ନୂଆଦିଲ୍ଲୀ: ୟୁକ୍ରେନ କରିଥିବା ଏକ ବଡ଼ ଡ୍ରୋନ୍ ଆକ୍ରମଣକୁ ରୋକିବାରେ ରୁଷ ସଫଳ ହୋଇଛି । ରୁଷ ପ୍ରତିରକ୍ଷା ମନ୍ତ୍ରଣାଳୟ ଅନୁସାରେ ୟୁକ୍ରେନର ୨୦ ଡ୍ରୋନକୁ ଶନିବାର ନଷ୍ଟ କରାଯାଇଛି । ଏଥିରେ ଅଧିଂକାଶ ମସ୍କୋ-ଅଧିନରେ ଥିବା କ୍ରିମିୟା କ୍ଷେତ୍ର ଉପରେ ନଷ୍ଟ କରାଯାଇଛି । ରୁଷ ଅଧିକାରୀଙ୍କ ସୂଚନା ଅନୁସାରେ, ୧୮ ୟୁକ୍ରେନ ଡ୍ରୋନ କ୍ରିମିୟା ଉପରେ ଓ ବାକି ଡ୍ରୋନକୁ ଅନ୍ୟ କ୍ଷେତ୍ରରେ ଧ୍ୱଂସ କରାଯାଇଛି ।
ଗତ କିଛି ଦିନ ଭିତରେ ରୁଷ-ୟୁକ୍ରେନ ପୁଣି ଥରେ ସଂଘର୍ଷକୁ ବଢାଇଛନ୍ତି । ରୁଷ ପକ୍ଷରୁ ୟୁକ୍ରେନର ୧୪ କ୍ଷେତ୍ରରେ ୫୦୦ରୁ ଅଧିକ ଡ୍ରୋନ ଓ ୪୫ ମିସାଇଲ୍ ମାଡ଼ କରାଯାଇଥିଲା । ୟୁକ୍ରେନର ବାୟୁ ପ୍ରତିରକ୍ଷା ପ୍ରଣାଳୀ ଏହି ଆକ୍ରମଣକୁ ପ୍ରତିହତ କରିବାରେ ପ୍ରାୟତଃ ସଫଳ ହୋଇଥିବା ବେଳେ କିଛି କ୍ଷେପଣାସ୍ତ୍ର ଏହାକୁ ଭେଦିବାରେ ସଫଳ ହୋଇଥିଲେ ।
ୟୁକ୍ରେନର ସ୍ଥାନୀୟ ଅଧିକାରୀଙ୍କ ସୂଚନା ଅନୁସାରେ, ଏହି ଆକ୍ରମଣ ଯୋଗୁଁ ଅନେକ ଅଞ୍ଚଳରେ ବିଦ୍ୟୁତ୍ ସେବା ବ୍ୟାହତ ହୋଇଛି ଏବଂ ଅନେକ ଲୋକ ଆହତ ହୋଇଛନ୍ତି । ଅନେକ ଘର ଏବଂ ବିଦ୍ୟୁତ୍ ପ୍ଲାଣ୍ଟ ମଧ୍ୟ କ୍ଷତିଗ୍ରସ୍ତ ହୋଇଛି । ଜାପୋରିଝିଆ, ଲୁଟସ୍କ ଏବଂ ଡନିପ୍ରୋ ଭଳି ସହରରେ ସର୍ବାଧିକ କ୍ଷତି ହୋଇଛି । ଜାପୋରିଝିଆରେ ୨୫୦୦ ଘରର ବିଦ୍ୟୁତ୍ ସେବା ବ୍ୟାହତ ହୋଇଛି । ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଦାବି କରିଛନ୍ତି ଯେ ଏହି ଆକ୍ରମଣଗୁଡ଼ିକ ମସ୍କୋ ଦ୍ୱାରା ଜାଣିଶୁଣି କରାଯାଇଥିଲା । ସେ ମସ୍କୋ ଉପରେ ଅଧିକ କଠୋର କଟକଣା ପାଇଁ ଦାବି କରିଛନ୍ତି ।
ଏହି ଆକ୍ରମଣଗୁଡ଼ିକରେ ପିଲାମାନଙ୍କ ସମେତ ଅତି କମରେ ତିନି ଜଣ ଲୋକ ପ୍ରାଣ ହରାଇଥିଲେ ଏବଂ ୪୦ରୁ ଅଧିକ ଆହତ ହୋଇଥିଲେ । ଏହା ବ୍ୟତୀତ ୟୁକ୍ରେନ ସଂସଦର ପୂର୍ବତନ ବାଚସ୍ପତି ଆଣ୍ଡ୍ରି ପାରୁବିଙ୍କ ହତ୍ୟା ଖବରକୁ ବି ଜେଲେନସ୍କି ସ୍ପଷ୍ଟ କରିଛନ୍ତି । ଅନ୍ୟପଟେ ୟୁକ୍ରେନ ସେନା ରୁଷ ଅଧିକୃତ ଅଞ୍ଚଳରେ ଆକ୍ରମଣ କରିଥିବା କହିଛି । କ୍ରାସନୋଡାର ଏବଂ ସିଜରାନରେ ଥିବା ରୁଷ ତୈଳ ବିଶୋଧନାଗାର ଉପରେ ଡ୍ରୋନ୍ ଆକ୍ରମଣ କରିଥିଲା ।
