୮ ଭାରତୀୟ ମତ୍ସ୍ୟଜୀବୀଙ୍କୁ ଧରିଲା ପାକିସ୍ତାନ, ବୋଟ୍ ଉପରକୁ କଲା ଗୁଳିମାଡ

ଗାନ୍ଧୀନଗର, ୦୮|୧୧  :  ଭାରତୀୟ ମତ୍ସ୍ୟଜୀବୀଙ୍କ ଉପରେ ରାଗ ସୁଝାଇଲା ପାକିସ୍ତାନ । ମାଛ ଧରିବାକୁ ଯାଇଥିବା ବେଳେ ଭାରତୀୟ ବୋଟକୁ ଅଟକ ରଖିଲା । ଏମିତି କିଛି ଘଟଣା ସାମ୍ନାକୁ ଆସିଛି ଆରବ ସାରରରେ । ଗୁଜୁରାଟ କୂଳଠୁ କିଛି କିଲୋମିଟର ଦୂରରେ ଏପରି ଆଚରଣ କରିଛି ପାକିସ୍ତାନ ସମୁଦ୍ର ସୁରକ୍ଷା ସଂସ୍ଥା ।

ରିପୋର୍ଟ ଅନୁସାରେ, ୮ ଜଣ ମତ୍ସ୍ୟଜୀବୀ ମାଛ ମାରିବାକୁ ଆରବ ସାଗରକୁ ଯାଇଥିଲେ । ଭୁଲରେ ସେମାନେ ଅନ୍ତର୍ଜାତୀୟ ସାମୁଦ୍ରିକ ସୀମା ନିକଟରେ ମାଛ ମାରୁଥିଲେ । ଯେଉଁଠି ମାଛ ଧରିବା ପାଇଁ ଅନୁମତି ନଥିଲା । ଏହି ସମୟରେ ସେମାନଙ୍କୁ ପାକ୍ ସୁରକ୍ଷାକର୍ମୀ ଅଟକାଇଥିଲେ । ତେବେ ଅଟକ ଥିବା ୮ ମତ୍ସ୍ୟଜୀବୀଙ୍କ ମଧ୍ୟରୁ ୭ ଜଣ ଗୁଜୁରାଟର ହୋଇଥିବା ବେଳେ ଜଣେ ମହାରାଷ୍ଟ୍ରର ରହିଛନ୍ତି ।

ରିପୋର୍ଟ ଅନୁସାରେ, ନର ନାରାୟଣ ନାମକ ଏକ ବୋଟ୍ ଓଖା ବନ୍ଦରରୁ ମାଛ ଧରିବା ପାଇଁ ବାହାରିଥିଲା । ସବୁଦିନ ଭଳି ସମୁଦ୍ର ମଧ୍ୟରୁ ଗଲା ବେଳେ ତାଙ୍କୁ ପାକିସ୍ତାନ ସାମୁଦ୍ରିକ ସୁରକ୍ଷା ସଂସ୍ଥା ଅଟକାଇଥିଲେ ।ପାକିସ୍ତାନ ସୀମାକୁ ପ୍ରବେଶ କରିଥିବା ନେଇ କହିଥିଲେ । ଏପରିକି ପାକିସ୍ତାନ ସୁରକ୍ଷାକର୍ମୀ ସେମାନଙ୍କ ଉପରକୁ ଗୁଳିମାଡ କରିଥିବା କୁହାଯାଉଛି । ପରେ ବୋଟକୁ ଜବତ କରି ମତ୍ସ୍ୟଜୀବୀଙ୍କୁ ପାକିସ୍ତାନ ନିଆଯାଇଥିଲା ।

ମତ୍ସ୍ୟଜୀବୀଙ୍କୁ ମୁକୁଳାଇବା ପାଇଁ ସରକାରଙ୍କୁ ସେମାନଙ୍କ ପରିବାର ପକ୍ଷରୁ ଅନୁରୋଧ କରାଯାଇଛି । ଏହାସହ ପାକିସ୍ତାନ କୋଷ୍ଟ ଗାର୍ଡ ଗୁଳିରେ ଜଣେ ମତ୍ସ୍ୟଜୀବୀ ଆହତ ହୋଇଛନ୍ତି  । ସେମାନଙ୍କୁ କିପରି ଭାରତ ଫେରାଇ ଅଣାଯିବ ଏବଂ ଚିକିତ୍ସା କରାଯିବ ସେନେଇ ସରକାର ତୁରନ୍ତ ପଦକ୍ଷେପ ନିଅନ୍ତୁ । ଏହାସହ ମତ୍ସ୍ୟଜୀବୀମାନଙ୍କ ସୁରକ୍ଷା ପାଇଁ ପରିବାର ପକ୍ଷରୁ ସରକାରଙ୍କୁ ନିବେଦନ କରାଯାଇଛି ।