ନୂଆଦିଲ୍ଲୀ: ରୁଷ ଓ ୟୁକ୍ରେନ ମଧ୍ୟରେ ଯୁଦ୍ଧ ସମାପ୍ତ କରିବା ପାଇଁ ଘନ ଘନ ବୈଠକ ବସୁଛି । ଏପଟେ କିନ୍ତୁ ୟୁକ୍ରେନ ଉପରେ ଆକ୍ରମଣ ବନ୍ଦ କରିବାକୁ ରୁଷ ରାଜି ନୁହେଁ । ବୁଧବାର ରାତିରେ କିଭ୍ ଉପରେ ରୁଷ ବଡ଼ ଧରଣର ଆକ୍ରମଣ କରିଥିଲା । ଏଥିରେ ଅତି କମରେ ୧୫ ଜଣଙ୍କ ମୃତ୍ୟୁ ହୋଇଥିବା ୟୁକ୍ରେନୀୟ ଅଧିକାରୀ କହିଛନ୍ତି । ଏହି ଆକ୍ରମଣ ଉପରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ କଡ଼ା ପ୍ରତିକ୍ରିୟା ସାମନାକୁ ଆସିଛି । ଜେଲେନସ୍କି ଏହି ଆକ୍ରମଣକୁ କୂଟନୀତି ଆଲୋଚନା ଉପରେ ମସ୍କୋର ଜବାବ ବୋଲି କହିଛନ୍ତି ।
କ୍ରେମଲିନ୍ ମୁଖପାତ୍ର ଡିମିତ୍ରି ପେସକୋଭ କହିଛନ୍ତି, ୟୁକ୍ରେନ ଉପରେ ଆକ୍ରମଣ ଓ ଶାନ୍ତି ପାଇଁ ରୁଷ ଉଦ୍ୟମ ମଧ୍ୟରେ ବିରୋଧାଭାସ ନାହିଁ । ସାମରିକ ଅଭିଯାନ ଜାରି ରହିଛି । କିଭ୍ ଦ୍ୱାରା ରୁଷର ଭିତ୍ତିଭୂମି ଉପରେ ଆକ୍ରମଣ ଜାରି ରହିଛି । ରୁଷର ସଶସ୍ତ୍ର ବାହିନୀ ମଧ୍ୟ ସେମାନଙ୍କର କାର୍ଯ୍ୟ କରୁଛନ୍ତି । ପେସକୋଭ୍ କହିଛନ୍ତି ଯେ ରୁଷ କେବଳ ଭିତ୍ତିଭୂମି ଉପରେ ଆକ୍ରମଣ କରୁଛି ଏବଂ ମସ୍କୋ ଜାଣିଶୁଣି ସାଧାରଣ ନାଗରିକଙ୍କୁ ଟାର୍ଗେଟ କରେ ନାହିଁ ।
କ୍ରେମିଲନ୍ ମୁଖପାତ୍ର କହିଛନ୍ତି ରୁଷ ସେନା ସେମାନଙ୍କର କାମ କରୁଛନ୍ତି । ସେମାନେ ସାମରିକ ଭିତ୍ତିଭୂମି ଓ ପ୍ରତିଷ୍ଠାନ ଉପରେ ଆକ୍ରମଣ ଜାରି ରଖିଛନ୍ତି । ଆକ୍ରମଣ ସଫଳ ହେଉଛି, ଲକ୍ଷ୍ୟସ୍ଥଳଗୁଡ଼ିକୁ ଧ୍ୱଂସ କରାଯାଉଛି ଏବଂ ସ୍ୱତନ୍ତ୍ର ସାମରିକ ଅଭିଯାନ ଜାରି ରହିଛି । ସମାନ ସମୟରେ, ରାଜନୈତିକ ଏବଂ କୂଟନୈତିକ ମାଧ୍ୟମରେ ଲକ୍ଷ୍ୟ ହାସଲ କରିବା ପାଇଁ ଆଲୋଚନା ପ୍ରକ୍ରିୟା ଜାରି ରଖିବାରେ ରୁଷ ଆଗ୍ରହୀ ରହିଛି ।
ରୁଷ ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ହାଇପରସୋନିକ୍ କିଞ୍ଜାଲ୍ କ୍ଷେପଣାସ୍ତ୍ର, ଡ୍ରୋନ୍ ଏବଂ ଅନ୍ୟ କ୍ଷେପଣାସ୍ତ୍ର ସାହାଯ୍ୟରେ ଆକ୍ରମଣ କରାଯାଇଛି । ୟୁକ୍ରେନ ସାମରିକ ଭିତ୍ତିଭୂମି ଏବଂ ବାୟୁସେନା ଘାଟିକୁ ଟାର୍ଗେଟ୍ କରି କରାଯାଇଛି । ଅନ୍ୟପଟେ ୟୁକ୍ରେନ ଡ୍ରୋନ୍ ସାହାଯ୍ୟରେ ରୁଷର ଦୁଇଟି ତୈଳ ବିଶୋଧନାଗାର ଉପରେ ଆକ୍ରମଣ କରିଥିବା କହିଛି । ଆକ୍ରମଣ ପରେ ନିଆଁ ଲିଭାଇ ଦିଆଯାଇଛି ଏବଂ ଇନ୍ଧନ ଯୋଗାଣ ଜାରି ରହିଥିବା ରୁଷ ସ୍ପଷ୍ଟ କରିଛି ।
