ତାଇଓ୍ବାନ ନିକଟ ଦ୍ବୀପରେ ଉଡ଼ିଲା ଚୀନ୍‌ ଡ୍ରୋନ୍‌, ଯୁଦ୍ଧ ବିମାନ ପଠାଇଲା ଜାପାନ

ନୂଆଦିଲ୍ଲୀ: ତାଇଓ୍ବାନ ନିକଟରେ ଚୀନ୍‌ ଡ୍ରୋନ୍‌ ଚିହ୍ନଟ ହେବା ପରେ ଜାପାନ ନିଜର ଲଢ଼ୁଆ ବିମାନ ପଠାଇଛି । ତାଇଓ୍ବାନକୁ ନେଇ ଚୀନ୍‌ ସହ କୂଟନୈତିକ ବିବାଦ ମଧ୍ୟରେ ଜାପାନ ଏଭଳି ପଦକ୍ଷେପ ନେଇଛି । ଚୀନ୍‌ର ଏହି ଡ୍ରୋନ୍‌ ଜାପାନ ନିକଟ ୟୁନାଗୁନି ଦ୍ବୀପରେ ଦେଖିବାକୁ ମିଳିଥିଲା । ଏହି ଦ୍ବୀପରେ ଜାପାନ ମିସାଇଲ୍‌ ମୁତୟନ କରିବାକୁ ଯୋଜନା କରୁଛି । ଜାପାନର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ, ସୋମାବର ୟୁନାଗୁନି ଦ୍ବୀପ ଏବଂ ତାଇଓ୍ବାନ୍‌ ମଧ୍ୟରେ ଏକ ଚୀନ ଡ୍ରୋନ୍‌ ଉଡ଼ୁଥିବାର ଜାଣିବାକୁ ପାଇଥିଲୁ ।

 ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ତାଇୱାନ ପ୍ରସଙ୍ଗ ଉପରେ ଆଲୋଚନା କରିବାର ଗୋଟିଏ ଦିନ ପରେ ଏହା ଘଟିଛି । ସେ ଆମେରିକୀୟ ରାଷ୍ଟ୍ରପତିଙ୍କୁ କହିଥିଲେ ଯେ ତାଇୱାନର "ଚୀନକୁ ଫେରିବା" ଯୁଦ୍ଧ ପରବର୍ତ୍ତୀ ଅନ୍ତର୍ଜାତୀୟ କାର୍ଯ୍ରକ୍ରମର ଏକ ପ୍ରମୁଖ ଅଂଶ। ଦିନ ଥିଲା ଚୀନ ଏବଂ ଆମେରିକା  ଫାସିବାଦ ଏବଂ ସାମରିକବାଦ ବିରୁଦ୍ଧରେ ଲଢ଼ୁଥିଲେ । କିନ୍ତୁ ଏବେ ଏକାଠି କାମ କରିବା ଉଚିତ ବୋଲି ଜିନପିଙ୍ଗ କହିଥିବା ନେଇ ଜିନହୁଆରେ ଖବର ପ୍ରକାଶ ପାଇଛି । 

ବେଜିଂର ବୈଦେଶିକ ମନ୍ତ୍ରୀ ୱାଙ୍ଗ ୟି ଟୋକିଓକୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ, ଜାପାନ ପ୍ରଧାନମନ୍ତ୍ରୀ ସାନାଏ ତାକାଇଚିଙ୍କ ମନ୍ତବ୍ୟ ସୀମା ଲଙ୍ଘିଛି । ସେ ଏହା ମଧ୍ୟ କହିଛନ୍ତି ଯେ, ଦେଶର ସାର୍ବଭୌମତ୍ୱକୁ ସୁରକ୍ଷା ଦେବା ଏବଂ ଯୁଦ୍ଧ ପରବର୍ତ୍ତୀ ସଫଳତାକୁ ରକ୍ଷା କରିବା ପାଇଁ ଚୀନ୍ ଏହି ମନ୍ତବ୍ୟର ଦୃଢ଼ ଜବାବ ଦେବ ।

ଏହା ଆଶ୍ଚର୍ଯ୍ୟଜନକ ଯେ ଜାପାନର ବର୍ତ୍ତମାନର ନେତା ତାଇୱାନ ପ୍ରସଙ୍ଗରେ ସାମରିକ ହସ୍ତକ୍ଷେପ କରିବାକୁ ଭୁଲ ସଙ୍କେତ ଦେଇଛନ୍ତି । ଏପରି କଥା କହିଛନ୍ତି ଯାହା କହିବା ଉଚିତ୍ ନୁହେଁ ଏବଂ ଏକ ଲାଲ ରେଖା ଅତିକ୍ରମ କରିଛନ୍ତି । ଯାହାକୁ ସ୍ପର୍ଶ କରିବା ଉଚିତ୍ ନୁହେଁ ବୋଲି ରବିବାର ବୈଦେଶିକ ବ୍ୟାପାର ମନ୍ତ୍ରଣାଳୟ ଦ୍ୱାରା ଜାରି ଏକ ବିବୃତ୍ତିରେ ୱାଙ୍ଗ କହିଛନ୍ତି।

ମନ୍ତ୍ରୀ ଆହୁରି ମଧ୍ୟ କହିଛନ୍ତି, ‘ଏହା କେବଳ ଚୀନର ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତାକୁ ରକ୍ଷା କରିବା ପାଇଁ ନୁହେଁ, ବରଂ ରକ୍ତ ଏବଂ ଜୀବନ ଦେଇ ଜିତିଥିବା ଯୁଦ୍ଧ ପରବର୍ତ୍ତୀ ସଫଳତାକୁ ରକ୍ଷା କରିବା ଏବଂ ଅନ୍ତର୍ଜାତୀୟ ନ୍ୟାୟ ଓ ମାନବତାକୁ ବଜାୟ ରଖିବା ପାଇଁ ଦରକାର ।’ ଏହା ପୂର୍ବରୁ ଚୀନ୍‌ ନଭେମ୍ବର ୧୯ରେ ଚୀନ୍ ଦାବି କରିଥିଲା ଯେ, ଜାତିସଂଘର ସୁରକ୍ଷା ପରିଷଦ​‌ରେ ସ୍ଥାୟୀ ସଦସ୍ୟ ହେବାକୁ ଜାପାନ ଅଯୋଗ୍ୟ ।