେବ ବୋଲି କହିଛନ୍ତିି ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ରାଜ୍ୟରେ ଚଳିତ ଖରିଫ୍ ଧାନ ସଂଗ୍ରହ ପାଇଁ ସର୍ବାଧିକ ୧୯ଲକ୍ଷ ୬୭ ହଜାର ଚାଷୀ ପଞ୍ଜିକରଣ କରିଛନ୍ତି।
ସାବଧାନ । ଜମି ଜାଲିଆତି କରି ପଞ୍ଜିକରଣ କରିଥିଲେ ହେବ ଆକ୍ସନ । ଧାନ ବିକ୍ରି ପାଇଁ ଯେଉଁମାନେ ନିଜ ଜମି ବଦଳରେ ରାସ୍ତା, ଗୋଚର ଜମି, ଶ୍ମଶାନ ଓ ସରକାରୀ ଜମିକୁ ଦେଖାଇ ପଞ୍ଜିକରଣ କରିଛନ୍ତି ସେମାନଙ୍କ ବିରୋଧରେ ବଡ଼ କାର୍ଯ୍ୟାନୁଷ୍ଠାନ ହେବ ବୋଲି ଚେତାଇ ଦେଇଛନ୍ତି ଯୋଗାଣ ମନ୍ତ୍ରୀ କୃ୍ଷ୍ଣ ଚନ୍ଦ୍ର ପାତ୍ର । ବର୍ତ୍ତମାନ ସୁଦ୍ଧାରେ ରାଜ୍ୟରେ ଚଳିତ ଖରିଫ ଧାନ ବିକ୍ରି ପାଇଁ ସର୍ବାଧିକ ୧୯ ଲକ୍ଷ ୬୭ ହଜାର ଚାଷୀ ପଞ୍ଜିକରଣ କରିଛନ୍ତି। ହେଲେ ଏ ଭିତରେ ସରକାରଙ୍କ ହାତରେ ଲାଗିଛି ଜାଲିଆତିର ଲମ୍ବା ତାଲିକା । ଜାଲିଆତି କରି ପଞ୍ଜିକରଣ କରିଥିବା ଚାଷୀଙ୍କୁ ଚିହ୍ନଟ ପାଇଁ ସବୁ ଜିଲ୍ଲାପାଳଙ୍କୁ ଖୁବ ଶୀଘ୍ର ଚିଠି କରିବ ଯୋଗାଣ ବିଭାଗ । ସବୁଠାରୁ ବଡ କଥା ହେଲା, ଏଥିରେ କେବଳ ଚାଷୀ ସମ୍ପୃକ୍ତ ନାହାନ୍ତି, କିଛି ସମବାୟ ଅଧିକାରୀ ମଧ୍ୟ ସାମିଲ ଥିବା ଜଣା ପଡିଛି। ତେଣୁ ଏ ସବୁର ଫିଜିକାଲ ଭେରିଫିକେସନ କରି ଜାଲିଆତିରେ ସମ୍ପୃକ୍ତ ଥିବା ଚାଷୀ ଓ ଅଧିକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ହେବ । ସେପଟେ ସରକାରଙ୍କର ଏପରି ପଦକ୍ଷପକୁ ସ୍ବାଗତ କରିଛନ୍ତି ଚାଷୀ ନେତା ।
Also read: ଏ ବର୍ଷ ହେବନି କଲେଜ ଇଲେକ୍ସନ ? ପୁଣି ମଉଳିବ ଛାତ୍ର ସଂସଦ ନିର୍ବାଚନ ଆଶା
ସବୁଠାରୁ ବଡ କଥା ହେଲା, ୨୦୨୫-୨୬ ରବି ଫସଲ ସମୟରେ ୧ ଲକ୍ଷ ୮୧ ହଜାର ୬୮୪ ଚାଷ ହୋଇ ନଥିବା ଜମି ପଞ୍ଜିକରଣ ହୋଇଥିଲା । ଯୋଗାଣ ଓ ଖାଉଟି କଲ୍ୟାଣ ବିଭାଗର ଏ ଚିଠିର ଏହାକୁ ସ୍ପଷ୍ଟ କରିଥିଲା। ପୁଣି ଥରେ ଚଳିତ ଖରିଫ ପଞ୍ଜିକରଣ ସମୟରେ ବିଭାଗ ନଜରକୁ ଆସିଛି ଜାଲିଆତି। ତେଣୁ ଜାଲିଆତି କରିଥିବା ଚାଷୀ ଓ ଅଧିକାରୀଙ୍କୁ ଆଗୁଆ ଚିହ୍ନଟ ସହ କାର୍ଯ୍ୟାନୁଷ୍ଠାନ ପାଇଁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର । ସେପଟେ ରବି ଫସଲ ସମୟରେ ଧରାପଡିଥିବା ଜାଲି ଚାଷୀଙ୍କ ଉପରେ ସରକାର କଣ କାର୍ଯ୍ୟାନୁଷ୍ଠାନ ନେବେ ବୋଲି ପ୍ରଶ୍ନ କରିଛନ୍ତି ବିରୋଧୀ । ଏ ସବୁ ଭିତରେ ଚାଷୀ ପଞ୍ଜିକରଣ ଅବଧି ବଢାଇବାକୁ ଦାବି ହେଉଥିବା ବେଳେ ଖୁବ ଶୀଘ୍ର ଏ ନେଇ ସରକାର ନିଷ୍ପତ୍ତି ନେବାକୁ ଯାଉଛନ୍ତି ।
