ବେଙ୍ଗାଲୁରୁ: ସସ୍ପେ୍ନ୍ସ, ଥ୍ରୀଲର ଭରା ବେଙ୍ଗାଲୁରୁ ମ୍ୟାଚ୍ । ଶେଷ ଓଭରରେ ବଢ଼ିଲା ହୃଦସ୍ପଦନ । ୟସ୍ ଦୟାଲଙ୍କ ପ୍ରତିଟି ବଲ ସହ ଓଭର ସିନା ସରୁଥିଲା ହେଲେ କିଏ ଜିତିବ ଥିଲା ଅନିଶ୍ଚିତ । ଶେଷରେ ସଂଘର୍ଷ କରି ବାଜି ମାରିନେଲା ବେଙ୍ଗାଲୁରୁ । ଆଇପିଏଲର ୫୨ତମ ମ୍ୟାଚକୁ ୨ରନରେ ଜିତି ନେଇଯାଇଛି ଦଳ । ଦୁଇ ଅଙ୍କ ପାଇ ୧୬ ପଏଣ୍ଟ ସହିତ ଟେବୁଲର ଶୀର୍ଷରେ ପହଞ୍ଚିଛି । ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ପ୍ରଥମେ ବ୍ୟାଟିଂ କରି ୨୧୩ରନ୍ର ଟାର୍ଗେଟ୍ ଦେଇଥିଲା । ଏହି ଲକ୍ଷ୍ୟକୁ ପିଛା କରିଥିଲା ଚେନ୍ନାଇ ସୁପର କିଙ୍ଗସ ୨୧୧ ରନ୍ କରିବାରେ ସକ୍ଷମ ହୋଇଥିଲା । ଫଳରେ ଶେଷ ଓଭରରେ ଘରୋଇ ଟିମ୍ ୨ ରନରେ ମ୍ୟାଚ୍ ଜିତି ନେଇଛି ।
ଆଇପିଏଲର ୫୨ତମ ମ୍ୟାଚ୍ ଏମ୍ ଚିନ୍ନାସ୍ୱାମୀ ଷ୍ଟାଡିୟମରେ ଖେଳାଯାଇଥିଲା । ଶନିବାର ମୁହାଁମୁହିଁ ହୋଇଖିଲେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ଚେନ୍ନାଇ ସୁପର କିଙ୍ଗ୍ସ । ପ୍ରଥମେ ବ୍ୟାଟିଂ କରି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨୦ ଓଭରରେ ପାଞ୍ଚ ୱିକେଟ୍ ହରାଇ ୨୧୩ ରନ୍ କରିଥିଲା । ଜାକବ ବେଥେଲ ଓ ବିରାଟ କୋହଲି ପାଳି ଆରମ୍ଭ କରିଥିଲେ । ପ୍ରଥମ ୱିକେଟ ପାଇଁ ଦୁହିଁଙ୍କ ମଧ୍ୟରେ ୯୭ ରନର ଭାଗୀଦାରି ହୋଇଥିଲା । ଜାକବ ୩୩ ବଲ୍ରେ ୫୫ ରନ୍ କରି ଆଉଟ୍ ହୋଇଥିଲେ। ପରେ ବିରାଟ କୋହଲି ୩୩ ବଲ୍ରେ ୬୨ ରନ୍ କରିଥିଲେ । ଏଥିରେ ୫ଟି ଚୌକା ଓ ୫ ଛକା ରହିଛି । ଏହାପରେ ଦେବଦତ୍ତ ପାଡିକାଲଙ୍କୁ ପଥିରାନା ପାଭିଲିୟନ ପଠାଇଥିଲେ। ସେ ୧୫ ବଲ୍ରେ ୧୭ ରନ୍ କରିଥିଲେ। ଜିତେଶ ଶର୍ମା ୭ ରନ୍ କରି ଆଉଟ୍ ହୋଇଥିଲେ । ଅଧିନାୟକ ରଜତ୍ ପାଟିଦାର ୧୫ ବଲ୍ ରେ ୧୧ ରନ୍ କରି ପଥିରନାଙ୍କ ଶିକାର ହୋଇଥିଲେ । ଶେଷରେ ରୋମାରିଓ ସେଫର୍ଡ ୧୪ ବଲ୍ରେ ୫୩ ରନ୍ର ଅପରାଜିତ ଇନିଂସ ଖେଳିଥିଲେ। ସେ ୬ଟି ଛକା ଓ ୪ଟି ଚୌକା ମାରିଥିଲେ। ଅନ୍ୟପଟେ ୨୧୪ ଲକ୍ଷ୍ୟକୁ ପିଛା କରି ମ୍ୟାଚ୍ ହାରିଛି ଚେନ୍ନାଇ ସୁପର କିଙ୍ଗସ ।
