ବିହାର ବିଧାନସଭା ନିର୍ବାଚନରେ ଏ ହେଉଛନ୍ତି ସବୁଠୁ ଗରିବ ପ୍ରାର୍ଥୀ, ଲୋକଙ୍କ ଚାନ୍ଦାରେ କରୁଛନ୍ତି ପ୍ରଚାର

ଆରା ୨୯।୧୦: ବିହାର ବିଧାନସଭା ନିର୍ବାଚନ ପାଇଁ ଏବେ ପ୍ରଚାର ଜମି ଆସିଲାଣି। କେଉଁଠି ନେତା ବଡ଼ ରୋଡ ସୋ କରୁଛନ୍ତି ତ ଆଉ କେଉଁଠି ଦାମୀକା ଗାଡ଼ିର ପ୍ରଦର୍ଶନ ଚାଲିଛି। ଏ ସବୁ ମଧ୍ୟରେ ଜଣେ ପ୍ରାର୍ଥୀ ଏବେ ସମସ୍ତଙ୍କ ଧ୍ୟାନ ଆକର୍ଷଣ କରୁଛନ୍ତି। ତାଙ୍କ ପାଖରେ ନା ଧନ ଅଛି ନା ପ୍ରଚାର ନିମନ୍ତେ ସେଭଳି ଦାମୀ ସାଧନ, ତଥାପି ସେ ତାଙ୍କ ଆଡକୁ ଲୋକଙ୍କୁ ଆକର୍ଷିତ କରୁଛନ୍ତି। ସେ ହେଉଛନ୍ତି କୟାମୁଦ୍ଦିନ ଅଂସାରୀ। ଆରା ବିଧାନସଭା ଆସନରୁ ସେ ମହାମେଣ୍ଟ ରେ ସିପିଆଇ (ଏମଏଲ) ପ୍ରାର୍ଥୀ ହୋଇଛନ୍ତି।

କୟାମୁଦ୍ଦିନଙ୍କୁ ବିହାର ବିଧାନସଭା ନିର୍ବାଚନ ୨୦୨୫ର ସବୁଠୁ ଗରୀବ ପ୍ରାର୍ଥୀ ବୋଲି କୁହାଯାଉଛି। ୫୦ ବର୍ଷ ବୟଷ୍କ କୟାମୁଦ୍ଦିନ ଏମଏଚଡି ଜୈନ କଲେଜ, ଆରାରୁ ଉର୍ଦ୍ଦୂରେ ଏମଏ ପାସ କରିଛନ୍ତି। ଜାତିରେ ସେ ଅଂସାରୀ ଅର୍ଥାତ ଅତ୍ୟନ୍ତ ପଛୁଆବର୍ଗର ହୋଇଥିବା ବେଳେ ଏହା ପୂର୍ବରୁ ସେ ଦୁଇ ଥର ଆରା ରୁ ନିର୍ବାଚନ ଲଢି ସାରିଲେଣି। ଗତ ୨୦୨୦ ବିଧାନସଭା ନିର୍ବାଚନରେ ସେ ବିଜେପିର ଅମରେନ୍ଦ୍ର ପ୍ରତାପ ସିଂହଙ୍କ ଠାରୁ ମାତ୍ର ୩,୦୦୨ ଖଣ୍ଡ  ଭୋଟରେ ହାରି ଯାଇଥିଲେ। ହେଲେ ସେ ବର୍ଷ ନିର୍ବାଚନରେ ତାଙ୍କ ସଂଘର୍ଷ ଓ ସରଳତା ଚର୍ଚ୍ଚାରେ ଥିଲା।

କୟାମୁଦ୍ଦିନ ଏଥର ମଧ୍ୟ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି। ହେଲେ ଗତ ଥର ଅପେକ୍ଷା ଏଥର ତାଙ୍କ ସ୍ଥିତି ଅତ୍ୟନ୍ତ ଜଟିଳ ରହିଛି। ତାଙ୍କର ନା କୌଣସି ଧନ ସମ୍ପତ୍ତି ଅଛି ନା ବାଣିଜ୍ୟ ବ୍ୟବସାୟ, ତାଙ୍କ ପତ୍ନୀ ଖୁସବୁ ଅଙ୍ଗନବାଡିରେ ସେବିକା କାମ କରୁଛନ୍ତି। ଏଥିରୁ ଖୁସବୁଙ୍କ ଯାହା  ଆୟ ତାହାହିଁ କୟାମୁଦ୍ଦିନଙ୍କ ପରିବାରର ନିୟମିତ ଆୟ। ପ୍ରାର୍ଥୀ ପତ୍ରରେ ସେ ତାଙ୍କ ଆଫିଡେଭିଟ ସଲଗ୍ନ କରିଛନ୍ତି। ଏଥିରେ ତାଙ୍କପାଖରେ ନଗଦ ୨୦ ହଜାର ଟଙ୍କା ଥିବା ଓ ବ୍ୟାଙ୍କ ଖାତାରେ ୫ ହଜାର ଟଙ୍କା ଥିବା ଦର୍ଶାଇଛନ୍ତି। ସେ ପରିବାର ସହ ଏକ ଛୋଟ ଘରେ ରହୁଛନ୍ତି।

ଏଥିରେ କୟାମୁଦ୍ଦିନଙ୍କୁ ଯେବେ ପକେଟରେ ପଇସା ନାହିଁ ପ୍ରଚାର କେମିତି ଚାଲିଛି ପଚରାଯିବାରେ ସେ ସଫାସଫା କହିଛନ୍ତି ଜନତାଙ୍କ ଭରସାରେ ତାଙ୍କ ପ୍ରଚାର ଚାଲିଛି। ସେ ଗାଁକୁ ଗାଁ ବୁଲି ଲୋକଙ୍କଠାରୁ ଛୋଟମୋଟ ଚାନ୍ଦା କରୁଛନ୍ତି। ଏଥିରୁ ଯାହା ମିଳୁଛି ସେଥିରେ ପୋଷ୍ଟର ଛପା ଯାଉଥିବା ବେଳେ ସାଇକେଲରେ ଘରକୁ ଘର ବୁଲି ଲୋକଙ୍କୁ ଭେଟୁଥିବା କହିଛନ୍ତି। ଆରା ସିଟ୍ ରେ ତାଙ୍କ ସାମ୍ନାରେ ବିଜେପିର ସଞ୍ଜୟ ସିଂହ ଟାଇଗର ଓ ଜନସୁରାଜ ପାର୍ଟିର ଡ. ବିଜୟ କୁମାର ଗୁପ୍ତାଙ୍କ ଭଳି ମଜଭୁତ ଚ୍ୟାଲେଞ୍ଜ ଅଛନ୍ତି। ହେଲେ କୟାମୁଦ୍ଦିନଙ୍କ ସଚ୍ଚୋଟତା ଓ ସାଧୁତା ତାଙ୍କୁ ଲୋକଙ୍କ ମନରେ ବସାଇଛି।