ନୂଆଦିଲ୍ଲୀ: ରାଷ୍ଟ୍ରୀୟ ସ୍ୱୟଂସେବକ ସଂଘ ମୁଖ୍ୟ ମୋହନ ଭାଗବତ ସଂଘର ୧୦୦ ବର୍ଷ ପୂର୍ତ୍ତି ଅବସରରେ ଦିଲ୍ଲୀରେ ଆୟୋଜିତ ଏକ କାର୍ଯ୍ୟକ୍ରମରେ ବିଭିନ୍ନ ପ୍ରଶ୍ନର ଉତ୍ତର ଦେଇଛନ୍ତି । ଏହି ଅବସରରେ ସେ ଏକ ବଡ଼ ବୟାନ ଦେଇ ପ୍ରତ୍ୟେକ ଭାରତୀୟ ଦମ୍ପତ୍ତି ତିନୋଟି ସନ୍ତାନ ଜନ୍ମ କରିବା ଦରକାର ବୋଲି କହିଛନ୍ତି । ଭାରତର ବଦଳୁଥିବା ଡେମୋଗ୍ରାଫି ଓ ଜନସଂଖ୍ୟା ନିୟନ୍ତ୍ରଣ ଉପରେ ପ୍ରଶ୍ନର ଜବାବରେ ସେ ଏହା କହିଛନ୍ତି । ଭାଗବତ କହିଛନ୍ତି, ବିଶେଷଜ୍ଞଙ୍କ ମତରେ ଯେଉଁ ସମୁଦାୟରେ ଜନ୍ମ ହାର ୩ରୁ କମ, ତାହା ଧୀରେ ଧୀରେ ବିଲୁପ୍ତ ହୋଇଯାଏ ।
ମୋହନ ଭାଗବତ କହିଛନ୍ତି, "ଡାକ୍ତରମାନେ ମୋତେ କହିଛନ୍ତି ଯେ ସଠିକ୍ ବୟସରେ ବିବାହ କରିବା ଏବଂ ତିନୋଟି ସନ୍ତାନ ଜନ୍ମ ଦ୍ୱାରା ପିତାମାତା ଏବଂ ପିଲାମାନେ ସୁସ୍ଥ ରୁହନ୍ତି । ତିନି ଭାଇଭଉଣୀ ଥିବା ଘରେ ପିଲାମାନେ ମଧ୍ୟ ଉଚିତ୍ ସଂସ୍କାର ଶିଖନ୍ତି ଏବଂ ଭବିଷ୍ୟତରେ ସେମାନଙ୍କ ପାରିବାରିକ ଜୀବନରେ କୌଣସି ଅଶାନ୍ତି ସୃଷ୍ଟି ହୁଏ ନାହିଁ । ଆମ ଦେଶର ଜନସଂଖ୍ୟା ୨.୧ ଜନ୍ମହାର କଥା କୁହେ, ଯାହା ହାରାହାରି ଭାବରେ ଠିକ୍ । କିନ୍ତୁ ଆପଣ କେବେବି ୦.୧ ସନ୍ତାନ ପାଇପାରିବେ ନାହିଁ । ଗଣିତରେ, ୨.୧ ହୋଇଯାଏ ୨, କିନ୍ତୁ ଯେତେବେଳେ ଜନ୍ମ କଥା ଆସେ, ଦୁଇଟି ପରେ ଏହା ତିନି ହେବା ଆବଶ୍ୟକ । ତେଣୁ ସବୁ ଭାରତୀୟ ଦମ୍ପତି ରାଷ୍ଟ୍ର ସ୍ୱାର୍ଥ ପାଇଁ ତିନୋଟି ସନ୍ତାନ ଜନ୍ମ କରିବା ପାଇଁ ଚେଷ୍ଟା କରିବା ଉଚିତ ।
