ଭାରତର ମାଟି ଉପରେ ଜିନପିଙ୍ଗଙ୍କ ଲୋଭ, ଶାକ୍ସଗାମ୍ ଉପତ୍ୟକାକୁ ଚୀନର ଅଂଶ କହିଲା ବେଜିଂ

ନୂଆଦିଲ୍ଲୀ: ଭାରତର ମାଟିକୁ ନିଜର କହିଲା ଚୀନ। ଶାକ୍ସଗାମ୍ ଉପତ୍ୟକା ଉପରେ ନିଜର ଆଞ୍ଚଳିକ ଦାବିକୁ ପୁନର୍ବାର ଦୋହରାଇଛି ବେଜିଂ। ଏହି ଅଞ୍ଚଳରେ ଚୀନର ଭିତ୍ତିଭୂମି ପ୍ରକଳ୍ପଗୁଡ଼ିକ ସମ୍ପୂର୍ଣ୍ଣ ଯଥାର୍ଥ ବୋଲି କହିଛି ଚୀନ। ଗତ ଶୁକ୍ରବାର ଭାରତ ଶାକ୍ସଗାମ୍ ଉପତ୍ୟକାରେ ଚୀନର ଭିତ୍ତିଭୂମି ପ୍ରକଳ୍ପଗୁଡ଼ିକୁ ସମାଲୋଚନା କରି ଜୟଶଙ୍କର କହିଥିଲେ ଯେ ଏହା ଭାରତୀୟ ଅଞ୍ଚଳ ଏବଂ ଭାରତକୁ ତା’ର ସ୍ୱାର୍ଥ ରକ୍ଷା ପାଇଁ ଆବଶ୍ୟକ ପଦକ୍ଷେପ ନେବାର ଅଧିକାର ଅଛି। ପାକିସ୍ତାନ ୧୯୬୩ ମସିହାରେ ଅବୈଧ ଭାବରେ ଅଧିକୃତ ଭାରତୀୟ ଅଞ୍ଚଳରୁ ୫,୧୮୦ ବର୍ଗ କିଲୋମିଟର ଶାକ୍ସଗାମ୍ ଉପତ୍ୟକା ଚୀନ୍‌କୁ ହସ୍ତାନ୍ତର କରିଥିଲା।

ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, "ଶାକ୍ସଗାମ୍ ଉପତ୍ୟକା ହେଉଛି ଭାରତୀୟ ଅଞ୍ଚଳ। ଆମେ ୧୯୬୩ ମସିହାରେ ସ୍ୱାକ୍ଷରିତ ତଥାକଥିତ ଚୀନ୍‌-ପାକିସ୍ତାନ 'ସୀମା ଚୁକ୍ତିନାମା'କୁ କେବେବି ସ୍ୱୀକୃତି ଦେଇନାହୁଁ। ଆମେ ନିରନ୍ତର ଭାବରେ କହିଛୁ ଯେ ଏହି ଚୁକ୍ତି ଅବୈଧ ।" ଆମେ ତଥାକଥିତ ଚୀନ୍‌-ପାକିସ୍ତାନ ଅର୍ଥନୈତିକ କରିଡର (CPEC)କୁ ମଧ୍ୟ ସ୍ୱୀକୃତି ଦେଉନାହୁଁ, କାରଣ ଏହା ଭାରତୀୟ ଅଞ୍ଚଳ ଦେଇ ଗତି କରେ ଯାହାକୁ ପାକିସ୍ତାନ ଅବୈଧ ଏବଂ ବଳପୂର୍ବକ ଦଖଲ କରିଛି।"

