ପ୍ରଫୁଲ୍ଲ ସାମଲଙ୍କ ଦୁଇ ପୁଅ ବିଜେପିରେ ଯୋଗଦେବା ପ୍ରସଙ୍ଗ; ବ୍ୟୋମକେଶଙ୍କ କଡ଼ା ସମାଲୋଚନା, କହିଲେ- କାହିଁକି ଓ୍ବାସିଂ ମେଶିନ୍‌ରେ ଧୋଇ ହେଉଛନ୍ତି ?

ଭୁବନେଶ୍ବର: ପଦ୍ମ ଧରିଲେ ବିଜେଡି ନେତା ପ୍ରଫୁଲ୍ଲ ସାମଲଙ୍କ ଦୁଇ ପୁଅ ପ୍ରୟାସକାନ୍ତି ସାମଲ ଓ ପ୍ରଣିତକାନ୍ତି ସାମଲ। ଶନିବାର ବିଜେପି ରାଜ୍ୟ କାର୍ଯ୍ୟାଳୟରେ ଏକ ବଡ଼ ମିଶ୍ରଣ ପର୍ବରେ ପଦ୍ମ ଧରିଛନ୍ତି ପ୍ରଫୁଲ୍ଲଙ୍କ ଦୁଇ ପୁଅ। ବଡ଼ କଥା ହେଲା ବିଜେଡିର ଜଣେ ଟାଣୁଆ ନେତା ଭାବରେ ବେଶ୍ ପରିଚିତ ପ୍ରଫୁଲ ସାମଲ । ତେଣୁ ତାଙ୍କର ଦୁଇ ପୁଅ ବିଜେପିରେ ଯୋଗଦେବାକୁ ନେଇ ରାଜ୍ୟ ରାଜନୀତି ମଧ୍ୟ ବେଶ୍ ସରଗରମ ରହିଛି।

ତେବେ ଏପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ ବ୍ୟୋମକେଶ ରାଏ। ସେ କହିଛନ୍ତି, ବିଜୁ ଜନତା ଦଳ ଭାରତର ସବୁଠାରୁ ବଡ଼ ଆଞ୍ଚଳିକ ଦଳ। ବିଜେଡି ଶାସନ ସମୟରେ ଲୁଲୁ ସାମଲଙ୍କୁ ଭଣ୍ଡାରିପୋଖରୀ ଦାୟିତ୍ୱ ଦିଆଯାଇଥିଲା। ପ୍ରଫୁଲ୍ଲ ସାମଲ ଦୁଇଟି ବ୍ଲକ ଅଧ୍ୟକ୍ଷ କରିଥିଲେ। ତାଙ୍କ ପୁଅ ବିଜେଡି ପାଇଁ ବ୍ଲକ ଅଧ୍ୟକ୍ଷ ହୋଇଥିଲେ। ଏବେ ବିଜେପି ଯିବା ସ୍ୱାର୍ଥବାଦୀ କାମ। ବରପଦା କଲେଜର ED ମାମଲାରୁ ବଂଚିବାକୁ ବିଜେପିରେ ମିଶିଲେ। ଏହି କଲେଜକୁ ନେଇ ବିଜେପି ସହ ଡିଲ ହୋଇଛି। କାହିଁକି ଓ୍ବାସିଂ ମେଶିନ୍‌ରେ ଧୋଇ ହେଉଛନ୍ତି ? ବୋଲି ପ୍ରଶ୍ନ କରିଛନ୍ତି ବ୍ୟୋମକେଶ।

ସେ ଆହୁରି କହିଛନ୍ତି, ବିଜେପି ନିଜେ ବରପଦା କଲେଜ ଘଟଣାକୁ ବିରୋଧ କରୁଥିଲେ।  ଆଜି କାହିଁକି ମିଶାଇଲେ। ୯ ମାସ ପରେ କୋଡ ଅଫ କଣ୍ଡକ୍ଟ ଲାଗିବ। ED କେସ କଣ ସମାଧାନ ହୋଇ ଯାଇଛି ? ପୂର୍ବରୁ ବିଜେପିକୁ ଯିଏ ଗନ୍ଧାଉ ଥିଲା, ଆଜି କେମିତି ବସିଲା? ବିଜେପି ରାଜ୍ୟ ସଭାପତି କେମିତି ସେମାନଙ୍କୁ ମିଶାଇଲେ। ଭଦ୍ରକବାସୀ ଏହାକୁ ନାପସନ୍ଦ କରୁଛନ୍ତି। ଏହି ବରପଦା ଇଂଜିନିୟରିଙ୍ଗ କଲେଜ ମାମଲା ପାଇଁ ପ୍ରଫୁଲ୍ଲ ସାମଲ ହାରିଥଲେ।  ବିଜେପି ସମଦଶା ଭୋଗିବେ।  ନିର୍ବାଚନରେ ପୁଣି ସେଠି ବ୍ଲକ ଦଖଲ କରିବେ।  ବିଜେପି ଏହାର ପରିଣାମ ଭୋଗିବ ବୋଲି କହିଛନ୍ତି ବିଜେଡି ନେତା ବ୍ୟୋମକେଶ ରାଏ।