ଏହାସହ ସେ ଚିନ୍ତା ମଧ୍ୟ ବ୍ୟକ୍ତ କରିଛନ୍ତି । ସେ କହିଛନ୍ତି, 'ଜନସଂଖ୍ୟା ବରଦାନ ହୋଇପାରେ, କିନ୍ତୁ ଏହା ଏକ ବୋଝ ମଧ୍ୟ ହୋଇପାରେ । ସମସ୍ତଙ୍କୁ ତ ଖାଦ୍ୟ ଯୋଗାଇବାକୁ ପଡିବ ନାଁ । ଏହି କାରଣରୁ ଜନସଂଖ୍ୟା ନୀତି ରହିଛି । ଜନସଂଖ୍ୟା ନିୟନ୍ତ୍ରଣ ଏବଂ ସମାନ ସଂଖ୍ୟା ସ୍ଥିର ରଖିବା ପାଇଁ ପ୍ରତ୍ୟେକ ପରିବାରର ତିନୋଟି ପିଲା ରହିବା ଦରକାର । କିନ୍ତୁ ତା'ଠାରୁ ଅଧିକ ପିଲା ହେବା ଉଚିତ୍ ନୁହେଁ । ଏହାଦ୍ୱାରା ସେମାନଙ୍କର ଲାଳନପାଳନ ମଧ୍ୟ ଠିକ୍ ହୋଇପାରିବ ।
ଭାଗବତ କହିଛନ୍ତି, ସବୁ ସମୁଦାୟରେ ଜନ୍ମହାର ହ୍ରାସ ପାଉଛି ଏବଂ ହିନ୍ଦୁମାନଙ୍କ କ୍ଷେତ୍ରରେ ଅଧିକ ରହିଛି । ଅନ୍ୟ ସମୁଦାୟରେ ଏହା ଅଧିକ ଥିଲା କିନ୍ତୁ ଏବେ ହ୍ରାସ ପାଉଛି । ଡେମୋଗ୍ରାଫି ପରିବର୍ତ୍ତନ ବିଷୟରେ ଆରଏସ୍ଏସ୍ ମୁଖ୍ୟ କହିଛନ୍ତି ଯେ ଏହା ଏକ ଚିନ୍ତାର ବିଷୟ ଏବଂ ଜନସଂଖ୍ୟା ଅସନ୍ତୁଳନର ଏକ ପ୍ରମୁଖ କାରଣ ହେଉଛି ଧର୍ମାନ୍ତରୀକରଣ । ସେ କହିଛନ୍ତି, "ଆମେ ଜନସଂଖ୍ୟା ପରିବର୍ତ୍ତନ ବିଷୟରେ ଚିନ୍ତିତ ଏବଂ କାରଣ ଏହା ଅନେକ ପରିଣାମ ଆଣିଥାଏ । ଦେଶର ବିଭାଜନ – ଏହାର ଏକ ପରିଣାମ । ମୁଁ କେବଳ ଭାରତ ବିଷୟରେ କହୁନାହିଁ, ପ୍ରତ୍ୟେକ ଦେଶରେ ଜନସଂଖ୍ୟା ଅସନ୍ତୁଳନ ଏକ ଚିନ୍ତାର ବିଷୟ । ଜନସଂଖ୍ୟା ଅସନ୍ତୁଳନର ଏକ ପ୍ରମୁଖ କାରଣ ହେଉଛି ଧର୍ମାନ୍ତରୀକରଣ, ଯାହା ଭାରତୀୟ ପରମ୍ପରାର ଏକ ଅଂଶ ନୁହେଁ । ଖ୍ରୀଷ୍ଟିଆନ ଏବଂ ମୁସଲମାନମାନେ ମଧ୍ୟ କୁହନ୍ତି ଯେ ଧର୍ମାନ୍ତରୀକରଣ ଏକ ଭଲ କଥା ନୁହେଁ, ତେଣୁ ଏହା ହେବା ଉଚିତ୍ ନୁହେଁ ।