ଜୟସୱାଲଙ୍କ ମନ୍ତବ୍ୟର ଜବାବରେ, ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ମାଓ ନିଙ୍ଗ୍ କହିଛନ୍ତି, "ପ୍ରଥମେ, ଆପଣ ଯେଉଁ ଅଞ୍ଚଳ ବିଷୟରେ କହୁଛନ୍ତି ତାହା ଚୀନ୍‌ର ଏକ ଅଂଶ।" ସେ ଆହୁରି ମଧ୍ୟ କହିଛନ୍ତି, "ଚୀନ୍‌ର ନିଜସ୍ୱ ଅଞ୍ଚଳରେ ଭିତ୍ତିଭୂମି କାର୍ଯ୍ୟକଳାପ ସମ୍ପୂର୍ଣ୍ଣ ଯଥାର୍ଥ।" ଚୀନ୍ ଏବଂ ପାକିସ୍ତାନ ୧୯୬୦ ଦଶକରେ ଏକ ସୀମା ଚୁକ୍ତିନାମା ସ୍ୱାକ୍ଷର କରିଥିଲେ, ଯାହା ଦୁଇ ଦେଶ ମଧ୍ୟରେ ସୀମା ନିର୍ଣ୍ଣୟ କରିଥିଲା। ଏହା ସାର୍ବଭୌମ ରାଷ୍ଟ୍ର ଭାବରେ ଚୀନ୍ ଏବଂ ପାକିସ୍ତାନର ଅଧିକାର।

CPEC ଉପରେ ଭାରତର ସମାଲୋଚନାର ପ୍ରତିକ୍ରିୟା ଦେଇ ମାଓ ବେଜିଂର ଦୀର୍ଘକାଳୀନ ମନୋଭାବକୁ ଦୋହରାଇଥିଲେ, କହିଥିଲେ ଯେ ଏହା ସ୍ଥାନୀୟ ଆର୍ଥିକ ଏବଂ ସାମାଜିକ ବିକାଶ ଏବଂ ଲୋକଙ୍କ ଜୀବନକୁ ଉନ୍ନତ କରିବା ପାଇଁ ଲକ୍ଷ୍ୟ ରଖାଯାଇଥିବା ଏକ ଆର୍ଥିକ ପଦକ୍ଷେପ। ସେ କହିଥିଲେ, "ଏପରି ଚୁକ୍ତିନାମା ଏବଂ CPEC କାଶ୍ମୀର ପ୍ରସଙ୍ଗରେ ଚୀନ୍‌ର ସ୍ଥିତିକୁ ପ୍ରଭାବିତ କରିବ ନାହିଁ, ଏବଂ ଏହି ପ୍ରସଙ୍ଗରେ ଚୀନ୍‌ର ସ୍ଥିତି ଅପରିବର୍ତ୍ତିତ ରହିଛି।"

କାଶ୍ମୀର ପ୍ରସଙ୍ଗରେ ଚୀନ୍‌ର ସରକାରୀ ମତ ହେଉଛି ଯେ "ଜମ୍ମୁ ଏବଂ କାଶ୍ମୀର ବିବାଦ ଏକ ଦୀର୍ଘକାଳୀନ ବିବାଦ ଏବଂ ଏହାକୁ ଜାତିସଂଘ ଚାର୍ଟର, ପ୍ରାସଙ୍ଗିକ ସୁରକ୍ଷା ପରିଷଦ ପ୍ରସ୍ତାବ ଏବଂ ଦ୍ୱିପାକ୍ଷିକ ଚୁକ୍ତିନାମା ଅନୁଯାୟୀ ଏକ ନିରପେକ୍ଷ ଏବଂ ଶାନ୍ତିପୂର୍ଣ୍ଣ ଉପାୟରେ ସମାଧାନ କରାଯିବା ଉଚିତ।"ଶାକ୍ସଗାମ୍ ଉପତ୍ୟକାରେ ଚୀନର ଭିତ୍ତିଭୂମି ପ୍ରକଳ୍ପ ସମ୍ପର୍କରେ ଏକ ପ୍ରଶ୍ନର ଉତ୍ତରରେ ଜୟସୱାଲ କହିଛନ୍ତି, "ଜମ୍ମୁ ଏବଂ କାଶ୍ମୀର ଏବଂ ଲଦାଖ ଭାରତର ଏକ ଅବିଚ୍ଛେଦ୍ୟ ଅଂଶ। ଏହା ସ୍ପଷ୍ଟ ଭାବରେ ପାକିସ୍ତାନୀ ଏବଂ ଚୀନ୍ ଅଧିକାରୀମାନଙ୍କୁ ଅନେକ ଥର ଜଣାଇ ଦିଆଯାଇଛି।